އެއާލައިން އޮފް ދަ އިޔަރ އެވޯޑު އެމިރޭޓްސްއަށް ލިބިއްޖެ

އޭވިއޭޝަން ބިޒްނަސް އެވޯޑް ހަފްލާގައިދޭ އެންމެ ޝަރަފުވެރި އެވޯޑް ކަމަށްވާ އެއާލައިން އޮފް ދަ އިޔަރ އެވޯޑް އެމިރޭޓްސް އެއަރވޭސްއަށް ލިބިއްޖެއެވެ.

އެމިރޭޓްސްއިން ބުނީ މި އެވޯޑްއާއިއެކު އެ އެއާލައިނުން ދަތުރުކުރާ ފަސިންޖަރުންނަށް ފާއިތުވި އަހަރު ދުވަހު އެންމެ އެދެވޭ ފެންވަރަށް ހިދުމަތްދެވިފައިވާ ކަމަށް ގަބޫލުކުރާ ކަމަށެވެ. އަދި ކޮވިޑްގެ މި ހާލަތުގައިވެސް ފަސިންޖަރުންނާއި ކްރޫއިންގެ ރައްކާތެރިކަމަށް ގިނަ ފިޔަވަޅުތަކެއް އަޅާފައިވާނެ ކަމަށާއި، އެހެންކަމުން ޕެންޑަމިކްގެ ތެރޭގައިވެސް އެމިރޭޓްސް ވެގެންދާނީ އެންމެ ރައްކާތެރި އެއާލައިންނަށް ކަމަށެވެ.

ސޭފް ޓްރެވަލް ބަރޯމީޓާ އިން އެމިރޭޓްސް އަކީ އެންމެ ރައްކާތެރި އެއާލައިންގެ ގޮތުގައި ވަނީ ކަނޑައަޅާފައެވެ. ކޮވިޑްގެ ހާލަތާއިއެކު އެމިރޭޓްސް އިން ވަނީ އެ އެއާލައިން ދަތުރުކުރާ ފަސިންޖަރުންނަށް ދަތުރުގެ މުއްދަތުގައި ކޮވިޑް ޖެހިއްޖެނަމަ، ބައްޔަށް ބޭސްކުރާނެ ހާއްސަ އިންޝުއަރެންސް ޕެކޭޖެއް ތައާރަފު ކޮށްފައެވެ.

އެމިރޭޓްސްއިން ބުނީ ކޮވިޑްގެ ހާލަތަށްފަހު މިހާރު އެއާލައިންގެ އޮޕަރޭޝަންތަކުގެ 70 އިންސައްތަ އޮޕަރޭޝަން ފަށާފައިވާ ކަމަށެވެ.