ފަތުރުވެރިންނަށް ހިދުމަތްދިނުމަށް 36،000 އަށް ވުރެ ގިނަ އެނދު ދަނީ އޮޕަރޭޓްކުރަމުން

ރާއްޖެއަންނަ ފަތުރުވެރިންނަށް ހިިދުމަތް ދިނުމަށް 36،000 އަށް ވުރެ ގިނަ އެނދު އޮޕަރޭޓްކުރަމުން އަންނަކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީ އިން އާންމުކޮށްފައިވާ ތަފާސްހިސާބުތައް ދައްކާގޮތުން، ޑިސެމްބަރ މަހުގެ ތިން ވަނަ ދުވަހުގެ ނިޔަލަށް 395 ޓޫރިސްޓް އެކޮމަޑޭޝަން ފެސިލިޓީއަކުން 36,604 އެނދު ދަނީ އޮޕަރޭޓްކުރަމުންނެވެ. އެއީ 135 ރިސޯޓެއްގައި އޮޕަރޭޓްކުރަމުންދާ 31,104 އެނދާއި، 132 ގެސްޓް ހައުސެއްގައި އޮޕަރޭޓްކުރަމުންދާ 2,568 އެނދުގެ އިތުރުން، ފަސް ހޮޓަލެއްގައި އޮޕަރޭޓްކުރަމުންދާ 602 އެނދު އަދި 123 ސަފާރީއެއްގައި އޮޕަރޭޓްކުރަމުންދާ 2,330 އެނދެވެ.

މިހާރު 132 ގެސްޓް ހައުސެއް އޮޕަރޭޓްކުރަމުންދާއިރު، މި ގެސްޓްހައުސްތައް އޮޕަރޭޓް ކުރަމުންދަނީ އަށް އަތޮޅެއްގައެވެ. އެއީ ކ. އަތޮޅުގައި 56 ގެސްޓް ހައުސް، ނ. އަތޮޅުގައި އެއް ގެސްޓް ހައުސް، ބ. އަތޮޅުގައި ހަތަރު ގެސްޓް ހައުސް އަދި އއ. އަތޮޅުގައި 41 ގެސްޓް ހައުސްއެވެ.

މީގެއިތުރުން އދ އަތޮޅުގައި މިވަގުތު ނުވަ ގެސްޓްހައުސެއް އޮޕަރޭޓްކުރަމުންދާއިރު، ވ. އަތޮޅުގައި އޮޕަރޭޓްކުރަމުންދަނީ 14 ގެސްޓް ހައުސްއެވެ. ޏ. އަތޮޅުގައި ހަތަރު ގެސްޓް ހައުސް އަދި ސ. އަތޮޅުގައި ތިން ގެސްޓް ހައުސް މިވަގުތު އޮޕަރޭޓްކުރަމުންދެއެވެ.

ރާއްޖޭގައި އޮޕަރޭޓްކުރާ ޓޫރިސްޓް ފެސިލިޓީތަކުގެ އަދަދު އެއްދުވަހުން އަނެއް ދުވަހަށް އިތުރުވަމުން އަންނަ އިރު، ރާއްޖެއަށް އަންނަ ފަތުރުވެރިންގެ އަދަދުވެސް ދަނީ އިތުރުވަމުންނެވެ. އެގޮތުން ބޯޑަރު ހުޅުވާލިފަހުން މިހާރި 82،000 އަށް ވުރެ ގިނަ ފަތުރުވެރިން ވަނީ ރާއްޖެއައިސްފައެވެ.