ގުރުއާން މުބާރާތުގެ ފައިނަލް ބުރަށް 343 ބައިވެރިން ހޮވިފައިފިން - އިސްލާމިކް މިނިސްޓަރ
8 ޑިސެމްބަރު 2020 | އަންގާރަ 08:05ފަހު ބުރު ކުރިއަށް ގެންދިއުމަށް ހަމަޖެހިފައި ވަނީ 13 ޑިސެމްބަރ 2020 ފެށިގެން 17 ޑިސެމްބަރ 2020 ގެ ނިޔަލަށް
33 ވަނަ ގުރުއާން ކިޔެވުމުގެ ގައުމީ މުބާރާތް ނިންމުމުގެ ރަސްމިއްޔާތުގެ ތެރެއިން
ކީރިތި ޤުރުއާން ބަލައިގެން ކިޔެވުމުގެ ވާޗުއަލް ޤައުމީ މުބާރާތް 2020 ގެ ފައިނަލް ބުރަށް 343 ބައިވެރިން ހޮވިފައިވާކަމަށް އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވެއްޖެއެވެ.
މިކަން ހާމަކޮށް މިނިސްޓަރ ބުދަ ދުވަހު ކުރެއްވި ޓުވީޓެއްގައި ވިދާޅުވީ، މުބާރާތުގައި ބައިވެރިވުމަށް 2593 މީހުން ވީޑިއޯ ހުށަހެޅިކަމަށެވެ. މުބާރާތް ދެ ކެޓަގަރީއަކަށް ބަހާލައިގެން ގެންދާއިރު މި ދެ ކެޓަގަރީއަކީ މުޖައްވަދުކޮށް (ދިގު ރާގަށް) އަދި ހަދަރުކޮށް (ކުރު ރާގަށް) ކިޔެވުމެވެ. ބައިވެރިންގެ ތެރޭގައި ދިގުރާގަށް 195 އަދި ކުރު ރާގަށް 2398 މީހުން ވީޑިއޯ ހުށަހަޅާފައިވާކަމަށް މިނިސްޓަރ ވަނީ ވިދާޅުވެފައެވެ.
މިނިސްޓަރ އިތުރަށް ވިދާޅުވީ، އޭގެތެރެއިން ފައިނަލް ބުރަށް ހޮވިފައިވަނީ، ދިގުރާގަށް ކިޔަވާ 34 ބައިވެރިންނާއި ކުރު ރާގަށް ކިޔަވާ 309 ބައިވެރިންނާއި އެކު ޖުމްލަ 343 ބައިވެރިންކަމަށެވެ. މީގެއިތުރުން މުބާރާތުގައި ބައިވެރިވިކަމުގެ ހަނދާނީ ލިޔުން ޕޯޓަލް މެދުވެރިކޮށް ލިބޭނެކަމަށް މިނިސްޓަރ ވަނީ ވިދާޅުވެފައެވެ.
އިސްލާމިކް މިނިސްޓްރީން ބުނީ، ފައިނަލް ބުރަށް ހޮވިފައިވާ ބައިވެރިންގެ ކިޔެވުމުގެ ރެކޯޑިންގ ހުށަހަޅުމަށް ހަމަޖެހިފައިވަނީ 13 ޑިސެމްބަރ 2020 ވާ އާދިއްތަ ދުވަހުގެ 08:00 އިން 17 ޑިސެމްބަރ 2020 ވާ ބުރާސްފަތި ދުވަހު 14:00 އަށް މުބާރާތުގެ ޕޯޓަލް މެދުވެރިކޮށް ނުވަތަ ވައިބަރ (7321728) މެދުވެރިކޮށް ކަމަށެވެ.
ކީރިތި ޤުރްއާން ބަލައިގެން ކިޔެވުމުގެ ވާޗުއަލް ޤައުމީ މުބާރާތް 2020 ގެ އޮޑިޝަން ބުރު ކުރިއަށް ގެންގޮސްފައިވަނީ 2020 ނޮވެމްބަރ 16 ވީ ހޯމަދުވަހުގެ 12:00 އިން 2020 ނޮވެމްބަރ 28 ވީ ހޮނިހިރު ދުވަހުގެ 14:00ގެ ނިޔަލަށެވެ.
