އެއް ކޭސް އަނެއް ކޭސްއާ ގުޅުމުގެއް ނެތް ކޭސްތަކުގެ އަދަދު ދަށަށް!

އެއް ކޭސް އަނެއް ކޭސްއާ ގުޅުމުގެއް ނެތް ނުވަތަ އަންލިންކްޑް ކޭސްތަކުގެ އަދަދު ހަފްތާ 31 އަދި 32 ގައި ދަށަށް ގޮސްފައިވާކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ތަފާސްހިސާބުތަކުން ދައްކައިފިއެވެ.

އެޗްޕީއޭއިން އާއްމުކޮށްފައިވާ މި ތަފާސްހިސާބުގައި ނޮވެމްބަރު މަހުގެ 11ން 17ށް އަދި ނޮވެމްބަރު މަހުގެ 18ން 24ށް އަންލިންކްޑް ކޭސްތަކުގެ އަދަދު ވަނީ އެލަރޓް ލެވެލް އެކަކަށް ވުރެން ދަށަށް ގޮސްފައެވެ. އެގޮތުން މި ދެ ހަފްތާގައިވެސް ރިޕޯޓުކޮށްފައިވަނީ މިފަދަ 19 ކޭސްއެވެ.

އަންލިންކްޑް ކޭސް އެންމެ ގިނަވެފައިވަނީ ނުވަ ވަނަ ހަފްތާގައެވެ. އެއީ ޖޫން މަހުގެ 10ން 16ށެވެ. އެގޮތުން މި ހަފްތާއަށް ބަލާއިރު ޖުމްލަ 51 ކޭސް ވަނީ ރިޕޯޓުކޮށްފައެވެ. ނުރައްކާތެރިކަމުގެ ނިސްބަތަށް ބަލާނަމަ އެއީ އެލަރޓް ލެވެލް ތިނެކެވެ.

މިފަދަ ކޭސްތައް އެންމެ މަދުން ފެނިފައިވަނީ ހަތްވަނަ ހަފްތާގައެވެ. މި ހަފްތާގައި ޖުމްލަ ހަ ކޭސް ރިޕޯޓު ކޮށްފައިވާއިރު، އެއީ މެއި މަހުގެ 27ން ފެށިގެން ޖޫން މަހުގެ ދެވަނަ ދުވަހާ ހަމައަށެވެ. ހަތްވަނަ ހަފްތާގައިވެސް ވަނީ އެލަރޓް ލެވެލް އެކަކަށް ވުރެން ދަށްވެފައެވެ.

ފްލޫ ކްލިނިކްތަކަށް ބަލާއިރު، ފްލޫ ކްލިނިކްތަކުން ޕޮޒިޓިވްވާ އަދަދުތަށް މިހާރު ނުރައްކާތެރިކަމުގެ ނިސްބަތަށް ބަލާނަމަ ވަނީ އެލަރޓް ލެވެލް ދޭކަށް އަރާފައެވެ. މި އަދަދު އިތުރުވަމުން އަންނައިރު 31 ވަނަ ހަފްތާގައި ފްލޫ ކްލިނިކްތަކުން ޕޮޒިޓިވްވާ ރޭޓު ނުވަ އިންސައްތައަށް އަރާފައިވާއިރު 32 ވަނަ ހަފްތާގައި ވަނީ 11 އިންސައްތައަށް އިތުރުވެފައެވެ.

އެގޮތުން ފްލޫ ކްލިނިކްތަކުން ނިސްބަތްވާ އަދަދު އެއް އިންސައްތައާއި ނުވަ އިންސައްތައިގައި ހިފެހެއްޓިފައި އޮންނަ ނަމަ އެއީ އެލަރޓް ލެވެލް އެކެކެވެ. އަދި 10 އިންސައްތައާއި 19 އިންސައްތައާ ދެމެދުގައި އަދަދުތައް އުޅޭނަމަ އެއީ އެލަރޓް ލެވެލް ދޭކެވެ. އަދި މި އިންސައްތަ 19ށް ވުރެ އިތުރު ވެއްޖެނަމަ އެއީ ލެވެލް ތިނެކެވެ.