ބޮރޫޝިއާ ޑޯޓްމުންޑަށް ކުޅެމުން އަންނަ ނޯވޭގެ ޒުވާން ތަރި އާލިން ބްރައުޓް ހާލަންޑަށް އަނިޔާވެ، މި އަހަރު ދެން އޭނާއަށް ނުކުޅެވޭނެ ކަމަށް އެ ކުލަބުން ބުނެފިއެވެ.

ޑޯޓްމުންޑުން ވަނީ އުމުރުން 20 އަހަރުގެ ހާލަންޑުގެ ފައިގެ ފަލަމަސްގަނޑަށް އަނިޔާވެފައިވާކަން ހާމަކޮށްފައެވެ. އަދި މި އަނިޔާއާ ގުޅިގެން ޔުއެފާ ޗެމްޕިއަންސް ލީގުގެ ގްރޫޕް އެފްގައި ބުދަ ދުވަހުގެރޭ ލާޒިއޯ އާއި ޑޯޓްމުންޑް 1-1 ން އެއްވަރުވި މެޗުގައިވެސް ހާލަންޑް ކުޅެފައެއް ނުވެއެވެ. ޑޯޓްމުންޑުން ނެރުނު ބަޔާނެއްގައި ބުނީ ހާލަންޑަށް ލިބުނު އަނިޔާއާ ގުޅިގެން އޭނާއަށް ދެން މި އަހަރު ނުކުޅެވޭނެ ކަން ޔަގީންވެފައިވާ ކަމަށާއި، އަނިޔާއިން ރަނގަޅު ހާލަންޑަށް ކުޅުމުގެ ތެރެއަށް އާދެވޭނީ އަންނަ އަހަރުގެ ޖެނުއަރީ މަހުގެ ތެރޭގައި ކަމަށެވެ.

ޑޯޓްމުންޑުގެ ކޯޗު ލޫސިއެން ފާވްރޭ ބުނީ ހާލަންޑުގެ ފައިގެ ފަލަމަސްގަނޑަށް އަނިޔާވީ އޭނާއަށް އަރާމުކުރުމުގެ ފުރުސަތު ނުދީ ގާތްގާތުގައި ގިނަ މެޗުތަކެއް ކުޅުވުމުން ކަމަށެވެ. އަދި އެންމެ ފުރަތަމަ ހާލަންޑަށް ލިބުނު އަނިޔާ ސީރިއަސް ނޫން ކަމަށް ބެލި ނަމަވެސް، މި އަހަރު ދެން އޭނާއަށް ނުކުޅެވޭނެކަން ޔަގީންވެފައިވާ ކަމަށާއި، ހާލަންޑަށް އަނިޔާވުމަކީ އެ ޓީމަށް ލިބިގެންދިޔަ ބޮޑު ގެއްލުމެއް ކަމަށްވެސް ފާވްރޭ ބުންޏެވެ.

ހާލަންޑަށް އަނިޔާވިއިރު، އޭނާ އަންނަނީ މިދިޔަ ޖެނުއަރީ މަހު ސާލްޒްބާގުން ޑޯޓްމުންޑަށް ބަދަލުވެ ތަފާތު މޮޅު ކުޅުމެއް ދައްކަމުންނެވެ. އެގޮތުން މި ސީޒަނުގައި މިހާތަނަށް ކުޅުނު 14 މެޗުގައި އޭނާ 17 ލަނޑި ޖަހާފައިވާއިރު، ހާލަންޑް ވަނީ ދެ ސީޒަން އެއްކޮށް އެ ޓީމަށް މިހާތަނަށް 33 ލަނޑު ކާމިޔާބުކޮށްދީފައެވެ. އަދި ދާދި ފަހުން ހާލަންޑް ވަނީ އިޓަލީގެ ކުޅިވަރު ނޫސް "ތުއްތޮސްޕޯޓް" އިން ހޮވާ ޔޫރަޕިއަން ގޯލްޑަން ބޯއި އެވޯޑުވެސް ހާސިލުކޮށްފައެވެ.

މި ސީޒަނުގެ ޖަރުމަން ލީގުގެ ހަތަރުވަނައިގައި ޑޯޓްމުންޑް އޮތްއިރު، އެ ޓީމުން ލީގުގައި ދެން މެޗެއް ކުޅޭނީ އަންނަ ހޮނިހިރު ދުވަހުގެރެއެވެ. އެރޭ ރަށުން ބޭރުގައި ޑޯޓްމުންޑް ނުކުންނާނީ އެއިންޓްރެކްޓް ފްރެންކްފަޓާ ދެކޮޅަށެވެ.