އެއް ކިލޯގެ މަސްތުވާތަކެއްޗާ އެކު މާލެއިން ހައްޔަރުކުރި އެންމެން ބަންދުން ދޫކޮށްލައިފި އެވެ.

މިމައްސަލައަކީ މިދިއަ ސެޕްޓެމްބަރު މަހުގެ 14 ވަނަ ދުވަހުގެރޭ 21:38 ހާއިރު، ޑްރަގް އިންޓެލިޖެންސަށް ލިބުނު މައުލޫމާތަކާ ގުޅިގެން ޑްރަގް އެންފޯސްމަންޓް ޑިޕާޓްމަންޓުން ހިންގި އޮޕަރޭޝަންގައެވެ. މި އޮޕަރޭޝަނުގައި ކޯޓު އަމުރެއްގެ ދަށުން ހެންވޭރު ގެއެއް ބަލައިފާސްކޮށް، މަސްތުވާތަކެއްޗާއެކު 7 މީހަކު ހައްޔަރުކުރި އެވެ.

މިއޮޕަރޭޝަންގައި ހައްޔަރުކޮށްފައިވަނީ 28 އަހަރުގެ ފިރިހެނަކާއި 22 އަހަރުގެ ފިރިހެނަކާއި 25 އަހަރުގެ ފިރިހެނަކާއި 27 އަހަރުގެ ފިރިހެނަކާއި 21 އަހަރުގެ ފިރިހެނަކާއި 26 އަހަރުގެ ފިރިހެނެއްގެ އިތުރުން 19 އަހަރުގެ ފިރިހެނެކެވެ.

އެ 7 މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ހެކި ނެތް ކަމަށްބުނެ، ދެމީހަކު ވަނީ މީގެކުރިން ދޫކޮށްލާފަ އެވެ. ނަމަވެސް ދެން ތިބި 5 މީހުންގެ ބަންދުގެ މުއްދަތުޖަހާފައި ވެއެވެ.

މިމައްސަލަ ނޮވެމްބަރު މަހުގެ 11 ވަނަ ދުވަހު ކްރިނިނަލް ކޯޓަށް ހުށަހެޅިފައިވާތީ، ޕްރޮސެކިއުޓަރ ޖެނެރަލް (ޕީޖީ)ގެ އޮފީހުގެ ފަރާތުން ވަނީ އެ މީހުންގެ ޝަރީއަތް ނިމެންދެން ބަންދުގައި އެދިފަ އެވެ. ނަމަވެސް 15 ދުވަހުގެ ބަންދުގެ މުއްދަތު ޖެހުމަށްފަހު، ނޮވެމްބަރު މަހުގެ 25 ވަނަ ދުވަހު މިމައްސަލަ ކްރިމިނަލް ކޯޓުގައި ތާވަލް ކުރުމަށްފަހު، އެމީހުންގެ ބަންދުގެ މުއްދަތަށް 10 އިތުރުކޮށްފައިވެ އެވެ.

މިމައްސަލައިގެ އަޑުއެހުމެއް ޑިސެމްބަރު މަހުގެ 3 ވަނަ ދުވަހުގެ 18:10 ހާއިރުން ފެށިގެން ގާތްގަނޑަކަށް ރޭގަނޑު 23:00 އާ ހަމައަށް އަޑުއެހުން ކުރިއަށް ގެންދިއުމަށްފަހު ނިންމާފައިވަނީ ޑިސެމްބަރު މަހުގެ 4 ވަނަ ދުވަހު އިތުރު އަޑުއެހުމެއް ބޭއްވައި ބަންދާމެދު ގޮތެއް ނިންމުމަށެވެ.

އެގޮތުން ޑިސެމްބަރު މަހުގެ 4 ވަނަ ދުވަހު 18:00 ހާއިރު އަޑުއެހުން ބޭއްވުމަށްފަހު ގާޒީ ނިންމާފައިވަނީ ތުހުމަތު ކުރެވޭ 5 މީހުންގެ ސަބަބުން މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ސަބަބެއް އޮތް ކަމަށް ނުފެންނާތީ، އެ 5 މީހުންގެ ބަންދުން ދޫކޮށްލުމަށެވެ.

މަސްތުވާތަކެއްޗާ ދެކޮޅަަށް ފުލުހުން ކުރަމުން އަންނަ މަސައްކަތް ނޫސްވެރިންނަށް ދެއްކުމަށްޓަކައި މިދިޔަ ހަފްތާގައި އެ އިދާރާ އިން ހާއްސަ އޮޕަރޭޝަނެއް ކުރިއަށް ގެންދިއުމަށްފަހު މިހާރު ވަނީ އެ އޮޕަރޭޝަން މެދުކަނޑާލައިފަ އެވެ.