އިރާނުގެ އިސް ނިއުކްލިއަރ ސައިންސްވެރިޔާގެ މަރާ ގުޅިގެން ބަޔަކު ހައްޔަރުކޮށްފި
11 ޑިސެމްބަރު 2020 | ހުކުރު 03:54އިރާނުން އަންނަނީ މި ހަމަލާގެ ފަހަތުގައިވާ ބަޔަކަށް ވަރުގަދަ ހަމަލާއެއް ދޭނެކަމަށް ބުނަމުން
މުހްސިން ފަޚްރީޒާދޭގެ ޖަނާޒާގެ ތެރެއިން. އިރާނުން ބުނަނީ މިކަމުގައި ބައިވެރިވީ ފަރާތްތަކަށް ވަރުގަދަ އަދަބެއް ދޭނެކަމަށް
އިރާނުގެ އެންމެ އިސް ނިއުކްލިއަރ ސައިންސްވެރިޔާ، މުހްސިން ފަޚްރީޒާދޭގެ މަރާ ގުޅިގެން ބަޔަކު ހައްޔަރުކޮށްފައިވާކަމަށް އެ ގައުމުގެ ޕާލިމެންޓަރީ އެޑްވައިޒަރު ހުސެއިން އަމީރު އަބްދުލްހިއާން ވިދާޅުވެއްޖެއެވެ.
މި މައްސަލައިގައި ހައްޔަރުކުރި ފަރާތްތަކުގެ ވަނަވަރު ހާމަކުރަން އުޒުރުވެރިވަމުން އަމީރު ވިދާޅުވީ، ސަލާމަތީ ސަބަބުތަކަށްޓަކައި ހައްޔަރުކުރި މީހުންގެ އިތުރު ތަފްސީލެއް އަދި ހައްޔަރުކުރި މީހުންގެ އަދަދެއްވެސް ހާމަކުރެވެން ނެތްކަމަށެވެ.
ހައްޔަރުކުރި މީހުންގެ ތަފްސީލުތައް ހިއްސާނުކުރެއްވި ނަމަވެސް، މި ހަމަލާގައި އިޒްރޭލުގެ އަތެއްވާކަމަށް އިރާނުގެ ސަރުކާރާއި އަސްކަރިއްޔާއިން ކުރަމުން އަންނަ ތުހުމަތުތައް ތަކުރާރުކުރެއްވިއެވެ. އަދި މި ހަމަލާ ދިނުމުގައި އެމެރިކާ ފަދަ ގައުމެއްގެ އެހީ ލިބިފައިވާކަމަށް ބެލެވޭކަމަށް ވިދާޅުވިއެވެ.
މިދިޔަ މަހުގެ 27 ވަނަ ދުވަހު ދިން ހަމަލާއެއްގައި ފަހްރިޒާދޭ މަރާލާފައިވަނީ އޭނާ ދަތުރުކުރަމުންދިޔަ ގާފިލާއަށް ދިން ބަޑީގެ ހަމަލާއެއްގައިކަމަށް އީރާނުގެ އަސްކަރިއްޔާއިންވަނީ ހާމަކޮށްފައެވެ. އަދި އޭނާ މަރުވީ ލިބުނު މި ހަމަލާތަކާއި ގުޅިގެން ހޮސްޕިޓަލުގައި ފަރުވާދެމުން ދަނިކޮށެވެ.
ފަޚްރިޒާދަކީ އިރާނުގެ އެންމެ އިސް ނިއުކްލިއަރ ސައިންސްވެރިޔާގެ އިތުރުން އެ ގައުމުގެ ނިއުކްލިއަރ ހަތިޔާރު އުފެއްދުމަށް ފެށި މަސައްކަތުގައި އެންމެ އިސްކޮށް ހަރަކާތްތެރިވީ ފަރާތެވެ. އަދި އޭނާއަކީ އދ ގެ ސެކިއުރިޓީ ކައުންސިލުން ދަތިކުރުމުގެ ފިޔަވަޅު އަޅާފައިވާ މަދު މީހުންގެ ތެރެއިން އެކަކެވެ.
