ގަތަރު އެއާރވޭސްގެ ދަތުރުތަށް އިތުރުކޮށް، ދުވާލަކު ތިން ފްލައިޓް ރާއްޖެއަށް ބާއްވަނީ
ބުރާސްފަތި ދުވަހުން ފެށިގެން ގަތަރު އެއާރވޭސްގެ އިތުރު ދެ ފްލައިޓް ރާއްޖެއަށް އަންނާނެ
ގަތަރު އެއާރވޭސްގެ 3 ފްލައިޓް ކޮންމެ ދުވަހަކު ރާއްޖެ އަންނާނެ
ގަތަރު އެއާރވޭސްއިން ރާއްޖެއަށް ކުރާ ދަތުރުތަށް އިތުރުކޮށް، ދުވާލެއްގެ މައްޗަށް ތިން ފަލއިޓް ބޭއްވުމަށް ނިންމައިފި އެވެ.
ވެލާނާ އިންޓަނޭޝަނަލް އެއާޕޯޓް ހިންގާ މޯލްޑިވްސް އެއާޕޯޓް ކޮމްޕެނީ އިން ބުނީ ބުރާސްފަތި ދުވަހުން ފެށިގެން ގަތަރު އެއާރވޭސްގެ އިތުރު ދެ ފްލައިޓް ރާއްޖެއަށް އަންނާނެކަމަށެވެ. އެއާއިއެކު ދުވާލެއްގެ މައްޗަށް އެ އާރލައިނުން ރާއްޖެއަށް 3 ފްލައިޓް ދަތުރުކުރާނެކަމަށާއި މިކަމުގެ ސަބަބުން ރާއްޖެއަށް އަންނަ ފަތުރުވެރިންގެ އަދަދު އިތުރުވެގެންދާނެކަމަށެވެ.
ރާއްޖޭގެ ބޯޑަރު ތިން މަސް ދުވަހަށްވުރެ ގިނަ ދުވަހު ބަންދުކޮށްފައި އޮތުމަށް ފަހު އަލުން ހުޅުވާލާފައިވަނީ ގިނަ މަޝްވަރާތަކަކަށްފަހު ސަލާމަތީ ގޮތުން އަޅަންޖެހޭ ގިނަ ފިޔަވަޅުތަކެއް އަޅައިގެންނެވެ.
އެހެން ނަމަވެސް މި ހާލަތުގައިވެސް ފަތުރުވެރިންގެ މެދުގައި ރާއްޖެ އަށް އޮތް ޑިމާންޑް އިތުރުވުމާއި ގުޅިގެން ގިނަ އެއަރލައިންތަކަކުންވަނީ ރާއްޖެއަށް ކުރާ ދަތުރުތައް އިތުރުކޮށްފައެވެ. އެގޮތުން މިހާރު 19 އެއަރލައިނަކުން އަންނަނީ ރާއްޖެއަށް ދަތުރުތައް ކުރަމުންނެވެ. އަދި ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިމަހުގެ ތެރޭގައި އިތުރު ހަތް އެއަރލައިނަކުން ދަތުރުތައް ފެށުމަށްވަނީ ހަމަޖެހިފައެވެ.
ޖެނުއަރީ މަހުން ފެށިގެން މިއަހަރުގެ މިހާތަނަށް ރާއްޖެއަށް 471,699 ފަތުރުވެރިން ވަނީ އައިސްފައެވެ. ދުނިޔޭގެ ބޮޑު، ގިނަ އެއަރލައިންތަކުން ރާއްޖެއަށް ދަތުރުތައް ފަށާފައިވާއިރު، ގިނަ އެއަރލައިންތަކަކުން ވަނީ ދަތުރުތަކަށް އޮންނަ ޑިމާންޑް އިތުރުވުމުގެ ސަބަބުން އެއެއަރލައިންތަކުން ރާއްޖެއަށް ކުރާ ދަތުރުތައް އިތުރުކޮށްފަ އެވެ.
