އިޓަލީ ފަހަތަށް ޖައްސާލުމަށްފަހު ރާއްޖޭގެ ޓޮޕް އިންބައުންޑް މާކެޓަކަށް ރަޝިއާ
ނޮވެމްބަރ މަހުގެ ނިޔަލަށް ރަޝިއާއިން ރާއްޖެއަށް އައިސްފައިވަނީ 46,065 ފަތުރުވެރިން
ރާއްޖޭގެ ބޯޑަރުތައް ހުޅުވާލިފަހުން ރަޝިއާއިން އަންނަ ފަތުރުވެރިންގެ އަދަދ އަންނަނީ ދުވަހުން ދުވަހަށް އިތުރުވަމުން
ބޯޑަރު ހުޅުވާލިފަހުން ރަޝިއާއިން ރާއްޖެއަށް އަންނަ ފަތުރުވެރިން އަދަދުތައް އިތުރުވެ، ރާއްޖޭގެ ޓޮޕް އިންބައުންޑް މާކެޓަކަށް ރަޝިއާ ވެއްޖެއެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން ނޮވެމްބަރު މަހުގެ ނިޔަލަށް ރަޝިއާއިން ރާއްޖެއަށް 46,065 ފަތުރުވެރިން އައިސްފައިވެއެވެ. އޭގެ ތެރޭގައި ބޯޑަރު އަލުން ހުޅުވާލިފަހުން ރާއްޖެއަށް އައި 20,264 ފަތުރުވެރިން ހިމެނެއެވެ.
މާރޗް 27 ވަނަ ދުވަހު ރާއްޖޭގެ ބޯޑަރު ބަންދުކުރުމާ ހަމައަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައިވަނީ އިޓަލީވިލާތުންނެވެ. އެއީ 45،645 ފަތުރުވެރިންނެވެ. ބޯޑަރު ހުޅުވާލިފަހުން އެ ގައުމުން ރާއްޖެއަށް ފަތުރުވެރިން އައިސްފައިނުވަނީ އެ ގައުމުގެ ކޮވިޑުގެ ހާލަތާއި ގުޅިގެން ދަތުރުފަތުރުކުރުމުގައި ހުރި ގޮންޖެހުންތަކާ ގުޅިގެންނެވެ.
ޓޫރިޒަމް މިނިސްޓްރީން އާންމުކޮށްފައިވާ އިތުރު ތަފާސްހިސާބުތަކަށް ބަލާއިރު، އަހަރުގެ މިހާތަނަށް ތިންވަނައަށް އެންމެ ގިނަ ފަތުރުވެރިން އައިސްފައިވަނީ އަވައްޓެރި އިންޑިއާއިންނެވެ. އެއީ ބޯޑަރު ހުޅުވާލިފަހުން ރާއްޖެ އައި 13,801 ފަތުރުވެރިން ހިމަނައިގެން، ޖުމްލަ 44,268 ފަތުރުވެރިންނެވެ. ހަތަރުވަނައަށް އެންމެ ގިނައިން ފަތުރުވެރިން ޒިޔާރަތްކުރީ އިނގިރޭސިވިލާތުންނެވެ. އެ ގައުމުން 38,285 ފަތުރުވެރިންވަނީ ރާއްޖެއަށް އައިސްފައެވެ.
އަހަރުގެ މިހާތަނަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައިވާ ގައުމުތަކުގެ ތެރޭގައި ޗައިނާ، ޖަރުމަން، ފްރާންސް، އެމެރިކާ، ޖަޕާން އަދި ސްވިޒަލޭންޑް ހިމެނޭއިރު، ބޯޑަރު ހުޅުވާލިފަހުން އެންމެ ގިނަ އަދަދެއްގެ ފަތުރުވެރިން ރާއްޖެ އައި ގައުމުތަކުގެ ތެރޭގައި އެމެރިކާ، ފްރާންސް އަދި ޖަރުމަނުގެ އިތުރުން ޔޫއޭއީ، ޔޫކްރެއިން، ސްޕެއިން އަދި ބްރެޒިލް ހިމެނެއެވެ.
