ލަންކާގެ ސުޕްރީމް ކޯޓު ހުންނަ އިމާރާތުގައި އަލިފާނުގެ ހާދިސާއެއް ހިނގައިފި
އަލިފާން ރޯވިތާ މާގިނައިރުތަކެއް ނުވަނީން އަލިފާންގަނޑު ވަނީ ކޮންޓްރޯލް ކޮށްފައި
ލަންކާގެ ސްޕްރީމް ކޯޓުގައި އަލިފާން ރޯވެ ދުން އަރަމުން ދަނިކޮށް
ސްރީލަންކާގެ ވެރިރަށް ކޮލަމްބޯގައި ހުންނަ އެ ގައުމުގެ ސްޕްރީމް ކޯޓުގެ އިމާރާތުގައި އަލިފާނުގެ ހާދިސާއެއް ހިނގައިފިއެވެ.
ލަންކާގެ ސުޕްރީމް ކޯޓުގައި އަލިފާނުގެ ހާދިސާއެއް ހިނގާފައި ވަނީ އަންގާރަ ދުވަހުގެ ހަވީރު 04:30 ހާއިރުއެވެ. ނަމަވެސް އަލިފާން ރޯވިތާ މާ ގިނަ އިރުތަކެއް ނުވަނީސް، އަލިފާންގަނޑު ކޮންޓްރޯލް ކޮށްފައިވާ ކަމަށް އޮފިޝަލުންނާ ހަވާލާދީ ލަންކާ މީޑިއާ ރިޕޯޓްތަކުގައި ވެއެވެ.
ލަންކާގެ މީޑިއާ ރިޕޯޓްތައް ބުނާ ގޮތުން މި އަލިފާނުގެ ހާދިސާގައި އެއްވެސް މީހަކަށް އަނިޔާއެއްވި ކަމަށް މިހާތަނަށް ރިޕޯޓް ކޮށްފައިނުވާއިރު، ކަމާބެހޭ ފަރާތްތަކުން އަންނަނީ މި ހާދިސާ ހިނގަން މެދުވެރި ސަބަބު ތަހުގީގު ކުރަމުންނެވެ.
ސުޕްރީމް ކޯޓުގައި މަސައްކަތް ކުރާ މުވައްޒަފަކާއި ހަވާލާދީ އެ ގައުމުގެ މީޑިއާތަކުން ރިޕޯޓްކޮށްފައި ވަނީ މި ހާދިސާ ހިނގަން މެދުވެރިވެފައިވަނީ ކަރަންޓް ޝޯޓެއްގެ ސަބަބުން ކަމަށް ބެލެވޭ ކަމަށެވެ. ނަމަވެސް މި މައުލޫމާތުތައް ރަސްމީ އިދާރާއަކުން ކަަށަވަރު ކޮށްދީފައެއް ނުވެއެވެ.
