ކޮރަޕްޝަން ހިންގާ މީހުންގެ މަޤާމަކަށް ޕާޓީއަކަށް ބެލުމެއް ނެތް، ފިޔަވަޅު އަޅާނަން - ޝިއުނާ

ކިތަންމެ ބޮޑު ބަލިމަޑުކަމެއްގެ ތެރޭގައިވެސް ކޮރަޕްޝަން ހިންގާ މީހުން ފަސް ނުޖެހޭކަން ފެންނަމުންދާކަމަށް އެންޓި ކޮރަޕްޝަން ކޮމިޝަން (އޭސީސީ) ގެ ރައީސް މަރިޔަމް ޝިއުނާ ވިދާޅުވެއްޖެއެވެ.

ޝިއުނާ އެހެން ވިދާޅުވީ ކޮރަޕްޝަނާ ދެކޮޅަށް ބައިނަލްއަޤުވާމީ ގޮތުން ފާހަގަކުރާ ދުވަހުގެ މުނާސަބަތުގައި ދެއްވި ޚިތާބެއްގައެއެވެ. އެގޮތުން ޝިއުނާވަނީ ކޮވިޑުގެ ބަލިމަޑުކަމުގެ މި ޙާލަތުގައިވެސް ކޮރަޕްޝަނާ ގުޅޭ މައްސަލަތައް އޭސީސީއަށް ހުށައެޅިފައިވާކަން ފާހަގަކުރައްވާފައެވެ.

ޝިއުނާ ވިދާޅުވީ، ކޮވިޑް-19 ގެ ބަލިމަޑުކަމުގެ ތެރެއިން ލިބުނު އެންމެ މުހިންމު އެއް ފިލާވަޅަކީ ކިތަންމެ ބޮޑު ނުރައްކާތެރި ބަލިމަޑުކަމެއްގައިވެސް ކޮރަޕްޝަންގެ އަމަލުތައް ހިންގާ މީހުން އެއްވެސް އިންސާނިއްޔަތު ކަމެއްނެތި ރައްޔިތުންގެ މުދަލާއި ފައިސާ ނަހަމަ ގޮތުގައި ބޭނުން ކުރަން ފަސްނުޖެހޭކަން ކަމަށެވެ. އަދި އައު އުކުޅުތައް ބޭނުންކޮށްގެންވެސް ކޮރަޕްޝަންގެ އަމަލުތައް ހިންގަމުންދާ ތަން ފެންނަމުންދާކަން ޝިއުނާ ފާހަގަކުރެއްވިއެވެ.

އޭގެ އިތުރުން، މި ބަލިމަޑުކަމުގެ ދުވަސްވަރާއި ގުޅިގެން ދައުލަތުގެ އެކި އިދާރާތަކުން ޚިދުމަތާއި ތަކެތި ހޯދުމުގައި ކޮރަޕްޝަނަށް މަގުފަހިވާގޮތަށް އަމަލުކޮށްފައިވާކަމަށް ތުހުމަތުކޮށް ޖުމްލަ 34 ޝަކުވާއެއް އޭސީސީއަށް ހުށަހެޅިފައިވާކަމަށް ޝިއުނާ ވިދާޅުވިއެވެ. އަދި ޒިންމާދާރު މަޤާމުތަކުގައި ތިއްބަވާ ފަރާތްތަކުގެ ވިސްނުމަކީ، މިފަދަ ޙާލަތެއްގެ ނަޖާއިޒު ފައިދާ ނަގައި، ނުޙައްޤު މުއްސަނދިކަމެއް ހޯދުންކަމަށް ދެކޭނަމަ، ރައްޔިތުންނަށް ޖަވާބުދާރީ ވާން ޖެހޭނެކަން ހަނދާން ކުރަންޖެހޭކަމަށް ޝިއުނާ ވިދާޅުވިއެވެ.

ޝިއުނާ ވިދާޅުވީ، އޭސީސީގެ އަމާޒަކީ ރައްޔިތުންގެ ފައިސާއިން ނަޖާއިޒު މަންފާ ހޯދާ ފަރާތްތަކާމެދު މަޤާމަށް ނުވަތަ ނިސްބަތްވާ ޕާޓީއަށް ބެލުމެއްނެތި، ރައްޔިތުންގެ ކުރިމަތީގައި ޖަވާބުދާރީ ކުރުވައި ޤާނޫނީ އޮނިގަނޑުގެ ތެރެއިން ފިޔަވަޅު އެޅުން ކަމަށެވެ.

ކޮވިޑުގެ ބަލިމަޑުކަމުގެ ތެރޭގައި ފެންމަތިވި އެންމެ ބޮޑު އެއް މައްސަލައަކީ ވެންޓިލޭޓަރުތައް ގަތުމުގައި ކޮޕަރްޝަނާއި އޮޅުވާލުން ހިމެނޭކަމަށް ތުހުމަތު ކުރެވޭ މައްސަލައެވެ. އެގޮތުން އެ މައްސަލައިގެ ތަހުޤީޤު ނިންމައި އޭސީސީން ވަނީ ދައުވާ ކުރުމަށް އެދި ޕްރޮސެކިއުޓަރ ޖެނެރަލް އޮފީސް (ޕީޖީ) އޮފީހަށް ފޮނުވައި، ދައުވާ ނުކުރުމަށް ޕީޖީން ނިންމި ނިންމުން އަލުން މުރާޖައާ ކޮށްދިނުމަށް އެދިފައެވެ.