ކެފޭ ރިޓްރީޓްގެ އައުޓްލެޓެއް ހުޅުމާލޭގެ ބީޗްރޯޑްމަގުގައި ހުޅުވައިފިއެވެ.
ބުދަ ދުވަހުގެ ރޭ މި އައުޓްލެޓް ހުޅުއްވައިދެއްވީ ޓްރާންސްޕޯޓް މިނިސްޓަރު އައިޝަތު ނަހުލާއެވެ.
އައުޓްލެޓް ހުޅުއްވައިދެއްވުމަށް ފަހު ރާއްޖެއެމްވީއަށް ދެއްވި އިންޓަވިއުގައި މިނިސްޓަރު ވިދާޅުވީ ޒުވާން ވިޔަފާރިވެރިން އިސްނަގައިގެން ވިޔަފާރީގެ ދާއިރާއަށް ނިކުތުމުން ކާމިޔާބުވާނެ ކަމަށެވެ.
މި އައުޓްލެޓް ފަރުމާ ކުރެވިފައިވަނީ ބީޗް ހިމެނޭ ގޮތަށް އެއް ފަހަރާ 130 މީހުންނަށް ކެވޭ ގޮތަށެވެ. ކެފޭ އިން ލިބެން ހުންނަ ކެއުންތަކަކީ އިންޑިއަން، ޗައިނީޒްގެ އިތުރުން ވެސްޓަން ފުޑްއެވެ.
ރިޓްރީޓްގެ ފައުންޑަރ ހުސެއިން އިސްމާއިލް ވިދާޅުވީ ރީޓްރީޓަކީ ދިވެހި ބްރޭންޑެއް ކަމަށާއި ހިދުމަތް ފޯރުކޮށްދިނުމުގައި އަބަދު ވެސް ކަސްޓަމަރުންގެ ޖީބަށް ލުއި ކޮލެޓީ ރަނގަޅު ހިދުމަތެއް ފޯރުކޮށްދިނުމަށް އިސްކަންދޭ ކަމަށެވެ. އަދި އެ ބްރޭންޑް އުފެއްދުމުގެ އެންމެ ބޮޑު އެއް ބޭނުމަކީ ވެސް އެއީ ކަމަށް އޭނާ ވިދާޅުވިއެވެ.
"މިތަނުން ކެފޭގެ ހާއްސަ ސޭންޑްވިޗް ލިބޭނެ، ކެފޭގައި ބޭނުންކުރާނީ ބިއްލޫރި ފުޅި ޕްލާސްޓިކް ފްރީ ތަނެއްގެ ގޮތުގައި ހިންގާނީ" އައުޓްލެޓް މެނޭޖަރު މުހައްމަދު ނައީމް ވިދާޅުވިއެވެ.
ކެފޭ ރިޓްރީގެ ދެ އައުޓްލެޓް މާލޭގައި ހިންގަމުންދާއިރު މިއީ ހުޅުމާލޭގައި ހުޅުވި ފުރަތަމަ އައުޓްލެޓެވެ.
ހުޅުމާލޭގައި މިއަހަރު ތެރޭގައި އިތުރު އައުޓްލެޓެއް ހުޅުވަން ނިންމާފައިވާ ކަމަށާއި މާލޭގައި ރޯދަ މަހު ވެސް އައުޓްލެޓެއް ހުޅުވާނެ ކަމަށް ރިޓްރީޓް ކެފޭ އިން ބުންޏެވެ.
