އިންސާފު ލިބުން ލަސްވާކަމަށް ބުނެ އިދިކޮޅުން ހުށަހެޅި މައްސަލަ ބޭރުކޮށްލައިފި
16 މެމްބަރުން ވަނީ މިމައްސަލަ ބަލައިގަންނަން ފެންނަ ކަމަށް ވޯޓު ދެއްވާފައި
މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފް
އިންސާފުލިބުން ލަސްވަމުންދާ މައްސަލަތަކަށް އަވަސް ހައްލެއް ހޯދައިދީ ތަހުޤީޤުކުރުމާއި ޝަރުޢީ ނިޒާމުގެތެރެއަށް ނުފޫޒުފޯރުވުމެއްނެތި އިންސާފު ލިބޭނެކަމުގެ އިތުބާރު ރައްޔިތުންނަށް ހޯދައިދީ އިންސާފުގާއިމުކުރުމަށް އަވަސް ގޮތްތަކެއް ހޯދައިދީ އިންސާފު ގާއިމުކުރުމަށް ގޮވާލާ މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފް މަޖިލީހަށް ހުށަހެޅުއްވި މައްސަލަ ބޭރުކޮށްލައިފި އެވެ.
އާދަމް ޝަރީފް މިމައްސަލަ ހުށަހެޅުއްވީ އާދިއްތަ ދުވަހުގެ ހަވީރު ކުރިޔަށްދާ ޖަލްސާއަށެވެ. މަޖިލީހުގެ ގަވާއިދުގެ 179 މާއްދާގެ ދަށުން ހުށަހެޅުއްވި މިމައްސަލަ ބަލައިގަންނަން ފެނޭތޯ ނެގުނު ވޯޓުގައި ބައިވެރިވެވަޑައިގެންނެވި 16 މެމްބަރުން ވަނީ މިމައްސަލަ ބަލައިގަންނަން ފެންނަ ކަމަށް ވޯޓު ދެއްވާފައެވެ. މިމައްސަލަ ބަލައިގަންނަން ނުފެންނަކަމަށް 36 މެމްބަރުން ވޯޓު ދެއްވިއިރު ވަކިގޮތަކަށް ވޯޓު ނުދެއްވާ 3 މެމްބަރުން ތިއްބެވި އެވެ.
މައްސަލަ ހުށަހަޅުއްވަމުން އާދަމް ޝަރީފް ވިދާޅުވީ ޢަދުލު އިންޞާފު ޤާއިމުކުރުމަކީ އިސްލާމް ދީނާއި ދިވެހިރާއްޖޭގެ ޖުމުހޫރިއްޔާގެ ޤާނޫނު އަސާސީން އިންތިހާއަށް ބާރުއަޅާ ކަމެއް ކަމަށެވެ. އަދި އިންޞާފު ޤާއިމުކޮށް، ޙައްޤުތައް ރައްކާތެރި ކޮށްދިނުމަކީ ދިވެހި ދައުލަތަށް ލާޒިމުކުރާ އަދި ދީމިޤްރާތީ ވެރިކަމެއްގެ އެންމެ މުހިންމު އުންސުރުކަމު ޤަބޫލުކުރައްވާ ކަމަށް އާދަމް ޝަރީފް ވިދާޅުވި އެވެ.
މީގެ އިތުރުން އިންޞާފު ލަސްވުމަކީ އިންޞާފު ނުލިބުން ކަމަށް ގިނަ މުފައްކިރުން ދެކޭކަމަށް ވިދާޅުވި އެވެ. އެގޮތުން ކުރީގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް އިންޞާފު ލިބުން ލަސްވުމާއި، އެކަމުގެ ސަބަބުން ރައީސް ޔާމީނަށް ނުޙައްޤު އަނިޔާތައް ލިބުމާއި އަދި އެމަނިކުފާނުގެ ޙައްޤުތައް ގެއްލެމުންދާކަމަށް އާދަމް ޝަރީފް ވިދާޅުވި އެވެ.
އަދި ނުހަނު އަނިޔާވެރި ގޮތެއްގައި މަރާލާފައިވާ ރ. މީދޫ ފެންފިޔާޒުގެ މުޙައްމަދު އަނަސް އާއި ޑރ. އަފްރާޝީމް ޢަލީ އާއި ޔާމީން ރަޝީދާއި ގެއްލުވާލާފައިވާ ރިޟްވާން ޢަބްދުﷲ ގެ މަރުގެ މައްސަލަ ފަދަ އެތައް މައްސަލައަކަށް އިންޞާފު ނުލިބި ލަސްވަމުން ދާކަމަށްވެސް ވަނީ ފާހަގަ ކުރައްވާފަ އެވެ. އަދި އިންޞާފު ލިބޭނެކަމުގެ ޔަޤީންކަމެއް ނެތި، އެތައް ޢާއިލާތަކެއް މާޔޫސްވެ، އުއްމީދުގެއްލި، އަދި އެ ޢާއިލާތަކުގެ ޙައްޤުތައް ގެއްލެމުންދާކަމަށް އާދަމް ޝަރީފް ވަނީ މައްސަލަ ހުށަހަޅުއްވަމުން ވިދާޅުވެފަ އެވެ.
