ބޯހިޔާވަހިކަމެއް ނެތި މަގުމަތީގައި ދިރިއުޅޭ ފަރާތްތަކަށް ހެދި ތަން ސިޓީ ކައުންސިލުން ބައްލަވާލައްވައިފި
4 ޑިސެމްބަރު 2020 | ހުކުރު 18:11މަގުމަތިވެފައިވާ ފަރާތްތަކުގެ މައްސަލަތައް ރިޕޯޓްކުރުމަށް ގުޅާނީ 1421 ނަމްބަރަށް
ބޯހިޔާވަހިކަމެއް ނެތި ދިރިއުޅޭ މީހުނަށް ގުޅީފަޅުގައި ހެދި ފެސިލީޓީ ސިޓީ ކައުންސިލްގެ ފަރާތުން ބައްލަވައިލައްވަނިކޮށް
މާލޭ ސިޓީގައި ބޯހިޔާވަހިކަމެއް ނެތި ދިރިއުޅޭ ފަރާތްތަކަށް ގުޅީ ފަޅުގައި ހެދި ފެސިލިޓީ މާލޭ ސިޓީ ކައުންސިލްއިން ބައްލަވާލައްވައިފި އެވެ.
މާލޭ ސިޓީ ކައުންސިލް އިން ހުކުރު ދުވަހު ކުރި ޓްވީޓެއްގައި ބުނީ ބޯހިޔާވަހިކަމެއް ނެތި މާލޭ ސިޓީގައި ދިރިއުޅޭ ފަރާތްތަކަށް ގުޅީ ފަޅުގައި ހެދި ފެސިލިޓީ ބައްލަވާލައްވާފައިވާ ކަމަށެވެ.
މަގުމަތި ވެފައިވާ ފަރާތްތައް ގުޅިފަޅަށް ބަދަލުކުރުމުގެ މަސައްކަތް ޖެންޑަރ މިނިސްޓްރީ އިން ވަނީ ފަށާފަ އެވެ. އެ ފަރާތްތައް ގުޅިފަޅަށް ބަދަލުކުރަމުން ގެންދާނީ އެ މިނިސްޓްރީ އާއި އެ ފަރާތްތަކާއި ދެމެދު ހެދޭ އެއްބަސްވުމެއްގެ ދަށުންނެވެ. މިނިސްޓްރީން ބުނީ އެ ފަރާތްތައް ގުޅިފަޅަށް ބަދަލުކުރަނީ ހާލަތު ވަޒަންކޮށް ގޮތް ނިންމުމުގެ މަރުހަލާގެ ކުރިން، އެ ފަރާތްތަކުގެ އަސާސީ ހައްގުތައް ކަށަވަރުކޮށްދިނުމުގެ ބޭނުމުގައި ކަމަށެވެ.
އެ ޕްރޮގްރާމްއާ ގުޅޭ ގޮތުން ސިޓީ ކައުންސިލުން ނެރެނު ބަޔާނެއްގައި ވަނީ، މަގުމަތިވެފައިވާ ހުރިހާ ފަރާތަކުންވެސް ޕްރޮގްރާމް ގައި އެއްބާރުލުން ދޭން އެދިފަ އެވެ.
ސަރުކާރުން އެ ފަދަ ޕްރޮގްރާމެއް އިޢުލާން ކުރުމުން ޕްރޮގްރާމްގައި ބައިވެރިނުވެ މާރުކޭޓްތަކާއި، މިސްކިތްތަކާއި، ޕާކްތަކާއި މިނޫންވެސް މިފަދަ އިޖްތިމާއި ތަންތަނުގައި ނިދައި ކައިބޮއި ހަދައި ދިރިއުޅޭ ގޮތަށް އުޅޭނަމަ އެފަދަފަރާތްތަކާ ދޭތެރޭ ގަވައިދުން ފިޔަވަޅުއަޅާނެ ކަމަށް ސިޓީ ކައުންސިލުން ބުންޏެވެ.
ވަގުތީ ހިޔާތަކަށް ބަދަލުކުރެވޭ މީހުން އެތަނުގައި ހޭދަކުރާ މުއްދަތުގައި ދާއިމީ ހިޔާވައްސެއް ހޯދުމަށް ކުރަންޖެހޭ މަސައްކަތްކުރާނެ ކަމަށް ޖެންޑަރ މިނިސްޓްރީއިން ވަނީ ބުނެފަ އެވެ. ހަމައެއާއެކު އެ ފަރާތްތަކުގެ ހުރި ހުނަރުތައް ދެނެގަނެ ލައިފް ސްކިލްސް ތަމްރީން ޕްރޮގްރާމްތަށް ހިންގުމަށް ވަނީ ހަމަޖެހިފައެވެ. މިހެން ހިންގޭ ލައިފް ސްކިލްސް ޕްރޮގްރާމްތަކުގެ އިތުރުން، ވަޒީފާގެ ފުރުޞަތު ފަހިކޮށްދިނުމަށް ކުރަންޖެހޭ މަސައްކަތްތަށް ކުރުމަށް ވަނީ ރޭވިފައި ވާކަމަށް ޖެންޑަރ މިނިސްޓްރީން ބުނެފައިވެ އެވެ.
ޖެންޑަރ މިނިސްޓްރީން ވަނީ ބޯހިޔާވަހިކަމެއްނެތި ދިރިއުޅެމުންދާ ފަރާތްތަކާ ގުޅޭ މައްސަލަތައް ރިޕޯޓްކުރުމަށް، މިނިސްޓްރީގެ ހޮޓްލައިން ނަންބަރު 1421 އަށް ގުޅުމަށް އެދިފަ އެވެ. ކޮވިޑުގެ ހާލަތާއި ގުޅިގެން މަގުމަތިވެފައިވާ މީހުންގެ މައްސަލަތައް އިތުރުވަމުން އަންނައިރު، މިފަދަ މައްސަލަތަކުގައި ސަރުކާރުން އަޅަންޖެހޭ ފިޔަވަޅުތައް އަޅާނެކަމުގެ ޔަގީންކަން ޖެންޑަރ މިނިސްޓްރީން ވަނީ ދީފަ އެވެ.
