ރުޤްޔާގެ ނަމުގައި އަނިޔާކުރި މީހާ ޝަރީއަތް ނިމެންދެން ބަންދުކޮށްފި

ދިވެހިރާއްޖޭގެ ރަށެއްގައި ރުޤްޔާގެ ނަމުގައި އޮޅުވާލައިގެން އަންހެނަކާއި އޭނާގެ ދެ ދަރިންނަށް އަނިޔާކުރި މައްސަލައިގައި ހައްޔަރު ކުރި 24 އަހަރުގެ މީހާވެސް ޝަރީއަތް ނިމެންދެން ބަންދު ކުރުމަށް ކްރިމިނަލް ކޯޓުން އަމުރުކޮށްފިއެވެ.

މި މައްސަލައާ ގުޅިގެން ހައްޔަރު ކުރި 24 އަހަރުގެ މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިކުރުމުން، 15 ދުވަހުގެ މުއްދަތު އޭރު ޖަހާދީފައިވާއިރު، މި މައްސަލައިގައި ހިމެނޭ 39 އަހަރުގެ މީހާ ޝަރީއަތް ނިމެންދެން ބަންދު ކުރުމަށް އޭރު ވަނީ އަމުރު ކޮށްފައެވެ. އަދި 24 އަހަރުގެ މީހާގެ ބަންދަށް ދީފައިވާ 15 ދުވަސް ހަމަވުމުން އޭނާވެސް ޝަރީއަތް ނިމެންދެން ބަންދު ކުރުމަށް މިވަނީ އަމުރު ކޮށްފައެވެ.

"ރާއްޖެއެމްވީ" އަށް މައުލޫމާތު ލިބިފައިވާ ގޮތުގައި، 24 އަހަރުގެ މީހާއަކީ ރުގްޔާ ކުރަން އައި މީހާއެވެ. އަދި 39 އަހަރުގެ މީހާއަކީ މި މައްސަލައިގެ ޝިކާރައަކަށްވީ އަންހެން މީހާގެ ފިރިމީހާއެވެ.

އޮންލައިން ނޫސް "މިހާރު" ގައި ރިޕޯޓް ކޮށްފައިވާ ގޮތުން، މި މައްސަލައިގައި އަނިޔާގެ ޝިކާރައަކަށްވި އަންހެން މީހާއާއި އޭނާގެ ދަރިންނަށް އަނިޔާ ކުރުމުގައި ރުޤްޔާ ކުރާ މީހާގެ އިތުރުން، އޭނާ ފަހުން ކައިވެނިކުރި ފިރިމީހާ ވެސް ހިމެނެއެވެ. އެގޮތުން ގޭގައި ބަންދުކޮށްގެން އެތައް ޖިސްމާނީ އަދި ނަފްސާނީ އަނިޔާތަކެއް ދީފައިވާއިރު، ކުޑަކުއްޖާއަށް ޖިންސީ ގޯނާ ކޮށްފައިވާ ކަމަށް، އާއިލާއާ ހަވާލާދީ އެ ނޫހުން ރިޕޯޓްކޮށްފައިވެއެވެ.

އަނިޔާގެ ޝިކާރައަކަށްވީ އަންހެން މީހާގެ އާއިލާއިން ވަނީ މި މައްސަލައިގައި ފުލުހުންނާއި، ޖެންޑަރ މިނިސްޓްރީން އިހުމާލުވެފައިވާ ކަމަށް ތުހުމަތުކޮށްފައެވެ.

މި މައްސަލަ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން ބަލަން ފަށާފައިވާއިރު، އެ ކޮމިޓީން ވަނީ ޖެންޑަރ މިނިސްޓްރީ، ހެލްތް މިނިސްޓްރީ، އަދި އެޑިއުކޭޝަން މިނިސްޓްރީ އާއި ފުލުހުންގެ އިތުރުން، އެޗްއާރްސީއެމް ފަދަ ކަމާ ގުޅުންހުރި މުއައްސަސާތައް ހާޒިރުކޮށް މައުލޫމާތު ސާފުކޮށްފައެވެ. އަދި މި މައްސަލައިގެ ނާޒުކު ކަމާއި، މިއީ ކުޑަކުދިންނާއި ގުޅޭ ޙައްސާސް މައްސަލަ އަކަށްވުމުން، ކަމާއި ގުޅުންހުރި އިދާރާތަކަށް ކޮމިޓީއަށް އެންމެ ފުރިހަމައަށް މައުލޫމާތު ދެވޭނީ ބައްދަލުވުން ސިއްރު ކުރުމުންކަމަށް ވުމާއެކު، ކޮމިޓީ ބައްދަލުވުން ކުރިއަށް ގެންގޮސްފައިވަނީ ސިއްރު ކޮށްގެންނެވެ.