މައްސަލަތަކުގެ ތަފުސީލު ނުލިބުނު ނަމަވެސް އަލިބެ މާފަށް އެދިވަޑައިގެންފި
15 ޑިސެމްބަރު 2020 | އަންގާރަ 10:33އަލިބެގެ މައްސަލައެއް ބެލީ ޓީޓީ އެސޯސިއޭޝަނާއި ދެކޮޅަށް ސިވިލް ކޯޓުގައި ދައުވާ ކުރުމުން
ޓީޓީ އެސޯސިއޭޝަނުގެ ކުރީގެ ހިންގާ ކޮމިޓީގައި ހިމެނިވަޑައިގެންނެވި އަދި މަޝްހޫރު ޓީޓީ ކުޅުންތެރިޔާ އަލީ އާދަމް މަނިކް (ތާޅަފިލި އަލިބެ)
ޓޭބަލް ޓެނިސް އެސޯސިއޭޝަން އޮފް މޯލްޑިވްސްއިން ބެލި މައްސަލަތަކުގެ އިތުރު ތަފުސީލު ނުލިބުނު ނަމަވެސް ޓީޓީ އެސޯސިއޭޝަނުގެ ކުރީގެ ހިންގާ ކޮމިޓީގައި ހިމެނިވަޑައިގެންނެވި އަދި މަޝްހޫރު ޓީޓީ ކުޅުންތެރިޔާ އަލީ އާދަމް މަނިކް (ތާޅަފިލި އަލިބެ) މާފަށް އެދިވަޑައިގެންފިއެވެ.
ޓީޓީ އެސޯސިއޭޝަނުން އަލިބެގެ މައްސަލައެއް ބެލީ އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް) އަސާސީ ގަވާއިދާ ޚިލާފަށް ޓީޓީ އެސޯސިއޭޝަނާއި ދެކޮޅަށް ސިވިލް ކޯޓުގައި ދައުވާ ކުރުމުންނެވެ. އެކަމަކު ޓީޓީ އެސޯސިއޭޝަނުގެ އިންތިޚާބުގެ މައްސަލަ ސިވިލް ކޯޓަށް ހުށަހެޅުއްވީ ޓީޓީ އެސޯސިއޭޝަނުގެ އިންތިޚާބު އިންސާފުވެރި، ދެފުށް ފެންނަ އިންތިޚާބަކަށް ހައްދަވާދެއްވުން އެދި ޤާނޫނުގައި ބަޔާންކޮށްފައިވާ ރާއްޖޭގެ ކުޅިވަރާ ބެހޭ އެންމެހައި ފަރާތްތަކަށް ހުށަހެޅުމަށްފަހު، އެކަށީގެންވާ ގޮތެއްގައި އެކަން ކޮށްދެއްވުމަށް އެފަރާތްތަކުން އުޒުރުވެރިވެ، އެހުރިހާ ދޮރެއް ބަންދުވުމުން، އެ ފަރާތްތަކުން އިންސާފު ލިބޭނޭ ކަމަށް ޤަބޫލު ނުކުރެވޭތީ ކަމަށް އަލިބެ ވަނީ ވިދާޅުވެފައެވެ.
އިންސާފު ހޯދުމަށް އަލިބެ ކުރިމަސައްކަތަކީ ކުށެއްކަމައް ނިންމައި މި މައްސަލައިގައި ޓީޓީ އެސޯސިއޭޝަނުން ވަނީ މިކަމަކީ އަލިބެގެ ފަރާތުން މިފަދަ ކަމެއް ފެނުނު ފުރަތަމަ ފަހަރު ކަމަށްވުމުން، ކުރިއަށް އޮތް ތަނުގައި މިފަދަ އަމަލެއް ތަކުރާރު ނުކުރުމަށް ނަސޭހަތްތެރިވެފައެވެ. އަދި ޓީޓީ އެސޯސިއޭޝަނަށް މާފަށް އެދި ލިޔުމުން ހުށަހެޅުމުން، ޓީޓީ އެސޯސިއޭޝަނުގެ އެހެން މެންބަރުންނެކޭ އެއްގޮތަށް، އެހިނދުން ފެށިގެން އެ އެސޯސިއޭޝަނުގެ ހަރަކާތްތަކުގައި ބައިވެރިވުމާއި، ވަސީލަތްތައް ބޭނުންކުރުމަކަށް ހުރަހެއް ނެތް ކަމަށްވެސް ވަނީ އަންގާފައެވެ.
އެއާއެކު އޮކްޓޯބަރު މަހުގެ ހަވަނަ ދުވަހު އަލިބެ ވަނީ ޓީޓީ އެސޯސިއޭޝަނުން ބެލި މައްސަލަތަކުގެ އިތުރު ތަފުސީލު ދިނުމަށް އެދިވަޑައިގެންފައެވެ. އެކަމަކު މިހާތަނަށްވެސް އެ މައްސަލަތަކުގެ ތަފުސީލު ޓީޓީ އެސޯސިއޭޝަނުން އަލިބެއަށް އަންގާފައި ނުވާއިރު، އަންގާރަ ދުވަހު ޓީޓީ އެސޯސިއޭޝަނަށް ފޮނުއްވި ސިޓީގައި އަލިބެ ވަނީ މާފަށް އެދިވަޑައިގެންފައެވެ.
އެ ސިޓީގައި އަލިބެ ވިދާޅުވީ ސެޕްޓެމްބަރު މަހުގެ 21 ވަނަ ދުވަހު ޓީޓީ އެސޯސިއޭޝަނުގެ އެއްވެސް ކުޅިވަރު ވަސީލަތެއް ބޭނުން ނުކުރެވޭ ގޮތަށާއި، އެ އެސޯސިއޭޝަނުން ހިންގަވާ އެއްވެސް ކުޅިވަރު ހަރަކާތެއްގައި ބައިވެރިނުވެވޭ ގޮތަށް ސަސްޕެންޑް ކުރިއިރު، އެ އެސޯސިއޭޝަނުން ބެލި އެއްވެސް މައްސަލައެއްވެސް އަދި އޭނާ ކުރި ކުށްތަކެއްގެ ތަފުސީލުވެސް ހިއްސާކޮށްފައިނުވާ ކަމަށެވެ. އަދި އޭނާގެ މައްޗަށް ޓީޓީ އެސޯސިއޭޝަނުން ކުށްތަކެއްގެ ތުހުމަތުކޮށް، އެ އެސޯސިއޭޝަނުން ނިންމުންތަކެއް ނިންމައި، ފިޔަވަޅު އަޅާވާފައިވަނީ އަދުލުއިންސާފުގެ އެންމެ އަސާސީ މިންގަނޑުތަކާވެސް ކަނޑައެޅިގެން ޚިލާފަށް ކަމަށްވެސް ވިދާޅުވިއެވެ.
އަދި ޓީޓީ އެސޯސިއޭޝަނުން އޭނާގެ މައްޗަށް ފިޔަވަޅު އަޅާފައިވާއިރު، އޭނާ ކުރި ކުށްތަކަކީ ކޮބައިކަން ސާފުކޮށްދެއްވުމަށް ދައުލަތުގެ ކަމާ ބެހޭ އެކިއެކި މުއައްސަސާތަކުގައިވެސް އެދުނު ކަމަށާއި، އެކަމަކު އެ ކުށްތަކަކީ ކޮބައިކަން ސާފުކޮށްދެއްވަން ޓީޓީ އެސޯސިއޭޝަނުގެ އިތުރުން އެ ހުރިހާ މުއައްސަސާތަކެއްވެސް ނުކުޅެދިފައިވާ ކަމަށްވެސް އަލިބެގެ ސިޓީގައި ވަނީ ފާހަގަކުރައްވާފައެވެ.
އަލިބެ އިތުރަށް ވިދާޅުވީ އެ ކުށްތަކަކީ ކޮބައިކަން ސާފުކޮށްނުދެއްވައި، އޭނާއަށް ދީފައިވާ އަދަބު ތަންފީޒުކުރަމުންދާތާ ދެ މަހަށްވުރެ ގިނަ ދުވަސްވެފައި ވާއިރު، އެ މައުލޫމާތު ދިނުމުގެ ނިޔަތެއް ޓީޓީ އެސޯސިއޭޝަނުގައި ނެތްކަން ސާފުކޮށް އެނގޭތީ އާއެކު، ޓީޓީ އެސޯސިއޭޝަނުން ހިންގާ ހަރަކާތްތަކުގައި ބައިވެރިވުމާއި، އެ އެސޯސިއޭޝަނުގެ ވަސީލަތްތައް ބޭނުންކުރުމަށް އޮތް ހަމައެކަނި މަގަކީ، ޓީޓީ އެސޯސިއޭޝަނުން އެދިފައިވާ ގޮތުގެ މަތިން ޓީޓީ އެސޯސިއޭޝަނުގެ ކިބައިން މާފަށް އެދުން ކަމަށްވާތީ، އެ އެސޯސިއޭޝަނުގެ ކިބައިން މާފަށް އެދޭ ކަމަށްވެސް އަލިބެ ވަނީ ވިދާޅުވެފައެވެ.
ޓީޓީ އެސޯސިއޭޝަނުން އެޅި ފިޔަވަޅުތަކާ ގުޅިގެން އަލިބެ މާފަށް އެދިވަޑައިގެންނެވިއިރު، އަލިބެ ސިވިލް ކޯޓަށް ހުށަހެޅުއްވި މައްސަލައިގެ އަޑުއެހުމެއް ސެޕްޓެމްބަރު މަހުގެ 17 ވަނަ ދުވަހަށް ތާވަލުކުރިއެވެ. އެކަމަކު ޓީޓީ އެސޯސިއޭޝަނުގެ އިންތިޚާބު ނިމިފައިވުމުން، އެ މައްސަލައިގެ މުއާލާތް ކެނޑިފައިވާ ކަމަށް ކޯޓުގައި ވިދާޅުވެ އަލިބެ ވަނީ އަމިއްލަފުޅަށް އެމައްސަލަ އަނބުރާ ކޯޓުން ނަންގަވާފައެވެ.
