ގިނަ ކޭސްތަކެއް ފެނުނަސް އެއީ އެއް ކްލަސްޓާގައި ހިމެނޭ މީހުން
ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އެޕިޑިއަމޮލަޖިސްޓް ޑރ. އިބްރާހިމް އަފްޒަލް
ރާއްޖޭގެ ބަލީގެ ހާލަތު ގޯސް ނުވާ ކަމަށާއި، ފެންނަމުންދަނީ ގިނަ މީހުން ހިމެނޭ ބޮޑު ކްލަސްޓާތައް ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އެޕިޑިއަމޮލަޖިސްޓް ޑރ. އިބްރާހިމް އަފްޒަލް ވިދާޅުވެއްޖެ އެވެ.
ހެތްލް އިމަރޖެންސީ އޮޕަރޭޝަން ސެންޓަރުގައި އާދީއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އަފްޒަލް ވިދާޅުވީ މިހާރު ކޭސްތައް ފެންނަ ޓްރެންޑަށް ބަލާ އިރު، އެކި ދުވަސްތަކުގައި ފެންނަމުން ދަނީ އެކި ވަރަށް ކޭސްތައްކަމަށާއި، އެއްބައި ދުވަސް ދުވަހު މަދު ވެލާފަ އަނެއްކާ ވެސް ގިނަވަމުންދާ ކަމަށެވެ. އަދި ދުވަހުން ދުވަހުގެ ޓްރެންޑަށްވުރެ ބޮޑަށް އެޗްއީއޯސީން ބަލަނީ ވީކްލީ ޓްރެންޑަށް ނުވަތަ މަންތްލީ ޓްރެންޑަށް ކަމަށެވެ.
ޑރ. އަފްޒަލް ވިދާޅުވީ އަމަލުކުރަން އަންގާފައި އޮންނަ ގޮތަށް އަމަލުކުރާކަމުގައިވާ ނަމަ ކަންކަން ރަނގަޅުވާނެ ކަމަށާއި، ރިސޯޓްތަކުގައި ރައްކާތެރިކަމުގެ ފިޔަވަޅުތައް އަދި ސަރުކާރުގެ މުއައްސަސާތަކުގައި ވެސް ރައްކާތެރިކަމުގެ ފިޔަވަޅުތަކަށް އަމަލުކުރުން މުހިންމު ކަމަށެވެ.
މީގެ އިތުރުން ކޮވިޑްގެ ހާލަތާއި ގުލޭ ވާހަކަތައް ނުދެއްކި ގިނަ ދުވަސްތަކެއް ވާ އިރަށް ނުވަތަ ކޭސްތައް މަދުވާއިރަށް ނަގަންޖެހޭ ރައްކާތެރިކަމުގެ ފިޔަވަޅުތަކާ މެދު ތަންކޮޅެއް ބޮޑަށް ފިކުރު ދޫކޮށްލެވޭ މަންޒަރު ފެންނަ ކަމަށެވެ. އަދި މިމަމުގެ ސަބަބުން އަނެއްކާ ވެސް ފެންނަ ކޭސްތައް އިތުރުވާ ކަމަށެވެ.
