ޑޯޓްމުންޑް ދެވަނަ ބުރަށް

ޔުއެފާ ޗެމްޕިއަންސް ލީގުގެ ދެވަނަ ބުރުގެ ޖާގައެއް ބޮރޫޝިއާ ޑޯޓްމުންޑުން ހޯދައިފިއެވެ.

މި މުބާރާތުގެ ގަދަ 16 ގެ ޖާގައެއް ޑޯޓްމުންޑުން ކަށަވަރުކުރީ ގްރޫޕް އެފްގައި ބުދަ ދުވަހުގެރޭ ކުޅުނު މެޗުން ލާޒިއޯއާ 1-1 ން އެއްވަރުކޮށްގެންނެވެ.

ޑޯޓްމުންޑުގެ ދަނޑުގައި ކުޅުނު މި މެޗުގައި އަނިޔާގެ ސަބަބުން އެ ޓީމުގެ ޒުވާން ތަރި އާލިން ހާލަންޑް ކުޅެފައެއް ނުވެއެވެ. އެކަމަކު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ޑޯޓްމުންޑުންނެވެ. ފުރަތަމަ ހާފު ނިމެން މިނެޓަކަށް ވެފައި ވަނިކޮށް މި ލަނޑު އެ ޓީމަށް ކާމިޔާބުކޮށްދިނީ ރަފައެލް ގުއެރޭރޯއެވެ. އެކަމަކު މެޗުގެ 67 ވަނަ މިނެޓުގައި ޕެނަލްޓީއަކުން ޗީރޯ އިމޮބިލޭ ވަނީ ލާޒިއޯއަށް ނަތީޖާ އެއްވަރުކޮށްދީފައެވެ. މިއީ ލާޒިއޯގެ ސާޖެއީ މިލިންކޮވިޗް-ސަވިޗަށް ޑޯޓްމުންޑުގެ ނީކޯ ޝުލްޒް ކުރި ފައުލަކަށް ރެފުރީ ދިން ޕެނަލްޓީއެކެވެ.

މި ނަތީޖާއާއެކު ޑޯޓްމުންޑް އޮތީ ކުޅުނު ފަސް މެޗުން ލިބުނު 10 ޕޮއިންޓާއެކު ގްރޫޕް އެފްގެ އެއްވަނައިގައެވެ. ފަސް މެޗުން ނުވަ ޕޮއިންޓާއެކު ދެވަނައިގައި ލާޒިއޯ އޮތްއިރު، ފަސް މެޗުން ހަތް ޕޮއިންޓާއެކު ތިންވަނައިގައި އޮތީ ކުލަބު ބްރޫޖެވެ. އަދި ފުލުގައި އެންމެ ޕޮއިންޓަކާއެކު އޮތީ ޒެނިތެވެ.

ގްރޫޕް އެފްއިން ދެވަނަ ބުރުގެ ޖާގައެއ ޑޯޓްމުންޑް ހޯދިއިރު، ގްރޫޕް ޖީން ދެވަނަ ބުރަށް ދަތުރުކޮށްފައިވާ ބާސެލޯނާ އާއި ޔުވެންޓަސް ވަނީ އަންގާރަ ދުވަހުގެރޭ ކުޅުނު މެޗުތަކުން މޮޅުވެފައެވެ. އެގޮތުން ފެރެންސްވަރޯސް އަތުން 3-0 ން ބާސާ މޮޅުވިއިރު، ޔުވެންޓަސް މޮޅުވީ ޑީނަމޯ ކިއެވް އަތުން ހަމަ މި ނަތީޖާއިންނެވެ.