މާލޭ ސަރަހައްދުގެ ގެސްޓް ހައުސްތައް ހުޅުވާލުމުގައި ބަލަން ޖެހޭ ގަވައިދުތަށް ނެރެފި
ކޮވިޑް ޖެހިއްޖެ ހާލަތެއްގައި އައިސޮލޭޓް ވެވޭނެ ތަނެއް ގެސްޓް ހައުސް ތެރޭގައި ހުންނަން ޖެހޭ
ހުޅުމާލެ، ހުޅުމާލެއަކީ ގެސްޓްހައުސްތައް ގިނަ ރަށެއް
މާލެ ސަރަހައްދުގައި ކޮވިޑްގެ ހާލަތު ރަނގަޅުވުމާއި ގުޅިގެން ގެސްޓް ހައުސްގެ ވިޔަފާރި އަލުން ފަށައިގަތުމަށް ތައްޔާރީތަށް ވަމުންދާއިރު، އެފަދަ ވިޔަފާރި ކުރާފަރާތްތަކުން ބަލަންޖެހޭނެ ކަންތައްތަކުގެ ގައިޑްލައިންނެއް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ނެރެފިއެވެ.
އާދިއްތަ ދުވަހު އާންމުކޮށްފައިވާ މިގަވައިދުގައި ވާގޮތުގެ މަތިން، ގެސްޓު ހައުސް ތަކުގައި ތިބެވޭނެ ފަރާތް ތަކުގެ ތެރޭގައި ހިމެނެނީ، އެއްތަނުން އަނެއްތަނަށް ދިޔުމުގެ ތެރޭގައި ގެސްޓް ހައުސްގައި މަޑުކޮށްލާ ފަތުރުވެރިންނާއި، ފުރަބަނދުގެ ކަރަންޓީނުގައި ގޭގައި ތިބުމަށް ހަމަނުޖެއްސޭ ފަދަ ފަރާތް ތަކާއި ވިސާގެ ދަށުން ދަތުރު ކުރާ ފަރާތްތަކުގެ އިތުރުން ރަށްރަށުން އެހެނިހެން ބޭނުން ތަކުގައި މާލެއަށް ދަތުރު ކުރާ ފަރާތް ތަކުންނަށެވެ.
ގެސްޓް ހައުސްތައް އަލުން ހުޅުވާލާއިރު ގައިޑްލައިންގައިވާ ގޮތުގެ މަތިން ކޮވިޑް ޖެހިއްޖެ ހާލަތެއްގައި އައިސޮލޭޓް ވެވޭނެ ތަނެއް ގެސްޓް ހައުސް ތެރޭގައި ހުންނަން ޖެހެއެވެ. އެފަދަ ތަނެއް ވާން ޖެހޭނީ އެޗްޕީއޭ ޗެކް ކުރުމަށް ފަހު ހުއްދަ ދެވިފައިވާ ތަނަކަށެވެ. އަދި ކަރަންޓީނު ވުމަށްވެސް ވަކިން ތަނެއް ހުންނަން ޖެހޭއިރު މިތަންވެސް އެޗްޕީއޭގެ ހުއްދަ އޮންނަ ތަނަކަށް ވާންޖެހެއެވެ.
މީގެ އިތުރުން ގެސްޓް ހައުސް ތެރޭގައި މެޑިކަލް ފަރުވާ ދެވޭނެ ފަދަ ތަނެއް ހުންނަން ޖެހެއެވެ. އެފަދަ ތަނެއްގައި ޑޮކްޓަރުން ނާއި ނަރުހުންނަށް ކޮންމެ ދުވަހަކު ހާލަތު ބެލުމަށް ވަދެވޭނެ ގޮތަށް ހަމަޖައްސަން ޖެހެއެވެ. އަދި ގެސްޓް ހައުސްގައި ކޮވިޑަށް މީހަކު ޕޮޒިޓިވްވެއްޖެ ހާލަތުގައި އެފަދަ ފަރާތްތަށް އުފުލުމަށް ހާއްސަ ވެހިކަލެއްވެސް އޮންނަން ޖެހެއެވެ. ވެހިކަލްގައި ހަރަކާތްތެރިވާ ފަރާތްތަކަށް ޕީޕީއީ ލިބޭނެ ގޮތަށް ހުންނަން ޖެހޭނެ ކަމަށްވެސް މި ގަވައިދުގައި ވެއެވެ.
ޑިސެމްބަރ 14 ވަނަ ދުވަހު މާލޭ ސަރަހައްދުގެ ގެސްޓް ހައުސްތަށް ހުޅުވާލަން ހުއްދަ ދީފައި މިވަނީ ގްރޭޓަރ މާލެ ސަރަހައްދުގައި ކޮވިޑްގެ ހާލަތު ދައްވުމާއި ގުޅިގެންނެވެ. އެގޮތުން އެޗަޕީއޭއިން ބުނެފައިވާ ގޮތުގައި ސެޕްޓެމްބަރު މަހުގެ މެދާއި ހަމައިން ކޮވިޑަށް ޕޮޒިޓިވްވާ މީހުން ވަނީ 5 އިންސައްތަ އަށް ދަށްވެފައެވެ.
