ބައޯއެންޓެކްގެ ވެކްސިން އިމަރޖެންސީކޮށް ބޭނުންކުރުމުގެ ހުއްދަ ބަހުރައިނުން ދީފި

ކޮވިޑް ވެކްސިންތަކުގެ ތެރެއިން އެންމެ އުއްމީދީ އެއް ވެކްސިން ކަމުގައިވާ ފައިޒާ އަދި ބައޯއެންޓެކްގެ ވެކްސިން އިމަރޖެންސީކޮށް ބޭނުންކުރުމުގެ ހުއްދަ ބަހުރައިނުން ދީފިކަމަށް ރޮއިޓަރސްއިން ހާމަކޮށްފިއެވެ.

ވެކްސިން ބޭނުންކުރުމުގެ ހުއްދަ ބަހުރައިނުން ދީފައިވަނީ ހުކުރު ދުވަހުއެވެ. މިއީ އިނގިރޭސީވީލާތަށްފަހު ބައޯއެންޓެކްގެ ވެކްސިން ބޭނުންކުރުމުގެ ހުއްދަ ދިން ގައުމެވެ. މީގެ ކުރިން އެގައުމުން ވަނީ ސިނޮފަރމްގެ ކޮވިޑް ވެކްސިން ފްރަންޓްލައިންގައި މަސައްކަތް ކުރާ ފަރާތްތައް ބޭނުންކުރުމުގެ ހުއްދަ މިދިޔަ ނޮވެމްބަރ މަހު ދީފައެވެ.

އެމެރިކާގެ ފައިޒަރ ކުންފުންޏާއި ޖަރުމަނުގެ ބަޔޯއެންޓެކް ކުންފުނި ގުޅިގެން ތައްޔާރުކުރި ކޮވިޑް-19 ވެކްސިން ބޭނުން ކުރުމުގެ ހުއްދަ އިނގިރޭސިވިލާތުން ދީފައިވަނީ މި ހަފްތާތެރޭގައެވެ. އިނގިރޭސިވިލާތުގެ ސަރުކާރުން ބުނީ، މެޑިސިންސް އެންޑް ހެލްތް ކެއަރ ޕްރޮޑަކްޓްސް ރެގިއުލޭޓަރީ އެޖެންސީގެ އިރުޝާދުގެ ދަށުން ވެކްސިން ބޭނުންކުރުމުގެ ހުއްދަ ދީފައިވާ ކަމަށެވެ. އިނގިރޭސިވިލާތުގެ ހެލްތް ސެކެރެޓަރީ މެޓް ހެންކޮކް ވިދާޅުވީ، އަންނަ ހަފްތާގެ ކުރީކޮޅުން ފެށިގެން އެ ގައުމުގައި ވެކްސިން ދޭން ފަށާނެ ކަމަށެވެ.

އިނގިރޭސިވިލާތުގައި ވެކްސިން ބޭނުން ކުރުމުގެ ހުއްދަދީފައިވާއިރު، ޔޫރަޕްގެ ގައުމުތަކުގައި ވެކްސިން ބޭނުން ކުރުމުގެ ހުއްދައަށް އެދި ޔޫރަޕިއަން މެޑިސިންސް އެޖެންސީ (އީއެމްއޭ) ގައި ފައިޒަރ އަދި ބަޔޯންޓެކުން ވަނީ އެދިފައެވެ.

އެންމެ ފަހުން އެ ކުންފުނިތަކުން ހެދި ކްލިނިކަލް ޓްރަޔަލްތަކުގެ ނަތީޖާތަކުން ދައްކާގޮތުގައި، ވެކްސިނަކީ ކޮރޯނާ ވައިރަސްއަށް 95 އިންސައްތަ ރައްކާތެރިކަން ކަށަވަރުކޮށްދޭ ވެކްސިނެކެވެ. އަދި އިނގިރޭސިވިލާތުގެ ސަރުކާރުންވެސް ވަނީ އެ ގައުމުގައި ފައިޒަރގެ ވެކްސިން ބޭނުންކުރުުމުގެ ހުއްދައަށް އެދިފައެވެ.

މީގެ އިތުރުން ފައިޒަރއިން ވަނީ އެ ކުންފުނީގެ ވެކްސިން ޑިސްޓްރިބިއުޓް ކުރުމުގެ ޓްރަޔަލްތަކެއްވެސް އެމެރިކާގެ ހަތަރު ސްޓޭޓެއްގައި ފަށާފައެވެ.