އާތިފް ޝަކޫރު އެދިގެން މިއަދުގެ އަޑުއެހުން ކެންސަލް ކޮށްފި

މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ)ގެ ކުރީގެ ވެރިޔާ އިބްރާހިމް އާތިފް ޝަކޫރުގެ މައްޗަށް އުފުލާފައިވާ ދައުވާއާ ގުޅިގެން އާދިއްތަ ދުވަހުގެ ބޭއްވުމަށް ތާވަލްކުރި އަޑުއެހުން ކެންސަލް ކޮށްފިއެވެ.

ކްރިމިނަލް ކޯޓުން ބުނީ އާތިފް ޝަކޫރުގެ އާދިއްތަ ދުވަހުގެ އަޑުއެހުން ކެންސަލްކުރީ އޭނަ އެދިވަޑައިގެންނެވުމުން ކަމަށެވެ. މައުލޫމާތު ލިބިފައިވާގޮތުގައި، އާދިއްތަ ދުވަހުގެ އަޑުއެހުން ކެންސަލްކޮށްދިނުމަށް އާތިފް އެދިފައިވަނީ، އާތިފް ޝަކޫރާއި އާޒިމާ ޝަކޫރުގެ މަންފާފުޅު ނިޔާވުމާއި ގުޅިގެންނެވެ.

މިއަހަރުގެ ސެޕްޓެމްބަރު މަހުގެ ތެރޭގައި އާތިފް ޝަކޫރު ވަނީ، އޭނާގެ މައްޗަށް ކުރާ ދައުވާއާ ގުޅިގެން ޖަލު ޙުކުމެއް ނާންނަ ގޮތަށް ޕްރޮސެކިއުޓަރ ޖެނެރަލް (ޕީޖީ) އާއެކު އިއުތިރާފު އެއްބަސްވުމެއް އެކުލަވާލުމަށް އެދިފަ އެވެ. އާތިފް އެގޮތަށް އެެދިފައިވަނީ އެންމެ ފަހުން ބޭއްވި އަޑުއެހުމުގައެވެ. ނަމަވެސް އެފަދަ އެއްބަސްވުމެއް ހަދާއިވާކަން ކަމާބެހޭ އެއްވެސް ފަރާކަތުން ހާމަކޮށްފައެއް ނުވެއެވެ.

އެމްއެމްޕީއާރުސީން ދައުލަތަށް ވަންނަން ޖެހޭ ފައިސާ އެސްއޯއެފްގެ އެކައުންޓްތަކަށް ޖަމާކޮށް، އެ ފައިސާ އިން މަނީ ލޯންޑެރިން ކަމަށް ތުހުމަތު ކުރެވޭ މުއާމަލާތްތައް ހިންގި އިރު އެކަން ފުލުހުންނަށް ނުފޮނުވަން ނިންމީ އާތިފް ޝަކޫރުކަން އޭސީސީގެ ތަހުގީގުގަށް ފަހު ނެރުނު ރިޕޯޓުގައި ބަޔާންކޮށްފައިވެއެވެ.

އެގޮތުން އެފް.އައި.ޔޫއަށް ލިބިފައިވާ އެސް.ޓީ.އާރުގައި މަނީ ލޯންޑަރިންގ އަދި ޓެރަރިޒަމަށް ފައިނޭންސްކުރުމަށް ޝައްކުކުރެވޭ ކަންތައްތަކެއް ހިމެނިފައި ވީނަމަވެސް އެ ރިޕޯޓް ފުލުހުންގެ އިދާރާއަށް ނުފޮނުވަން ނިންމާފައިވަނީ އާތިފް ޝަކޫރުކަން އޭނާގެ އިއުތިރާފުންނާއި ތަހުގީގުން ހާމަވާކަމަށް އޭސީސީގެ ރިޕޯޓްގައި ބުނެފައިވެއެވެ. އަދި އެކަމުގެ ސަބަބުން ދައުލަތަށް ލިބެންޖެހޭ ގިނަ އަދަދެއްގެ ފައިސާ އަމިއްލަ ކުންފުންޏެއްގެ އެކައުންޓަށް ޖަމާވެދިޔައިރު، އެކަން ހުއްޓުވަން އެއްވެސް ފިޔަވަޅެއް ނޭޅި އެ ކުންފުންޏަށް ނާޖާއިޒު ފައިދާ ލިބިފައިވާކަން ތަހުގީގުން ހާމަވެފައިވާ ކަމަށް އެރިޕޯޓުގައި ވެއެވެ.

އެކަމާ ގުޅިގެން މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ޤާނޫނާ ހިލާފުވި ކަމުގެ ދައުވާ ކްރިމިނަލް ކޯޓަށް ހުށައަޅާފައިވަނީ މިއަހަރުގެ ފެބްރުއަރީ މަހުގެ 27 ވަނަ ދުވަހުއެވެ.