އެމްއެންޑީއެފް އިން އަނެއްކާވެސް އަސްކަރީ ތަމްރީނުތަކެއް ބާއްވަނީ
4 ޑިސެމްބަރު 2020 | ހުކުރު 11:40މި ތަމްރީނުތައް ކުރިއަށްދާނީ މި މަހުގެ 6 އިން 7 އަށް އަދި 13 އިން 14 ވަނަ ދުވަހާއި ހަމައަށް
އެމްއެންޑީއެފް އިން ކުރިއަށްގެންދިޔަ \"ސްމޯލް ޓީމް އެކްސަސައިޒް 2020\" ގެ ތެރެއިން
ދިވެހި އަސްކަރިއްޔާގެ ފަރާތުން މި މަހު ހުޅުލޭގެ އިރުމަތީ ފަރާތުގައި ހަތިޔާރާއެކު ތަމްރީނުތަކެއް ކުރިއަށްގެންދިއުމަށް ނިންމައިފިއެވެ.
އެކަން ހާމަކޮށް ސަރުކާރު ގެޒެޓުގައި ބުނެފައި ވަނީ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ކުރިއަށް ގެންދާ ޚާއްޞަ ތަމްރީނުތަކެއް މި މަހުގެ 6 އިން 7 އަށް އަދި 13 އިން 14 ވަނަ ދުވަހާއި ހަމައަށް ކުރިއަށްދާނެ ކަމަށެވެ.
އެމްއެންޑީއެފް އިން ބުނީ މި ތަމްރީނުތައް ކުރިއަށްގެންދިއުމަށް ހަމަޖެހިފައި ވަނީ އެ ދުވަސްތަކުގެ ހެނދުނު 06:00 އިން 18:00 އަށް ހުޅުލޭގެ އިރުމަތީ ފަރާތުން 07 ނޯޓިކަލް މޭލު ބޭރުގައި ކަމަށެވެ. އަދި މި ތަމްރީނުތަކުގައި ހަތިޔާރެއްގެ ގޮތުން މެޝިންގަން ބޭނުންކުރުމަށް ހަމަޖެހިފައިވާ ކަމަށް ވެސް ބުނެފައިވެއެވެ.
ދިވެހި އަސްކަރިއްޔާއިން އަންނަނީ ސިފައިންގެ ގާބިލްކަން އިތުރުކުރުމާއި، ތަފާތު އެކި ތަމްރީނުތަކުގައި ދެވިފައިވާ ބައެއް ކަހަލަ ތަމްރީނުތަކުގެ އިތުރުން ހާއްސަ ހާލަތްތަކުގައި ކުރިއަށްގެންދާ އެކްސަސައިޒްތައް ވެސް ހިންގަމުންނެވެ.
އަސްކަަރިއްޔާއިން ވަނީ ފާއިތުވި ނޮވެމްބަރު މަހުގެ 16 އިން 18 އަށް ހުޅުމާލޭ ދެވަނަ ފިޔަވަހީގައި "ސްމޯލް ޓީމް އެކްސަސައިޒް"ގެ ނަމުގައި ހަތިޔާރާއެކު ތަމްރީނުތަކެއް ކުރިއަށްގެންގޮސްފައެވެ.
