ޖުމްލަ 28 ޖަލްސާ ބާއްވާ 15 ބިލެއް ފާސްކުރުމަށްފަހު މަޖިލިސް ދެ މަސްދުވަހުގެ ޗުއްޓީއަކަށް
ރިޔާސަތުން ހުށަހަޅާފައިވާ 8 މައްސަލައަކާއި ސަރުކާރުން ހުށަހަޅާފައިވާ 8 މައްސަލައެއް ނިންމި
ރައްޔިތުންގެ މަޖިލީހުގެ މިދައުރުގެ ފަހު ޖަލްސާގެ ތެރެއިން
ރައްޔިތުންގެ މަޖިލީހުގެ މިއަހަރުގެ ފަހު ދައުރުގައި 28 ޖަލްސާ އެއް ބޭއްވުމަށްފަހު ދައުރު ނިންމާލާ ދެ މަސް ދުވަހުގެ ޗުއްޓީއަކަށް ގޮސްފިއެވެ.
ހޯމަ ދުވަހު މިއަހަރުގެ ފަހު ޖަލްސާ ބާއްވާފައިވާއިރު ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވަނީ މިދައުރުގައި މަޖިލީހުން ކުރި މުހިންމު މަސައްކަތްތަކާއި ހާސިލްކުރެވުނު ނަތީޖާތައް ހާމަކޮށްދެއްވާފައެވެ.
މިދައުރުގައި މަޖިލީހުން ނިންމާފައިވާ މަސައްކަތްތަކަކީ:
15 ބިލެއް
ރިޔާސަތުން ހުށަހަޅާފައިވާ 8 މައްސަލަ
ސަރުކާރުން ހުށަހަޅާފައިވާ 8 މައްސަލަ
އެހެނިހެން 14 ކަމެއް
ވަޒީރުންނާއި 17 ސުވާލު ކުރެއްވި
އީވާ ވިދާޅުވީ މިދައުރުގައި މަޖިލީހުން މުހިންމު ބިލްތަކެއް ފާސްކޮށްފައިވާކަމަށެވެ. އޭގެތެރޭގައި ތައުލީމުގެ ބިލާއި ފުލުހުންގެ ޚިދުމަތުގެ ބިލާއި ކުޑަކުދިންގެ އަދުލުގެ ޤާނޫނަށް ގެނައި އިސްލާހުގެ ބިލް ފާހަގަކުރެވޭ ކަމަށް އީވާ ވިދާޅުވިއެވެ. އަދި އިންތިގާލީ އިންސާފުގެ ބިލްވެސް އެއީ މިދައުރުގައި ކުރެވުނު މުހިންމު މަސައްކަތެއްކަމަށް އީވާ ވިދާޅުވިއެވެ. އަދި މިދައުރުގައި ދައުލަތުގެ ބަޖެޓް ފާސްކޮށްފައިވާކަން ވެސް އީވާ ފާހަގަކުރެއްވި އެވެ.
އީވާ ވިދާޅުވީ މިދައުރު ކޮމިޓީތަކުން އިސްކަމެއްދީގެން ކޮށްފައިވަނީ ކޮރަޕްޝަނާއި ގުޅުންހުރި ކަންކަންކަމަށެވެ.
އީވާ ވަނީ މަޖިލީހުގެ މަސައްކަތްތައް ކުރުމުގައި މަޖިލީހުގެ އިދާރާގެ މުވައްޒަފުން ކުރި މަސައްކަތްވެސް ފާހަގަކުރައްވާފައެވެ.
ދައުރުގެ ފަހު ޖަލްސާ ހޯމަ ދުވަހު ބާއްވާފައިވާއިރު ދެން މަޖިލީހުގެ ޖަލްސާތައް ފަށާނީ އަންނަ އަހަރުގެ ފެބްރުއަރީ މަހުއެވެ.
