ނޭޝަނަލް ޑްރަގް އެޖެންސީ (އެންޑީއޭ) އަށް ޗީފް އެކްޒެކްޓިވް އޮފިސަރަކު ހޯދަން ތިން ވަނަ ފަހަރަށް އިއުލާން ކޮށްފިއެވެ.

ބުރާސްފަތި ދުވަހު އެންޑީއޭ އިން ކޮށްފައިވާ އިއުލާނުގައި ބުނެފައިވާ ގޮތުގައި ސީީއީއޯ އަކަށް ކުރިމަތިލާ ފަރާތްތަކުގެ ޝަރުތުތަކުގެ ތެރޭގައި، ބިޒްނަސް މެނޭޖްމަންޓް ނުވަތަ ޕަބްލިކް އެޑްމިނިސްޓްރޭޝަން ނުވަތަ ހިއުމަން ރިސޯސް މެނޭޖްމަންޓް ނުވަތަ ސޯޝަލް ސައިންސަސްގެ ދާއިރާއިން ފުރަތަމަ ޑިގްރީ ނުވަތަ މާސްޓަރސް ޑިގްރީއެއް ހާސިލުކޮށްފައިވުމާއެކު ހިންގުމުގެ ދާއިރާގައި މަދުވެގެން ފަސް އަހަރު ދުވަހުގެ ތަޖުރިބާ ލިބިފައިވުން ހިމެނޭ ކަމަށެވެ.

އިސްލާމްދީނުގައި ހައްދެއް ކަނޑައެޅިފައިވާ ކުށެއް، ހިޔާނާތުގެ ކުށެއް، ރިޝްވަތުގެ ކުށެއް ނުވަތަ ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނު ގައި ބަޔާންކޮށްފައިވާ އެއްވެސް ކުށެއް ކޮށްފައިނުވާ މީހަކަށް ސީއީއޯ އަަށް ކުރިމަތިލާ ފަރާތްތަކުގެ ޝަރުތުތަކުގެ ތެރޭގައި ހިމެނެއެވެ.

އެންޑީއޭގެ ސީއީއޯގެ މައިގަނޑު މަސްއޫލިއްޔަތުގެ ތެރޭގައި އެ އެޖެންސީގެ ބޯޑުގެ ލަފަޔާ އިރުޝާދުގެ މަތިން އެޖެންސީ ހިންގުން އަދި ބޯޑުގެ ނިންމުންތައް ތަންފީޒުކުރުމުގެ މަސްއޫލިއްޔަތު އަދާކުރުމުގެ ޒިންމާ ހިމެނެއެވެ.

ވަޒީފާއަށް ކުރިމަތިލާ ފަރާތްތަކުން ހުށައަޅަން ޖެހޭ ލިޔުންތަކުގެ ތެރޭގައި ތައުލީމީ ސެޓުފިކެޓް ތަކުގެ ކޮޕީއާއި ޓްރާންސްކްރިޕްޓް ކޮށްފައިވާ ސެޓުފިކެޓް، ކުރިމަތިލާ ފަރާތުގެ ވަނަވަރުގެ އިތުރުން ސިވިލް ސަރވިސްގެ ވަޒީފާއެއްގައި، ދައުލަތުގެ މުއައްސަސާއެއްގައި، ސަރުކާރު ހިއްސާވާ ކުންފުންޏެއްގައި ނުވަތަ ގައުމީ ނުވަތަ ބައިނަލްއަގްވާމީ ޖަމްއިއްޔާ، ޖަމާއަތެއްގައި ވަޒީފާ އަދާކޮށްފައިވާ ނަމަ، އަދާކޮށްފައިވާ ވަޒީފާ، އަދި ވަޒީފާގެ މުއްދަތާއި، ވަޒީފާގެ މަސްއޫލިއްޔަތު ބަޔާންކޮށް އެ އޮފީހަކުން ދޫކޮށްފައިވާ ލިޔުން ހިމެނެއެވެ.

އެންޑީއޭގެ ސީއީއޯއަށް މުސާރައިގެ ގޮތުގައި 18,000 ރުފިޔާ، ފޯނު އެލަވަންސްގެ ގޮތުގައި 1,000 ރުފިޔާ، އަދި ލިވިން އެލަވަންސްގެ ގޮތުގައި 12,500 ރުފިޔާ ލިބޭނެއެވެ.

މަގާމަށް ކުރިމަތިލުމަށް ޝައުގުވެރިވާ ފަރާތްތަކުން ސިޓީ ހުށައަޅަން ޖެހެނީ ޑިސެމްބަރު މަހުގެ 14 ވަނަ ދުވަހުގެ 13:00 ކުރިންނެވެ.

އެންޑީއޭ އަށް ސީއީއޯ އެއް ހޯދަން އިއުލާން ކޮށްފައިމިވަނީ ކުރިން އެ މަގާމުގައި ހުންނެވި ހަސަން ޝަހީލް އިސްތިއުފާ ދެއްވުމާއި ގުޅިގެންނެވެ. އޭނާ އިސްތިއުފާދެއްވީ ސެޕްޓެމްބަރު މަހުގެ 27 ވަނަ ދުވަހުއެވެ. އޭގެ ފަހުން އޮކްޓޫބަރު، ނޮވެމްބަރު މަހުގެ އިތުރުން މިއިއުލާނާ އެކު ތިން ފަހަރަށް ސީއީއޯއަކު ހޯދަން ވަނީ އިއުލާން ކޮށްފައެވެ.

އެންޑީއޭގެ އިސް އޮފިޝަލަކު ''ރާއްޖެ.އެމްވީ'' އަށް ވިދާޅުވީ، އެންމެ ފުރަތަމަ ފަހަރަށް ސީއީއޯއަކުން ހޯދަން އިއުލާންކުރުމުން މާބޮޑު ތަރުހީބެއް ނުލިބޭ ކަމަށެވެ. އަދި ދެވަނަ ފަހަރު ކުރިމަތިލި ފަރާތްތަކުގެ ތެރޭގައި މަގާމަށް އެންމެ އެކަށީގެންވާ ފަރާތެއް ނެތް ކަމަށެވެ.

އެންޑީއޭގެ އަށް ދަނީ މި ފަހަކަށް އައިސް ވަރަށް ބޮޑެތި ފާޑުކިޔުންތައް އަމާޒު ވަމުންނެވެ މަސްތުވާތަކެތީގެ މައްސަލާގައި އެންމެ އެކަށީގެންވާ ވަރަށް އެންޑީއޭ އަށް މަސައްކަތް ނުކުރެވޭ ކަމަށް ބުނެ ގިނަ ބަޔަކު ދަނީ އެންޑީއޭގެ ބޯޑަށް ވަރަށް ބޮޑަށް ފާޑު ކިޔަމުންނެވެ.