އަމާޒަކީ މިދިޔަ ސީޒަނުގެ ޓާގެޓަށްވުރެ ރަނގަޅުކުރުން: އިންމަ
9 ޑިސެމްބަރު 2020 | ބުދަ 17:04މިދިޔަ ސީޒަނުގައި ގަދަ ހަތަރަކަށް ވާސިލުވުމަށް ޓާގެޓެއް ކަނޑައެޅި
ދަ ގްރާންޑޭ ސްޕޯޓްސް ކުލަބުގެ ކޯޗު އިސްމާޢީލް މަހަފޫޒް (އިންމަ)
މި ސީޒަނުގައި ދަ ގްރާންޑޭ ސްޕޯޓްސް ކުލަބުގެ އަމާޒަކީ މިދިޔަ ސީޒަނަށް ކަނޑައެޅި ޓާގެޓަށްވުރެ ރަނގަޅު ހިސާބަކަށް ދިއުން ކަމަށް އެ ޓީމުގެ ކޯޗު އިސްމާޢީލް މަހަފޫޒް (އިންމަ) ބުނެފިއެވެ.
ފުރަތަމަ ޑިވިޝަނުގައި މިދިޔަ ސީޒަނުގައި އަލަށް ވާދަކުރަން ފެށި ދަ ގްރާންޑޭއާއެކު އިންމަ ރަނގަޅު މަސައްކަތްތަކެއް ކުރިއިރު، ސީޒަނާ އެޓީމުން ކުރިމަތިލީ ގަދަ ހަތަރެއްގެ ތެރޭގައި އޮވެ ލީގު ނިންމާލަން އަމާޒުހިފައިގެންނެވެ. ސީޒަނުގެ ކުރީކޮޅު ދަ ގްރާންޑޭއިން މޮޅު ކުޅުމެއް ދެއްކި ނަމަވެސް، މާލީ މައްސަލަތަކާ އެހެނިހެން ކަންތައްތަކުގެ ސަބަބުން އެ ޓީމަށް ވަރަށް ބޮޑަށް އަސަރުކުރިއެވެ. އެއާއެކުވެސް ދަ ގްރާންޑޭއިން މިދިޔަ ސީޒަން ނިންމާލީ ދިރާގު ދިވެހި ޕްރިމިއާ ލީގުގެ ފަސްވަނައިގައި އޮވެގެންނެވެ.
އަދި އެފްއޭ ކަޕްގައި ދަ ގްރާންޑޭ ކުޅުނު މެޗުން ފޯކައިދޫ އަތުން މޮޅުވެފައިވަނިކޮށް އެ މުބާރާތް ކެންސަލް ކުރިއެވެ. މިދިޔަ ސީޒަނުގެ އެފްއޭ ކަޕް ކެންސަލް ކުރަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމީ ކޮވިޑް-19 އާ ގުޅިގެން މާލޭގެ ހާލަތު ގޯސްވުމާ ގުޅިގެންނެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން އިންމަ ބުނީ މިދިޔަ ސީޒަނުގައި ގަދަ ހަތަރަކަށް ވާސިލުވުމަށް ޓާގެޓެއް ކަނޑައެޅި ކަމަށާއި، އެކަން ހާސިލުނުވި ނަމަވެސް މި ސީޒަނުގައި ނުކުންނަނީ އެ ޓާގެޓަށްވުރެ ކުރިއަށްދިޔުމަށް ކަމަށެވެ. އަދި ދަ ގްރާންޑޭ ކަހަލަ އައު ޓީމަކަށް އެއީ އުނދަގޫ ޓާގެޓެއްކަން ގަބޫލުކުރާ ކަމަށާއި، އެކަމަކު އެ ޓާގެޓް ހާސިލުކުރެވޭނެ ކަމުގެ އުންމީދު އެބައޮތް ކަމަށްވެސް އިންމަ ބުންޏެވެ.
އައު ސީޒަނަށް ދަ ގްރާންޑޭއިން ކުރިމަތިލާއިރު، އެ ޓީމުގެ ސްކޮޑަށް މާ ބޮޑު ބަދަލެއް އައިސްފައެއް ނުވެއެވެ. އެކަމަކު މިދިޔަ ސީޒަނުގައި ދަ ގްރާންޑޭއަށް ކުޅުނު ގައުމީ ފުޓްބޯޅަ ޓީމުގެ ގޯލްކީޕަރު މުޙައްމަދު ފައިސަލް ކުލަބު ވެލެންސިއާއަށް ސޮއިކުރިއިރު، ދަ ގްރާންޑޭއިން ވަނީ ވެލެންސިއާގެ ގޯލްކީޕަރު މުޙައްމަދު ޖަޒްލާނުގެ ސޮއި ހޯދާފައެވެ. އަދި އައު ސީޒަނަށް ދަ ގްރާންޑޭއިން ވަނީ ބިދޭސީ ތިން ކުޅުންތެރިއަކު ގެނެސްފައެވެ.
އިންމަ ބުނީ ލީގު ފެށެން ގާތްވެފައިވާއިރު، އެ ޓީމަށް ގެނައި ބިދޭސީ ތިން ކުޅުންތެރިން އަދި ތިބީ ކަރަންޓީނުގައި ކަމަށާއި، އެކަމަކު ވަރަށް އަވަހަށް ކަރަންޓީނު ނިމި އެ ކުޅުންތެރިން ފަރިތަކުރުންތަކަށް ނުކުންނާނެ ކަމަށެވެ. އެކަމަކު ބިދޭސީ ކުޅުންތެރިން ނުލައި ޕްރީ-ސީޒަން ކުރިއަށް ގެންދަން ޖެހުމުން އެކަމުގެ ކަންބޮޑުވުން އެބައޮތް ކަމަށްވެސް އިންމަ ބުންޏެވެ.
ދިރާގު ދިވެހި ޕްރިމިއާ ލީގުގެ ކުޅުން އަންނަ އާދީއްތަ ދުވަހު ފަށާއިރު، ދަ ގްރާންޑޭ ކުޅޭ ފުރަތަމަ މެޗުގައި ހޯމަ ދުވަހު ނުކުންނާނީ ޓީސީ ސްޕޯޓްސް ކުލަބާ ދެކޮޅަށެވެ.
