މޯލްޑިވްސް މީޑިއާ ކައުންސިލުން ދިވެހި މީޑީއާގެ ދަފުތަރު އެކުލަވާލައި އާންމުކޮށްފި
15 ޑިސެމްބަރު 2020 | އަންގާރަ 04:47މި ދަފްތަރަކީ، މޯލްޑިވްސް މީޑިއާ ކައުންސިލުގެ ގަވާއިދުގެ 59 ދަށުން އެކުލަވާލެވުނު ދަފްތަރެއް
މީޑިއާ ކައުންސިލްގެ ބައްދަލުވުމެއް
މޯލްޑިވްސް މީޑިއާ ކައުންސިލުން ދިވެހި މީޑިއާގެ ދަފުތަރު އެކުލަވާލައި އާންމުކޮށްފިއެވެ.
މިކަމާއި ގުޅިގެން އެމްއެމްސީން ނެރުނު ބަޔާނެއްގައި ބުނީ، މި ދަފްތަރަކީ، މޯލްޑިވްސް މީޑިއާ ކައުންސިލުގެ ގަވާއިދުގެ 59 ދަށުން ދިވެހިރާއްޖޭގައި ރަޖިސްޓްރީކޮށްގެން ނެރޭ ނޫސް މަޖައްލާތަކާއި، ބްރޯޑްކާސްޓުކުރާ ފަރާތްތަކާއި، ވަސީލަތްތަކުގެ ދަފުތަރު އެކުލަވާލައި ބެލެހެއްޓުމަށް ލާޒިމްކުރާތީ، އެކުލަވާލެވުނު ދަފްތަރެއްކަމަށެވެ. އަދި، ދަފްތަރު އެކުލަވާލުމުގެ މައިގަނޑު މަޤްސަދަކީ، މޯލްޑިވްސް މިޑިއާ ކައުންސިލަކީ ރާއްޖޭގައި ހިންގާ ހުރިހާ މީޑިއާއެއްގެ ބަލަދުވެރި ފަރާތްކަމުގައި ވާއިރު، ރާއްޖޭގައި ރަޖިސްޓްރީ ކޮށްގެން ހިންގާ ނޫސްމަޖައްލާތައް ދެނެގަތުމާއި، ކަނޑައެޅޭ ނިޒާމެއްގެ ތެރެއިން ރާއްޖޭގެ މީޑިއާތައް ދަފުތަރުކޮށް މިހާތަނަށް ބެލެހެއްޓިފައި ނެތުމުގެ ސަބަބުން މީޑިއާތަކާ ގުޅޭ އެކިއެކި މައްސަލަތަކާއި މަސައްކަތްތައް ކުރިއަށް ގެންދިއުމުގައި މޯލްޑިވްސް މީޑިއާ ކައުންސިލުން ނިންމަންޖެހޭ ކަންކަން ނިންމުމުގައި ކުރިމަތިވެފައިވާ ދަތިތައް ހައްލުކުރުމައްކަމަށެވެ.
ޖުމްލަ 219 މީޑިއާއެއްގެ މައުލޫމާތު މިވަގުތު އަދާހަމަ ކޮށްފައިވާ މި ދަފްތަރުގައި މީޑިއާގެ ނަމާއި، އެޑްރެސް، ރަޖިސްޓްރީ ނަންބަރާއި އަހަރު، އަދި މީޑިއާގެ މަސްއޫލުވެރިޔާ އާއި އެޑިޓަރުގެ މައުލޫމާތު ހިމަނާފައިވެއެވެ. މި ދަފްތަރު މިހާރު މޯލްޑިވްސް މީޑިއާ ކައުންސިލުގެ ވެބްސައިޓްhttp://www.mmc.org.mv/publications/article/14-12-2020އިން ފެނިވަޑައިގަންނަވާނެއެވެ. އަދި ކޮންމެ މަހަކު އެއްފަހަރު ދަފްތަރު އަދާހަމަކޮށް މޯލްޑިވްސް މީޑިއާ ކައުންސިލުގެ ވެބްސައިޓް ގައި ޝާއިއުކުރެވޭނެއެވެ.
