ކުޅިވަރުގެ ރޮނގުން ކާމިޔާބީއަށް އުއްމީދު ކުރަންވާނީ ވަސީލަތްތައް ތަރައްގީކޮށްދީ ކުޅުންތެރިން އުފައްދައިގެން: ރައީސް
6 ޑިސެމްބަރު 2020 | އާދީއްތަ 13:17އަންހެން ކުޅުންތެރިންނާއި ފިރިހެން ކުޅުންތެރިންނާ ދެމެދު އެއްވެސް ތަފާތުކުރުމެއްނެތި، ހަމަހަމަގޮތެއްގައި ކަންކަން ފަހިކޮށްދެއްވަން ޖެހޭ
ނޭޝަނަލް މާރޝަލް އާރޓްސް ސެންޓަރ އަދި ހުޅުމާލެ ޓީޓީ ހޯލް ހުޅުވުމުގެ ރަސްމިއްޔާތުގައި ރައީސް ސޯލިހު ބައިވެރިވެވަޑައިގަންނަވަނީ
ކުޅިވަރުގެ ރޮނގުން ރަން މެޑެއްޔާއި ކާމިޔާބީއަށް އުންމީދު ކުރަންވާނީ، އެކަމަށް އެކަށޭނަ މިންވަރަށް، ވަސީލަތްތައް ތަރައްޤީކޮށްދީ ކުޅުންތެރިން އުފައްދައިގެން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ނޭޝަނަލް މާރޝަލް އާރޓްސް ސެންޓަރ އަދި ހުޅުމާލެ ޓީޓީ ހޯލް ހުޅުވުމުގެ ރަސްމިއްޔާތުގައި ވާހަކަ ފުޅުދައްކަވަމުން ރައީސް ސޯލިހު ވިދާޅުވީ ކުޅިވަރުގެ ރޮނގުން ރަން މެޑެއްޔާއި ކާމިޔާބަށް އުންމީދު ކުރަންވާނީ، އެކަމަށް އެކަށޭނަ މިންވަރަށް، ވަސީލަތްތައް ތަރައްޤީކޮށްދީ، ކުޅުންތެރިން އުފައްދައިގެން ކަމަށާއި، އެކަމުގައި އަންހެން ކުޅުންތެރިންނާއި ފިރިހެން ކުޅުންތެރިންނާ ދެމެދު އެއްވެސް ތަފާތުކުރުމެއްނެތި، ހަމަހަމަގޮތެއްގައި ކަންކަން ފަހިކޮށްދެއްވައިގެން ކަމަށެވެ.
ރައީސް ވިދާޅުވީ ވެރިކަމާ ޙަވާލުވެވަޑައިގެންނެވީ، ކުޅިވަރުގެ ދާއިރާއިން ޒުވާނުން ބިނާކޮށް، ރަނގަޅު ކާމިޔާބެއް ހޯދެވުމަށްޓަކައި، މުހިންމު ދެކަމަކަށް ވިސްނުންފުޅު ބަހައްޓަވައިގެން ކަމަށެވެ.
މީގެ އިތުރުން ބެލެނިވެރިން ދެއްވާ ފުރިހަމަ އެހީތެރިކަމާއި އެއްބާރުލެއްވުން ފާހަގަކޮށް، އެ ބޭފުޅުންނަށް ވެސް ރައީސް ވަނީ ޝުކުރު އަދާކުރައްވާފައެވެ. އަދި ކުޅިވަރުގެ ދާއިރާ ތަރައްޤީކޮށް، ރާއްޖެއަށް ރީތި ނަން ހޯދައިދިނުމަށް، ކުޅިވަރާބެހޭ ވަޒީރުގެ ހައިސިއްޔަތުން، މިނިސްޓަރ މަޚްލޫފް ކުރައްވާ މަސައްކަތްތަކުގެ އަގުވަޒަންކޮށް، ހުރިހާ ޒުވާނުންނާއި، ކުޅުންތެރިންގެ ނަމުގައިއެ މިނިސްޓަރަށް ޝުކުރު ދެންނެވި އެވެ.
ރައީސް ވަނީ ޒުވާން ކުޅުންތެރިންނަށާއި، އެ ކުޅުންތެރިންގެ ބެލެނިވެރިންނަށް، ސަރުކާރުން ތަރައްޤީކުރާ ވަސީލަތްތަކުގެ ބޭނުން އެންމެ ހެޔޮގޮތުގައި ހިފުމަށް އިލްތިމާސްކުރައްވާފަ އެވެ.
އަދި ކުޅިވަރު އެސޯސިއޭޝަންތަކުގެ އެހީތެރިކަމާއެކު، ރާއްޖެއަށް ރީތި ނަން ހޯދައިދޭން ގަދައަޅައި މަސައްކަތް ކުރުމަށް ވެސް ރައީސް އިލްތިމާސް ކުރެއްވި އެވެ. އަދި ކުޅިވަރުގައި ކާމިޔާބީއާ ހަމައަށް ގެންގޮސްދޭ އެންމެ ވަރުގަދަ ބާރަކީ، ރަނގަޅު އަޚްލާޤެއްގެ މަތީގައި ސާބިތުވެހުރުންކަން ޤަބޫލުކޮށް، ކޮންމެ ކުޅުންތެރިއަކީވެސް، ދީނީގޮތުންނާއި އަޚްލާޤީގޮތުން ރީތި ނަމޫނާއެއް ދައްކާ ޒުވާނަކަށްވުމަށް ރައީސް ގޮވާލެއްވި އެވެ.
