ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އާއި ފޯވާޑް އަލީ ފާސިރު (ސެންޓޭ) ކުލަބު ވެލެންސިއާއަށް ސޮއިކޮށްފިއެވެ.

ދަގަނޑޭ އާއި ސެންޓޭ ވެލެންސިއާއަށް ސޮއިކުރިކަން އެ ކުލަބުގެ އޮފިޝަލަކު ވަނީ "ރާއްޖެ.އެމްވީ" އަށް ކަށަވަރުކޮށްދީފައެވެ.

މިދިޔަ ސީޒަނުގައި ޓީސީ ސްޕޯޓްސް ކުލަބަށް ކުޅުނު ދަގަނޑޭ ފުޓްބޯޅަ ކެރިއަރު ފެށީ އުމުރުން 16 އަހަރުގައި 2001 ވަނަ އަހަރު ވެލެންސިއާއިންނެވެ. ވެލެންސިއާގައި ހަތަރު އަހަރު ދަގަނޑޭ ހޭދަކުރިއިރު، އޭނާ ވަނީ އެ މުއްދަތުގެ ތެރޭގައި ދިވެހި ލީގު ހަތަރު ފަހަރު، ކަޕްވިނާސް ކަޕް ދެ ފަހަރު އަދި އެފްއޭ ކަޕް އެއް ފަހަރު ކާމިޔާބުކޮށްފައެވެ. އަދި މި މުއްދަތުގައި ދަގަނޑޭ ވަނީ ވެލެންސިއާއަށް 104 ލަނޑު ޖަހައިދީފައެވެ.

އޭގެ ފަހުން ދަގަނޑޭ ވަނީ ނިއު ރޭޑިއަންޓް ސްޕޯޓްސް ކުލަބާއި، ބްރޫނާއީގެ ޑީޕީއެމްއެމް އެފްސީ އާއި، ވީބީ އައްޑޫ އެފްސީ އަދި މެލޭޝިއާގެ ޕީޑީއާރުއެމް އެފްއޭ އާއި، މާޒިޔާ ސްޕޯޓްސް އެންޑް ރެކްރިއޭޝަނާއި، ޓީސީ ސްޕޯޓްސް ކުލަބު އަދި ކުލަބު ގްރީން ސްޓްރީޓްސްއަށްވެސް ކުޅެފައެވެ. ރާއްޖޭގެ މޮޅު ކުޅުންތެރިޔާގެ މަގާމު ހަ ފަހަރެއްގެ މަތިން ހޯދާފައިވާ ދަގަނޑޭ ވަނީ ކުލަބު ކެރިއަރުގައި މިހާތަނަށް 410 ލަނޑު ޖަހާފައެވެ.

ދަގަނޑޭއާއެކު ވެލެންސިއާއަށް ސޮއިކުރި ސެންޓޭ މިދިޔަ ސީޒަނުގައި ކުޅުނީ ކުލަބު އީގަލްސްއަށެވެ. މީގެ ކުރިންވެސް ވެލެންސިއާއަށް ކުޅުނު ސެންޓޭ ވަނީ އޭވައިއެލް އާއި، ނިއު ރޭޑިއަންޓާއި، ވިކްޓަރީ ސްޕޯޓްސް ކުލަބު އަދި ޓީސީއަށްވެސް ކުޅެފައެވެ. ސެންޓޭ ވަނީ ރާއްޖޭގެ ފުޓްބޯޅަ ސީޒަނުގައި އެންމެ ގިނަ ލަނޑު ޖަހާ ކުޅުންތެރިޔާއަށް ދޭ ރަން ބޫޓު ދެ ފަހަރެއްގެ މަތިން ހޯދާފައެވެ.

ދަގަނޑޭ އާއި ސެންޓޭ ކުރިއަށް އޮތް ސީޒަނުގައި ވެލެންސިއާއަށް ކުޅެން ނިންމިއިރު، މި ދެ ކުޅުންތެރިން ވަނީ މީގެ ކުރިން ތިން އަހަރަކު އެކުގައި ނިއު ރޭޑިއަންޓަށް ކުޅެފައެވެ.

އައު ސީޒަނަށް ތައްޔާރުވުމަށް ވެލެންސިއާއިން އޮކްޓޯބަރު މަހު ފަރިތަކުރުންތައް ފެށިއިރު، މީގެ ކުރިން އެ ޓީމުން ވަނީ ގައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) އާއި، ޒުވާން މިޑްފީލްޑަރު އިސްމާއިލް ޒާން އާމިރު އަދި ހުނަރުވެރި މިޑްފީލްޑަރު އަޙްމަދު އިމާޒް (އާއްކޮ) ވެސް ގެނެސްފައެވެ. ވެލެންސިއާ މި ސީޒަނުގައި ކުޅޭނީ ކޯޗު މުޙައްމަދު އާތިފް (އާތީ) ގެ އިރުޝާދުގެ ދަށުންނެވެ.

އެއް އަހަރުގެ މެދުކެނޑުމަކަށްފަހު ވެލެންސިއާ ފުރަތަމަ ޑިވިޝަނަށް ކޮލިފައިވެފައިވާއިރު، އެ ޓީމު އަލުން ފުރަތަމަ ޑިވިޝަނުން ޖާގަ ހޯދީ މިދިޔަ ސީޒަނުގެ ދެވަނަ ޑިވިޝަން ފުޓްބޯޅަ މުބާރާތުގެ ޗެމްޕިއަންކަން ހޯދައިގެންނެވެ.

ޑިސެމްބަރު މަހުގެ 13 ވަނަ ދުވަހު ދިރާގު ދިވެހި ޕްރިމިއާ ލީގުގެ ކުޅުން ފަށާއިރު، އައު ސީޒަނުގައި ވެލެންސިއާއިން ކުޅޭ ފުރަތަމަ މެޗުގައި ޑިސެމްބަރު މަހުގެ 14 ވަނަ ދުވަހުގެރޭ ބައްދަލުކުރާނީ ކުލަބު ގްރީން ސްޓްރީޓްސްއާއެވެ.