ކުޑަކުއްޖަކު ކުރާ ކުށަކާއި ގުޅިގެން އެކުއްޖެއްގެ މައްޗަށް ކަނޑައަޅާނީ އެ ކުށަކަށް ޤާނޫނުގައި ކަނޑައަޅާފައިވާ އެންމެ ކުޑަ އަދަބުގެ ތިންބައިކުޅަ ދެބައި ކަމަށް ކުޑަކުދިންގެ އަދުލުގެ ޤާނޫނަށް އިސްލާހު ގެނެސްފި އެވެ.

ހިންނަވަރު ދާއިރާގެ މެންބަރު ޖީހާން މަޙްމޫދު ހުށަހަޅުއްވާފައިވާ މިބިލް ދިރާސާކޮށްފައިވަނީ ހިޔުމަން ރައިޓްސް އެންޑް ޖެންޑަރ ކޮމިޓީންނެވެ. ކޮމިޓީ ގެނައި އިސްލާހުތަކާއި ތަޅުމުން ގެނައި އިސްލާހުތަކާއެކު މިބިލް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 56 މެމްބަރުންގެ އިއްތިފާގުންނެވެ.

މަޖިލީހުން މިބިލް ފާސްކޮށްފައިވާ ގޮތަށް ބަލާއިރު ކުޑަކުއްޖަކީ ކުރިންވެސް ކުށެއް ސާބިތުވެފައިވާ ކުއްޖެއްނަމަ އެކުއްޖާ ކޮށްފައިވާ ކުށުގެ ބާވަތަށާއި ކުށުގެ ކުޑަބޮޑުމިނާއި ކުއްޖާގެ ކުށުގެ ރިކޯޑަށާއި ވަށައިގެންވާ އެންމެހާ ހާލަތްތަކަށް ކުއްޖާގެ އިޖުތިމާއީ ހާލަތު އަންގައިދޭ ރިޕޯޓް ރިޢާއަތްކުރުމަށްފަހު ކުއްޖާގެ މައްޗަށް ބަޔާންކުރާ އަދަދު އެ ކުށަށް ޤާނޫނުގައި ކަނޑައަޅާފައިވާ އެންމެ ކުޑަ އަދަބުގެ ފުރިހަމަ މިންވަރު ކަނޑައެޅުމުގެ އިޚުތިޔާރު ގާޟީ އަށް ލިބިގެންވެ އެވެ.

އަދި ކުށަކަށް ދެވޭ އެންމެ ކުޑަ އަދަދު ޤާނޫނުގައި ކަނޑައެޅިފައިނުވާނަމަ، އެކުއްޖެއްގެ މައްޗަށް ކަނޑައަޅަންވާނީ އެކުށަކަށް ކަނޑައަޅާފައިވާ އަދަބެއްގެ ތިން ބައިކުޅަ ދެ ބައަށްވުރެ ބޮޑުނުވާ އަދަދެކެވެ. އެފަދައިން އަދަބު ކަނޑައެޅުމުގައި އެ ކުއްޖާ ކޮށްފައިވާ ކުށުގެ ބާވަތަށާއި ކުށުގެ ކުޑަ ބޮޑުމިނާއި ކުއްޖާގެ ކުށުގެ ރިކޯޑާއި ވަށައިގެންވާ އެންމެހައި ހާލަތްތަކަށާއި ކުއްޖާގެ އިޖުތިމާއީ ހާލަތު އަންގައިދޭ ރިޕޯޓަށް ރިޢާޔަތްކުރަންވާނެ ކަމަށް ވަނީ ބުނެފައެވެ.

ކުއްޖާގެ އިޖުތުމާއީ ހާލަތު ވަޒަންކުރާ ރިޕޯޓް ހިއްސާކުރަންވާނީ ކުއްޖާ އާއި އޭނާގެ ބެލެނިވެރިންނާއި ކުއްޖާގެ މައްސަލަ ބަލާ ކޯޓު އަދި ޕްރޮސެކިއުޓަރ ޖެނެރަލްގެ އޮފީހާއި ފުލުހުންނާއި ހިޔުމަން ރައިޓްސް ކޮމިޝަނާއި ޗިލްޑްރަންސް އޮމްބަޑްސްޕަރސަންގެ އޮފީސްކަމަށް ވަނީ ކަނޑައަޅާފައެވެ.

މީގެއިތުރުން އުމުރުން 18 އަހަރުވުމަށްފަހު އުމުރުން 18 އަހަރު ވުމުގެ ކުރިން ކުއްޖަކު ކޮށްފައިވާ ޝަރީޢަތަށް ސާބިތުވެފައިވާ ކުށަކާ ގުޅިގެން މަރުގެ އަދަބު ދީގެންނުވާނެ ކަމަށްވެސް ވަނީ ބަޔާންކޮށްފައެވެ.

މީގެއިތުރުން މައްސަލައެއް ތަހުގީގުކުރަންވާނީ އަދި މައްސަލައަކާއި ގުޅިގެން ކުއްޖަކާ ސުވާލުކުރަންވާނީ ކުއްޖާގެ ބެލެނިވެރިޔާ ނުވަތަ ކުއްޖާގެ މަސްލަހަތު ހިމާޔަތްކުރާ ފަރާތުގެ ހާޒިރުގައި ކަމަށްވެސް ބިލްގައި ބުނެއެވެ. އަދި އެއިން ފަރާތެއް ހާޒިރުވެވެން ނެތް ހާލަތްތަކުގައި ޑިޕާޓުމަންޓް އޮފް ޖުވެނައިލް ޖަސްޓިސްގެ ކަމާބެހޭ އޮފިސަރެއްގެ ހާޒިރުގައި ސުވާލުކުރަންވާނެ ކަމަށް ވަނީ ބަޔާންކޮށްފައެވެ.

މީގެއިތުރުން އަތޮޅު ތެރެއިން ހުށަހަޅާ ޖުވެނައިލް ކޯޓިގެ އިޚުތިޞާޞް އާ ގުޅުންހުރި މައްސަލަތައް ކުރިޔަށް ގެންދާނީ ޖުވެނައިލް ކޯޓުގެ ފަނޑިޔާރުންނާއި ޖުވެނައިލް ކޯޓުގެ ކަމާބެހޭ ހުޅުންހުރި މުވައްޒަފުން އަތޮޅުތަކަށް ހާޒިރުވެގެންކަމަށް ވަނީ ބަޔާންކޮށްފައެވެ.

މިއިސްލާހުތައް ބިލަށް ގެނެސްފައިވަނީ ކުޑަކުދިންގެ އަދަލުގެ ޤާނޫނަކީ ރުޖޫއީ އިންސާފުގެ އަސާސްތަކާއި އެއްގޮތަށް ކުޑަކުދިންގެ މަސްލަހަތު އެންމެ އިސްކޮށްގެން ކުށްކުރާ ކުޑަކުދިން އަނބުރާ މުޖުތަމަޢުއަށް ރުޖޫޢަ ކޮށްދިނުމަށްޓަކައި އެމަގްސަދުގައި ހަދާފައިވާ ޤާނޫނަކަށް ވާއިރު ކޮވިޑް-19 އާއި ގުޅިގެން ޤާނޫނުގައި ތަސައްވުރުކުރި ވަރަށް ގިނަ ކަންކަން ބަދަލުވެފައިވާތީ އެވެ.