ސެންކަކޫގެ މިލްކުވެރިކަމަށް ޗައިނާއިން ދައުވާކުރަތީ ޖަޕާނުން ރުޅިގަދަވެއްޖެ

ޖަޕާނުގެ ބާރުގެ ދަށުގައި، އިރުމަތީ ޗައިނާ ކަނޑުގައި އޮންނަ ޖަޒީރާ ރަށެއް ކަމަށްވާ ''ސެންކަކޫ އައިލެންޑް'' އަށް ޗައިނާއިން ދައުވާކުރާ މައްސަލައިގައި ޖަޕާނުން ރުޅިގަދަވެއްޖެއެވެ.

މި މައްސަލަ ފެންމަތިވީ ދާދިފަހުން ޗައިނާގެ ފޮރިން މިނިސްޓަރު ވަންގީ ޔީ ޖަޕާނަށް ކުރެއްވި ދަތުރުފުޅުގައި ސެންކަކޫ އައިލެންޑާ ގުޅޭ ގޮތުން ދެއްކި ވާހަކަތަކާއި ގުޅިގެންނެވެ. އަދި އެ ދުވަހު ޖަޕާނުގެ ފޮރިން މިނިސްޓަރު ޓޮޝިމިޓްސޫ މޮޓެގީ އެއްވެސް އެއްޗެއް ވިދާޅުވެފައިނުވާތީވެ ޖަޕާނުގެ ވެރިކަންކުރާ ޕާޓީގެ ގާނޫނު ހަދާ މަޖީލިހުގެ މެމްބަރުންގެ ފާޑުކިޔުން ވަނީ އަމާޒުވެފައެވެ.

ޖަޕާނުގެ ގާނޫނު ހަދާ މަޖިލީހުގެ ކޮމިޓީގައި ވެރިކަންކުރާ ލިބަރަލް ޑިމްކޮރެޓިކް ޕާޓީގެ މެމްބަރަކު ކުރެއްވި ސުވާލަށް ޖަވާބު ދެއްވަމުން މޮޓެގީ ވިދާޅުވީ، އެއްވެސް ޝައްކެއް ނެތް ގޮތުގައި، ދުނިޔޭގެ ގާނޫނުތަކަށް ބެލިކަމުގައިވިޔަސް އަދި ތާރީހަށް ބަލާއިރުވެސް ސެންކަކޫ އައިލެންޑްސްއަކީ ޖަޕާނަށް ވާރުތަވެފައިވާ ތަނެއް ކަމަށެވެ.

މޮޓެގީ އިތުރަށް ވިދާޅުވީ، އެ ސަރަހައްދަށް ޖަޕާނުގެ ކަނޑުގެ ސަރަހައްދަށް ބޯޓުތައް ނުވަތަ ޖަޕާނުގެ އުޅަނދުތަކާއި ދިމާވާ ގޮތަށް އުޅަނދުތައް ނުފޮނުވަން ވަންގް އަރިހުން އެދިވަޑައިގެންފައިވާ ކަމަށެވެ.

ޖަޕާނުގެ ފޮރިން މިނިސްޓްރީގެ އޮފިޝަލަކާއި ހަވާލާދީ ސައުތް ޗައިނާ މޯނިން ޕޯސްޓުން ރިޕޯޓްކޮށްފައިވާ ގޮތުން ދެ ގައުމުގެ ބޮޑުވަޒީރުންގެ މެދުގައި ބޭއްވި ނޫސްވެރިންގެ ބައްދަލުވުމުގައި ވަންގް ވިދާޅުވީ ވާހަކައަށް އެއްޗެއް ވިދާޅުވުމުގެ ފުރުސަތު ޕްރޮޓްކޯލް އޮތް ގޮތުން ޖަޕާނުގެ ފޮރިން މިނިސްޓަރަށް ލިބިވަޑައިނުގެންނެވި ކަމަށެވެ. ކޮންމެ މިނިސްޓަރަކަށްވެސް ވާހަކަ ދައްކަވަން އެންމެ ފުރުސަތެއް ލިބިވަޑައިގެންނެވިއިރު އެންމެ ފުރަތަމަ ވާހަކަ ދެއްކެވީ ވަންގް އެވެ.

ވަންގް ޖަޕާނަށް ވަޑައިގެންނެވީ ދެ ދުވަހުގެ މުއްދަތަށެވެ. ވަންގް އަށް ވާހަކަ ދައްކަވަން ލިބިވަޑައިގަތް ފުރުސަތުގައި އޭނާ ވިދާޅުވީ، ޗައިނާއިން އެ ރަށުގައި އޮންނަ ޗައިނާގެ ބާރު ދިފާއު ކުރާނެ ކަމަށެވެ. އަދި ގޮތް ނޭނގެ މަސްވެރިން އުޅަނދުތަކުން ސެންކަކޫ އައިލެންޑްގެ ކަނޑުގެ ސަރަހައްދަށް ވަންނާތީވެ ޗައިނާގެ އުޅަނދުތައް ފޮނުވާނެ ކަމަށެވެ.

ޗައިނާއިން ވަނީ ފާއިތުވި އަހަރުތަކުގައި ދެކުނު ޗައިނާ ކަނޑުގެ އިތުރުން އުތުރު ޗައިނާ ކަނޑުގެ ސަރަހައްދުގައި ހަރަކާތްތައް އިތުރުކޮށްފައެވެ. އެގޮތުން އަސްކަރީ ބޭސްތައް އެޅުމާއި، ބައެއް ރަށްތަށް ހިއްކައިގެން ބައެއް އިގްތިސާދީ މަސައްކަތްތައް ފަށާފައެވެ.

މި މައްސަލައިގައި އިރުމަތީ އޭޝިއާގެ ގައުމުތަކުން ވަނީ ޗައިނާގެ އަމަލުތަކާއި ގުޅިގެން ނުރުހުންފާޅުކޮށް، ޗައިނާ ކަނޑަށް އަތްގަދަކުރުން ހުއްޓާލަން ގޮވާލާފައެވެ. ނަމަވެސް، ޗައިނާއިން ބުނަނީ އެ ގައުމުން އެހެން ބަޔެއްގެ ހައްގަކަށް އަރައިނުގަންނަކަމަށް ބުނެ، އެ ގައުމުތަކުގެ ވާހަކަތަކަށް ހޫނު ރައްދެއް ދީފައެވެ.