މޮޑެލް ރައުދާ އާތިފްގެ ޕޯސްޓް މޯޓަމް ހަދައިފި

ބަންގްލަދޭޝްގައި މަރުވި މޮޑެލް ރައުދާ އާތިފްގެ ޕޯސްޓް މޯޓަމް ހަދައިފި ކަމަށް އާއިލާއިން ހާމަކޮށްފި އެވެ.

ބަނގުލަދޭޝްގައި މެޑިސިން ހަދަމުން އައި ދިވެހި ދަރިވަރު އުމުރުން 20 އަހަރުގެ މޮޑެލް ރައުދާ އާތިފް ދަންޖެހިގެން މަރުވެފައި ހުއްޓާ ފެނިފައި ވަނީ ބުދަދުވަހުގެ މެންދުރުކުރީގެ ވަގުތެއްގައި އޭނާ ދިރިއުޅުނު ކޮޓަރީގައެވެ.

ރައުދާގެ އޮޓޮޕްސީ ހެދުމަށް އާއިލާ އިން ދެކޮޅު ހެދި ކަމަށް ބައެއް ރިޕޯޓްތައް ބުނި ނަމަވެސް ރާއްޖޭގެ ފުލުހުންގެ ތަރުޖަމާން އަހްމަދު ޝިފާން ވިދާޅުވީ އޮޓޮޕްސީ ހެދުމަށް ރައުދާގެ އައިލާއިން ދެކޮޅު ނަހަދާ ކަމަށެވެ. ރައުދާގެ އައިލާގެ މެންބަރަކު ފޭސްބުކްގައި ބުނެފައިވަނީ ރައުދާގެ އޮޓޮޕްސީ މިއަދުގެ މެންދުރުގެ ވަގުތެއްގައި ހަދާފައިވާ ކަމަށެވެ.

ރައުދާގެ އާއިލާ ބުރާސްފަތި ދުވަހުގެ މެންދުރު ފަހުގެ ވަގުތެއްގައި، ބަންގްލަދޭޝް އަށް ގޮސްފައިވާއިރު، ބަނގްލަދޭޝްގެ މެޓްރޮޕޮލިޓޭން ޕޮލިސް ތަރުޖަމާން އިފްތިޚާރު އާލަމްއާ ހަވާލާދީ، ޑާކާ ޓްރިބިއުންގައި ބުނެފައިވަނީ، އޭނާ ދަންޖެހިގެން މަރުވެފައި ވަނީ، ޑިޕްރެސްވެގެން ކަމަށް ބެލެވޭ ކަމަށެވެ.

ރައުދާ ދަންޖެހިފައި ހުއްޓާ ފެނުނީ އޭނާގެ ޚަބަރެއް ނުވެގެން އޭނާގެ ބައެއް ރަށްޓެހިން ގޮސް ކޮޓަރި ބެލުމުންނެވެ. އޭނާގެ މަރާ ބެހޭ ގޮތުން އެކި ގޮތްގޮތަށް ވާހަކަ ދައްކަމުން އަންނަ އިރު އޭނާ މަރުވީ އަމިއްލަ އަށް ކަމެއް ނުވަތަ އޭނާ މަރާލީ ކަމެއް އެއްވެސް ފަރާތަކުން ރަސްމީކޮށް އަދި ހާމައެއް ނުކުރެ އެވެ.

ރާއްޖޭގެ ފުލުހުން ބުރާސްފަތި ދުވަހު ކޮށްފައިވާ ޓްވީޓެއްގައި ބުނެފައި ވަނީ، ރައުދާގެ މި މަރުގެ މައްސަލަ ވަރަށް ގާތުން ބަލަމުންދާ ކަމަށާއި، ރައުދާގެ އާއިލާއާއި އެކު ފުލުހުންގެ އިސް އޮފިޝަލަކު ވެސް ބުރާސްފަތި ދުވަހު ޑާކާއަށް ގޮސްފައިވާ ކަމަށެވެ.

ރާއްޖެއެމްވީއަށް އެނގިފައިވާ ގޮތުގައި ރައުދާގެ މަންމައަކީ ޕޮލިހެކެވެ. ދިވެހި ފުލުހުން ވެސް ދަނީ މި މައްސަލަ ވަރަށް ގާތުން ބަލަމުން ކަމަށް، ފުލުހުންގެ ތަރުޖަމާނު އަހްމަދު ޝިފާން ވިދާޅުވި އެވެ.

ފޮރިން މިނިސްޓްރީން ބުނެފައިވަނީ، ޑާކާގައި ހުރި ދިވެހި އެމްބެސެޑަރު ވެސް މިހާރު ރައުދާގެ އާއިލާއާ އެކު ރާޖްޝާހީއަށް ގޮސްފައިވާ ކަމަށާއި، އާއިލާއިން ބޭނުންވާ ކަންކަމުގައި އެހީތެރިކަން ފޯރުކޮށްދެމުންދާނެ ކަމަށެވެ

ފުލުހުން ބުނީ ރައުދާގެ މަރާގުޅޭ ގޮތުން ތަފާތު ހަބަރުތައް ފެތުރެމުންދާއިރު ރައުދާގެ އާއިލާއަށް އެއްބާރުލުންދީ އިހްތިރާމް ކުރުމަށް ދިވެހި މީޑިއާގެ ކިބައިން އެދޭ ކަމަށެވެ.

ރައުދާ މަރުވީ ދަންޖެހިގެން ކަމަށް ޑޮކްޓަރާ ހަވާލާދީ ބަންގްލަދޭޝްގެ ފުލުހުން ބުނި ނަމަވެސް އޭނާގެ ރައްޓެހިންނާއި ކޮލެޖްގެ ބައެއް ދަރިވަރުންނާ ހަވާލާދީ ޑާކާގެ ބައެއް މީޑިއާތަކުން ބުނެފައި ވަނީ އޭނާ ޑިޕްރެޝަނެއްގައި އުޅޭކަން ނުވަތަ އެފަދަ އެއްވެސް މައްސަލައެއް އުޅޭކަން އެނގިފައި ނުވާ ކަމަށެވެ.