ބައިނަލްއަގުވާމީ ޓީޓީ މުބާރާތެއް އަންނަ އަހަރު ރާއްޖޭގައި ބާއްވަނީ
7 ޑިސެމްބަރު 2020 | ހޯމަ 10:01އަންނަ އަހަރު ސައުތު އޭޝިއަން ޖޫނިއާ ކެޑޭޓް އެންޑް ހޯޕްސް މުބާރާތް ރާއްޖޭގައި ބޭއްވޭނެ
2018 ވަނަ އަހަރު ރާއްޖޭގައި ބޭއްވި ބައިނަލްއަގުވާމީ ޓީޓީ މުބާރާތުގެ ތެރެއިން ފާތިމަތު ދީމާ އަލީ
ބައިނަލްއަގުވާމީ ޓޭބަލް ޓެނިސް މުބާރާތެއް އަންނަ އަހަރު ރާއްޖޭގައި ބޭއްވުމަށް މަސައްކަތް ކުރަމުން އަންނަ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ނޭޝަނަލް މާޝަލް އާޓްސް ސެންޓަރާއި ހުޅުމާލޭ ޓީޓީ ހޯލު ހުޅުވުމަށް އާދީއްތަ ދުވަހުގެ ހަވީރު ބޭއްވި ހަފުލާގައި ވާހަކަދައްކަވަމުންނެވެ.
ރައީސް ޞާލިޙް ވިދާޅުވީ ބައިނަލްއަގުވާމީ މުބާރާތްތައް ރާއްޖޭގައި ބޭއްވުން އެއީ ސަރުކާރުގެ އަމާޒެއް ކަމަށާއި، އެގޮތުން އަންނަ އަހަރު ރާއްޖޭގައި ބައިނަލްއަގުވާމީ ޓީޓީ މުބާރާތެއް ބޭއްވުމަށް މަސައްކަތް ކުރަމުން އަންނަ ކަމަށެވެ. އަދި އެ ފުރުސަތު ލިބޭތޯ ކުޅިވަރާ ބެހޭ ވުޒާރާއިން މަސައްކަތް ކުރަމުން އަންނަ ކަމަށްވެސް ރައީސް ވިދާޅުވިއެވެ. ރައީސް ޞާލިޙް ވިދާޅުވީ އިންޑިއަން އޯޝަން އައިލޭންޑްސް ގޭމްސް (އައިއޯއައިޖީ) ގައި ދިވެހި އެތުލީޓުން ހޯދި ކާމިޔާބީ ދިވެހިން ހަނދާން ހުންނާނެ ކަމަށާއި، އެއީ ދިވެހީން ފަޚުރުވެރިވާނެ ކާމިޔާބީއެއް ކަމަށެވެ. ހާއްސަކޮށް ޓީޓީ އަދި ބެޑްމިންޓަނުން ހޯދި ކާމިޔާބީ އަކީ ފާހަގަކޮށްލެވޭނެ ކާމިޔާބީތަކެއް ކަމަށާއި، ޓީޓީ އަންހެން ޓީމުން އެ މުބާރާތުގައި ތިން ރަން މެޑަލް ހޯދި ކަމަށްވެސް ރައީސް ވިދާޅުވިއެވެ.
ރައީސް ޞާލިޙް އިތުރަށް ވިދާޅުވީ މި ހުޅުވުނު ޓީޓީ ހޯލާއެކު ރާއްޖެއަށް ރަން ވަނަތައް ހޯދައިދޭނެ އިތުރު ކުޅުންތެރިން އުފައްދާނެ ތަނަކަށް އެތަން ވެގެންދާނެ ކަމަށެވެ. މީގެ އިތުރުން މާލޭގައި ނޭޝަނަލް ޓީޓީ ސެންޓަރެއް ގާއިމުކުރުމަށް މިހާރު ބިމެއް ކަނޑައަޅާފައިވާ ކަމަށާއި، އެތަނުގެ މަސައްކަތް އަންނަ އަހަރު ފެށޭވަރު ވާނެ ކަމަށްވެސް ރައީސް ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން ޓީޓީ އެސޯސިއޭޝަނުގެ ޖެނެރެލް ސެކްރެޓަރީ އިސްމާޢީލް ސުޖާއު ވިދާޅުވީ ހުޅުމާލޭގައި ޓީޓީ ކުޅޭނެ ވަކި ތަނެއް ލިބުން އެއީ ޓީޓީ ކުޅުންތެރިންނަށް ލިބުނު ބޮޑު ހިތްހަމަޖެހުމެއް ކަމަށެވެ. އަދި އަންނަ އަހަރު ސައުތު އޭޝިއަން ޖޫނިއާ ކެޑޭޓް އެންޑް ހޯޕްސް މުބާރާތް ރާއްޖޭގައި ބޭއްވޭނެ ކަމުގެ ފެހި ސިގްނަލް ލިބިފައިވާ ކަމަށްވެސް ސުޖާއު ވިދާޅުވިއެވެ.
އަންނަ އަހަރު ރާއްޖޭގައި ބައިންލއަގުވާމީ ޓީޓީ މުބާރާތެއް ބޭއްވުމަށް މަސައްކަތް ކުރަމުން އަންނައިރު، މީގެ ކުރިން 2018 ވަނަ އަހަރު ރާއްޖޭގައި ވަނީ 24 ވަނަ ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕް ބާއްވާފައެވެ. އެ މުބާރާތުގައި ރާއްޖޭގެ ފާތިމަތު ދީމާ އަލީ ރިހި މެޑަލް ހޯދިއިރު، އައިޝަތު ރަފާ ނާޒިމް ވަނީ ލޯ މެޑަލް ހާސިލްކޮށްފައެވެ.
