ދިހަ މީހުންނަށް ވުރެ ގިނަ މީހުން އެކުގައި ކަރަންޓީނުވެ ތިބުމަށް ހަމަޖައްސައިގެން ފުރަބަންދު ކަރަންޓީނަށް ދާނަމަ، އަދި ކަރަންޓީނު ވެގެން ތިބޭނީ ގިނަ މީހުން އެއްކޮށް އެއް ކޮޓަރިއެއްގައި ނަމަ އަމަލު ކުރަންވީގޮތް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭއިން ހާމަ ކުރިގޮތުގައި ކަރަންޓީނުގެ މުއްދަތުގައި އެއްކޮށް ކަރަންޓީނުވެފައި (އެއީ ބެރެކްސް، ޑޯރމިޓަރީ ނުވަތަ ކޮޓަރީގައި) ތިބޭ މީހުން އެހެންމީހުންނާ ބައްދަލުކޮށްގެން ނުވާނެ ކަމަށާއި ރައްކާތެރިކަމާއެކު ޒަރޫރީ ބޭނުމަށް ބޭނުންވާ ތަކެއްޗާއި ކެއިން ބުއިމަށް ބޭނުންވާ ތަކެތި ޑެލިވަރ ކޮށްދިނުމުގެ އިންތިޒާމް ހަމަޖައްސަންވާނެ ކަމަށެވެ.

އެޗްޕީއޭއިން ހާމަކޮށްފައިވާ ގޮތުގައި ގިނަ މީހުން އެކުގައި ފުރަބަންދު ކަރަންޓީނަށް ދާ މީހުންގެ މެދުގައި ކޮވިޑް-19 ފެތުރިގެން ދިއުން ކުޑަކުރުމަށްޓަކައި، ރާއްޖެއިންބޭރުން އަންނަ މީހުން ނުވަތަ ކޮވިޑް-19ގެ ކޮމިއުނިޓީ ސްޕްރެޑް އޮތް ރާއްޖޭގެ ރަށަކުން، ކޮމިއުނިޓީ ސްޕްރެޑް ނެތް ރަށަކަށް، 10 މީހުން ނުވަތަ އެއަށްވުރެ ގިނަ މީހުން އެކުގައި ކަރަންޓީނުވާން ދާނަމަ އެއްކޮށް ތިބުމުގައި ރައްކާތެރިކަމުގެ ފިޔަވަޅުތައްއެޅުމަކީ މުހިންމު ކަމެއް ކަމަށެވެ.

އެގޮތުން އެންމެން އެއްގަޑިއެއްގައި އެއްތަނެއްގައި ތިބެގެން ކެއުން އެދެވިގެން ނުވާކަމަށާއި، އެނދުތައް ބަހައްޓާފައި ހުންނަންވާނީ ދެ އެނދުގެ ދެމެދުގައި މަދުވެގެން 3 ފޫޓުގެ ދުރުމިނުގައި ކަމަށް ހާމަކޮށްފައިވެއެވެ. އަދި ކަރަންޓީނުގައި އެއްކޮށްތިބޭ ކުޑަ ގްރޫޕަކަށް ފެންވެރޭގޮތަށް ވަކިން ފާޚާނާއެއް (މަދުވެގެން ކޮންމެ 10 މީހަކަށް 1 ފާޚާނާ) ހުންނަން ވާނެ ކަމަށް އެޗްޕީއޭއިން ބުނެފައި ވެއެވެ.

މީގެ އިތުރުން ކަރަންޓީނުވާން ގެންދާ މީހުންނާއި ހަވާލުވާނެ ސުޕަރވައިޒަރެއް ނުވަތަ ބެލެނިވެރި ފަރާތެއް ހުންނަންވާނެ ކަމަށް ބުނެފައިވެއެވެ. އަދި ކަރަންޓީނުވާން ކަނޑައަޅާފައިވާ ތަނަކީ އެޗް.ޕީ.އޭގެ މިންގަނޑުތަކާ އެއްގޮތަށް ހުރިތަނެއްތޯ ބަލާ ޗެކް ކުރަންވާނެ ކަމަށާއި ކަރަންޓީނުވެ ތިބޭއިރު، މަދު މީހުން އެއްތަނެއްގައި ތިބޭގޮތަށް އެކޮމޮޑޭޝަން ހަމަޖެއްސުމަށް ސަމާލުކަން ދޭންވާނެ ކަމަށް ބުނެފައިވެއެވެ.

ހޯމް ކަރަންޓީނަށް ދެވޭނީ މެޑިކަލް އެމަރޖެންސީއެއްގައި ޑޮކްޓަރަށް ދައްކަން މާލެ އައުމާއި ގުޅިގެން، މާލޭގައި ދިރިއުޅޭ ތަން ދޫކޮށްލަން ޖެހުމާއި ގުޅިގެން، ރަސްމީ ބޭނުމަކަށް މާލެ އައިސް ރަށަށް ދިޔުން، ވަޒީފާ ގެއްލިގެން ނުވަތަ ވަޒީފާ ރަށަށް ބަދަލުވުމާއި ގުޅިގެން ނުވަތަ ޝަރުއީ ކޯޓަކަށް ހާޒިރުވާން ޖެހުމުންނެވެ.

އެއް ތަނެއްގައި ދިހަ މީހުނަށް ވުރެ ގިނަ މީހުން ކަރަންޓީނުވެ ތިބެވެ ގޮތަށް ބަދަލު ގެނެސްފައި ވާއިރު ދާދި ފަހުން ވަނީ ކަރަންޓީނުވެ ތިބެން ޖެހެ މުއްދަތުވެސް ކުޑަކޮށްފައެވެ. އެގޮތުން އެކި މަޝްރޫއުތަކާ ގުޅިގެން 5 ދުވަހަށްވުރެ ދިގުނޫން މުއްދަތަކަށް ދާ މީހުން ފިޔަވައި އެއް ރަށުން އަނެއް ރަށަށް ދަތުރު ކުރުމުގައި ކަރަންޓީނުވާން ޖެހޭ މުއްދަތަކީ 10 ދުވަސް ކަމަށް ކަނޑައަޅައި އެކަން އިއުލާން ކޮށްފައިވަނީ މިހިނގާ ޑިސެމްބަރު މަހުގެ 2 ވަނަ ދުވަހުއެވެ.