މިއަދު ޤައުމު މިވަނީ ކޮރަޕްޝަނަށް ގެއްލިގެން ދިޔަ ފައިސާއަށް ޖެހިފައި: އޭސީސީގެ ރައީސް

ދިވެހި ޤައުމު މިއަދު މިވަނީ ކޮރަޕްޝަންގެ ސަބަބުން ދައުލަތަށް ގެއްލިގެން ދިޔަ ފައިސާއަށް ނުހަނު ބޭނުން ޖެހިފައި ކަމަށް އެންޓި ކޮރަޕްޝަން ކޮމިޝަން (އޭސީސީ) ގެ ރައީސް މަރިޔަމް ޝިއުނާ ވިދާޅުވެއްޖެއެވެ.

ކޮރަޕްޝަނާ ދެކޮޅަށް ބައިނަލްއަޤުވާމީ ފެންވަރެއްގައި މަސައްކަތްކުރާ ދުވަހުގެ މުނާސަބަތުގައި ޝިއުނާ ދެއްވި ޚިތާބުގައި ވިދާޅުވީ، ކޮރަޕްޝަނަކީ، ވަކި ދާއިރާއެއް ނުވަތަ ވަކި ފަންތިއެއް އިސްތިސްނާ ވުމެއްނެތި ތަހައްމަލް ކުރަންޖެހިފައިވާ ނުރައްކާތެރި ވަބާއެއްކަމަށެވެ. އަދި ކޮރަޕްޝަނުގެ ޢަމަލުތަކުގެ ސަބަބުން ޤައުމު ތަރައްޤީ ކުރުމަށާއި، ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދިނުމަށް ހުރަސްއެޅޭއިރު، އެކަމުގެ ސަބަބުން އެތައް ފައިސާއެއް ދައުލަތަށް ގެއްލިގެންދާކަން ޝިއުނާ ފާހަގަކުރެއްވިއެވެ.

ޝިއުނާ ވިދާޅުވީ، އިޤުތިޞާދު ހަމަމަގަށް އެޅުވުމާއި، ރައްޔިތުންގެ ފުރާނަ ސަލާމަތްކުރުމާއި، ރައްޔިތުންނަށް ބޭނުންވާ އަސާސީ ޚިދުމަތްތައް ދިނުން ފަދަ މުހިންމު އެތައްކަމަކަށް ބޮޑެތި އިންވެސްޓްމަންޓްތަކެއް މި ދަނޑިވަޅުގައިވެސް ކުރަންޖެހިފައިވާކަމަށެވެ. އެހެން ނަމަވެސް، ތަފާތު އެކި ނަންނަމުގައި ދުރާލާ ރޭވިގެން ހިންގާފައިވާ ކޮރަޕްޝަނުގެ ޢަމަލުތަކުގެ ސަބަބުން އެތައް ފައިސާއެއް ދައުލަތަށް ގެއްލިގެން ގޮސްފައިވާއިރު، ކޮންމެ މީހަކުވެސް އެފަދަ ކަންކަމާ ދުރުހެލިވެ ނަޒާހަތްތެރިވުމަށް ޝިއުނާ އިލްތިމާސް ކުރެއްވިއެވެ.

ޝިއުނާ އެހެން ވިދާޅުވެފައިވާއިރު، ދައުލަތުގެ ތެރެއިން ރޭވިގެން ހިންގާފައިވާ ކޮރަޕްޝަނާއި، ނާޖާއިޒު މަންފާ ހޯދައިދިނުން ފަދަ އެކި ޖަރީމާތަކާ ގުޅޭ ބޮޑެތި މައްސަލަތައް މިވަނީ ފެންމަތިވެގެން ގޮސްފައެވެ. އަދި އެފަދަ މައްސަލަތަކުގައި ދައުލަތަށް ލިބެންޖެހޭ އެތައް ބިލިއަން ރުފިޔާއެއް ގެއްލިފައިވާއިރު، އޭގެ ތެރެއިން ގިނަ މައްސަލަތައް އަދިވެސް ތަޙުޤީޤު ނިންމައި ދައުވާ ކުރަން ފޮނުވާފައެއް ނުވެއެވެ. އެގޮތުން އެމްއެމްޕީއާރްސީ ޙިޔާނާތުގައިވެސް އެތައް ބައެއްގެ މައްޗަށް ތުހުމަތު ކުރެވޭއިރު، އަދިވެސް އެމްއެމްޕީއާރްސީ ޙިޔާނާތާ ގުޅޭ މައްސަލަތައްވެސް އެކަށީގެންވާ ހަލުވި މިނެއްގައި ކުރިއަށް ނުދާ ކަމުގެ ޝަކުވާ ރައްޔިތުން ކުރެއެވެ.