ހިލޭ ތައުލީމް ދޭން ގޮވާލައި މުޒާހަރާކުރި ޕާކިސްތާނުގެ އެކްޓިވިސްޓަކު ހައްޔަރުކޮށްފި

ހިލޭ ތައުލީމް ފޯރުކޮށްދޭން ގޮވާލައި ދަރިވަރުންގެ ހައްގުގައި ޕާކިސްތާނުގައި އަޑު އުފުލި ދަރިވަރުންގެ ހަރަކާތެއް ކަމަށްވާ ''ހަގޫގްއަ އިޙްލާގް'' ޙަރާކަތުގެ ރައީސް އަދި އެކްޓިވިސްޓް އައްމާރު އަލީ ޖަން ހައްޔަރުކުރުމުގެ އަމުރެއް ވެރިރަށް ލާހޯރުގެ ފުލުހުން ނެރެފިއެވެ.

މިދިޔަ ހުކުރު ދުވަހު ދަރިވަރުންގެ ހައްގުގައި ކުރި އިހުތިޖާޖު ގައި ދަރިވަރުންގެ އިތުރުން ސަތޭކައެއްހާ އެކްޓިވިސްޓުން ބައިވެރިވިއެވެ. ސްޓޫޑެންޓް އެކްޝަން ކޮމިޓީ (އެސްއޭސީ) އިން ރޭވި ހިނގާލުން ފަހުން ބަދަލުވީ ރެލީ އަކަށެވެ. އެ ރެލީގައި އައްމާރު ވަނީ ޔުނިވާސިޓީގެ ދަރިވަރުންނަށް އަޑުއުފުލުމުގެ ފުރުސަތު ނުދޭތީއާ، ދަރިވަރުންނަށް އެހީވެދޭތީވެ ޓީޗަރުން ވަކިކޮށްފައިވާ ކަމަށް ބުނެފައެވެ.

ޕާކިސްތާނުގެ ޑޯންއިން ރިޕޯޓްކޮށްފައިވާ ގޮތުުން އައްމާރު ހައްޔަރު ކުރުމުގެ އަމުރު ނެރުނީ ރެލީ އަށް ފަހުއެވެ. އަދި އެ އަމުރު ނެރުނީ ޑެޕިއުޓީ ކޮމިޝަނަރު މުދައްސިރު ރިއާޒް މަލިކް އެވެ.

އަމުރުގައި ބުނެފައިވާ ގޮތުން އާއްމުންގެ ތެރޭގައި އައްމާރު އުޅުމަކީ ނުރައްކަލެއް ކަމަށެވެ. ހައްޔަރުކުރާ ދުވަހުން ފެށިގެން 30 ދުވަހުގެ މުއްދަތަށް ބަންދުގައި ބަހައްޓަން އެ އަމުރުގައި ވަނީ ބުނެފައެވެ. ރެލީ ނިމެން އުޅެނިކޮށް ފުލުހުންގެ ބޮޑު ފައުޖެއް އެ ސަރަހައްދަށް ގޮސް އައްމާރުގެ ފަހަތުން އޭނާ އަށް ފާރަލުމަށް ފަހު ހައްޔަރުކުރީ ގުލްބާގް ސަރަހައްދުގެ ޕޮލިސް ޗެކް ޕޯސްޓުންނެވެ.

އައްމާރު ހައްޔަރުކޮށްފައިވާއިރު، މިދިޔަ އަހަރު ދަރިވަރުންތަކެއް ބޭއްވި ސުލްހަވެރި އެއްވުމެއް ބާރުގެ ބޭނުންކޮށްގެން ފުލުހުން ވަނީ ރޫޅާލާފައެވެ.