ބަޖެޓަށް މެމްބަރުންގެ ޝައުގުވެރިކަން ނެތް ކަމަށް ވިދާޅުވެ މަޖިލީހުގެ ރައީސް ނުރުހުން ފާޅުކުރައްވައިފި
މި ހިނގާ ތިން ވަނަ ދައުރުވެސް ވަނީ ޑިސެމްބަރު 7 ވަނަ ދުވަހަށް އިތުރުކޮށްފަ
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
އަންނަ އަހަރަށް ލަފާ ކުރާ ދައުލަތުގެ ބަޖެޓު ދިރާސާ ކުރުމަށްފަހު އެކުލަވާލި ކޮމިޓީ ރިޕޯޓުގެ ބަހުސް ކުރިއަށްދާއިރު، މި ބަހުސަށް މެމްބަރުންގެ ޝައުގުވެރިކަން ނެތް ކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނުރުހުން ފާޅުކުރައްވައިފިއެވެ.
ރައީސް ނަޝީދު މިހެން ވިދާޅުވެފައިވަނީ މި ބަހުސްގައި ބައިވެރިވުމަށް އެދިވަޑައިގަންނަވާ މެމްބަރުންގެ އަދަދު މަދުވުމާއި ގުޅިގެންނެވެ. މީގެ ކުރިން، ބަޖެޓަށް ބަހުސް ކުރަމުން ދިޔަ ޖަލްސާތަކުގައި ވެސް މަޖިލީހުގެ ރައީސް ވަނީ މިކަން ފާހަގަކުރައްވާ ނުރުހުން ފާޅުކުރައްވާފައެވެ.
އާދީއްތަ ދުވަހުގެ މަޖިލީހުގެ ޖަލްސާގައި ބަޖެޓް ބަހުސްގައި ބައިވެރިވެވަޑައިގެންނެވީ އެންމެ 18 މެމްބަރުން ކަން ފާހަގަކުރައްވާ ރައީސް ނަޝީދު ވިދާޅުވީ ބަޖެޓް ބަހުސްގައި ބައިވެރިވުމުގެ ފުރުސަތު މިއަދުގެ 10:00 ގައި ބަންދުކުރައްވާނެ ކަމަށެވެ.
ސަރުކާރުން މަޖިލީހަށް ހުށަހެޅި 34.7 ބިލިއަން ރުފިޔާގެ ބަޖެޓަށް ބޮޑެތި ބަދަލުތަކެއް ބަޖެޓް ދިރާސާކުރި ކޮމިޓީން ގެނެސްފައިވާއިރު، މެމްބަރުން ގެންދަވަނީ ތަޅުމުގައި ވެސް އިސްލާޙުތަކެއް ހުށައަޅުއްވަމުންނެވެ. ދައުލަތުގެ ބަޖެޓުގެ ފާސްކުރުމުގެ މަސައްކަތް ނިންމުމަށްޓަކައި މި ހިނގާ ތިން ވަނަ ދައުރުވެސް ވަނީ ޑިސެމްބަރު 7 ވަނަ ދުވަހަށް އިތުރުކޮށްފައެވެ.
