ރާއްޖޭގެ ޝިޕިންގ އެޖެންޓުންނަށް ލައިސަންސް ދޫކުރުމަށް ހަމަޖެހިފައި ވަނީ ފަސް އަހަރުގެ މުއްދަތަށް ކަމަށް، ރާއްޖޭގެ ބަނދަރުތަކަށް އަންނަ އާގުބޯޓުފަހަރަށް ފޯރުކޮށްދޭ ޝިޕިން އެޖެންސީގެ ހިދުމަތްދިނުމުގައި އަމަލުކުރަންޖެހޭ މިންގަނޑުތަކާއި އުސޫލުތައް ބަޔާންކުރާ، ޝިޕިން އެޖެންސީއާބެހޭ ގަވާއިދު ބުނެފިއެވެ.
ޝިޕިންގ އެޖެންސީއާބެހޭ ގަވާއިދަށް އަމަލުކުރަން ފަށާ ތާރީހުން ފެށިގެން، ރާއްޖޭގެ ސަރަހައްދުގައި، މި ގަވާއިދުގެ ފަސް ވަނަ މާއްދާގެ (ހ) ބަޔާންކުރާ އެއްވެސް ހަރަކާތެއް އެއްވެސް ފަރާތަކަށް ހިންގޭނީ ލައިސަންސް ހޯދުމަށްފަހުކަމުން، މި ގަވާއިދަށް އަމަލުކުރަން ފަށާތާ 30 ދުވަހުގެ ތެރޭގައި ލައިސަންސް ހޯދަންޖެހެއެވެ. އެގޮތުން، ޝިޕިންގ އޭޖެންސީގެ ލައިސަންސް ހޯދުމަށްޓަކައި ފުރިހަމަކޮށްފައިވާ "ޝިޕިންގ އޭޖެންސީ ރަޖިސްޓްރީކުރުމަށް އެދޭ ފޯމު" މޯލްޑިވްސް ޓްރާންސްޕޯޓް އޮތޯރިޓީއަށް ހުށަހަޅަންޖެހެއެވެ.
މި ލައިސަންސް ދޫކުރެވޭނީ ވިޔަފާރި ރަޖިސްޓަރީ ކުރުމުގެ ގާނޫނުގެ 4 ވަނަ މާއްދާގެ (ހ) އަދި (ށ) ގައި ބަޔާންކޮށްފައިވާ ގޮތްތަކުން ކުރެ ގޮތަކަށް ވިޔަފާރި ކުރާ ތަނެއްގެ ގޮތުގައި، ރަޖިސްޓަރީކޮށްފައިވާ ފަރާތްތަކަށެވެ. އަދި މި ވިޔަފާރިތަކަކީ މި ލައިސަންސްގެ މުއްދަތުގެ ތެރޭގައި 100 އިންސައްތަ ދިވެހި ހިއްސާދާރުން ހިމެނޭ ކުންފުނި ނުވަތަ ޕާޓްނަރޝިޕް ކަމުގައި ވާންޖެހެއެވެ.
މި ގަވާއިދުގެ ދަށުން ޝިޕިންގ އެޖެންޓްކަން ކުރުމަށް ދޫކޮށްފައިވާ ލައިސަންސް، އެހެން އެއްވެސް ފަރާތަކަށް ބަދަލެއް ނުކުރެވޭނެކަމަށް ގަވާއިދުގައި ބުނެފައިވާއިރު، މި ގަވާއިދުގެ ދަށުން ޝިޕިންގ އެޖެންޓުކަން ކުރުމުގެ ލައިސަންސް ދޫކުރުމުގައި، ލައިސަންސް ހޯދަން އެދޭ ފަރާތަކީ ރާއްޖޭގެ ގާނޫނުތަކާއި ގަވާއިދުތަކާ ހިލާފު އަމަލެއް ކޮށްފައިވާ ފަރާތެއްނަމަ، އެފަރާތަކަށް މި ގަވާއިދުގެ ދަށުން ލައިސަންސް ދޫކުރެވޭނީ، އެ ފަރާތުން އެ މައްސަލައެއް ހައްލުކުރުމަށް ހުށަހަޅަންޖެހޭ ފަރާތަކަށް ހުށަހަޅައިގެން އެ ކަމެއް ހައްލު ކުރުމުން ކަމަށް ގަވައިދުގައިވެއެވެ.
މި ލައިސަން ފަސް އަހަރުގެ މުއްދަތަކަށް ދޫކުރާއިރު، ލައިސަންސް ދޫކުރުމަށް ހަމަޖެހިފައި ވަނީ ކަނޑައެޅިފައިވާ ފީ ދެއްކުމުންނެވެ. ލައިސަންސްގެ ފީއެއްގެ ގޮތުގައި ކަނޑައަޅާފައި ވަނީ އަހަރަކަށް 100 ރުފިޔާގެ މަގުން 500 ރުފިޔާއެވެ.
ލައިސަންސްގެ މުއްދަތު ހަމަވުމުގެ ކުރިން ލައިސަންސް އައު ކުރުމަށް މޯލްޑިވްސް ޓްރާންސްޕޯޓް އޮތޯރިޓީއަށް ހުށަހަޅަންޖެހޭނެ ކަމަށް ގަވާއިދުގައި ބުނާއިރު، ލައިސަންސްގެ މުއްދަތު ހަމަވުމުގެ ކުރިން، ލައިސަންސް އައު ކުރުމަށް ހުށަހަޅާފައި ނުވާނަމަ، ލައިސަންސް އައު ކުރެވޭނީ، ލައިސަންސް ފީ ގެ އިތުރުން، 250 ރުފިޔާ ދެއްކުމުންނެވެ.
ނޮވެމްބަރ މަހުގެ 26 ވަނަ ދުވަހު ގެޒެޓްކުރެވުނު މިގަވައިދުގެ ދަށުން އާގުބޯޓުފަހަރު ރާއްޖޭގެ ބަނދަރުތަކަށް އައުމާއި ފުރުވުމާ ބެހޭ ހުރިހާ ކަންތައްތަކެއް ހަމަޖައްސައިދޭ ފަރާތްތަކަށް މި ގަވައިދު ހިނގާނެއެވެ.
ރާއްޖޭގެ ބަނދަރުތަކަށް އައިސްގޮސްވާ އާގުބޯޓުފަހަރަށް ދެވޭ ހިދުމަތްތަކުގެ ފެންވަރު މަތިކޮށް، ޝިޕިންގ އެޖެންޓުން ޕްރޮފެޝަނަލް ފެންވަރެއްގައި ޒިންމާދާރުކަމާއެކު ހިދުމަތް ދިނުމަށް މަގުފަހިކުރުމުގެ ގޮތުން އެކުލަވާލި މިގަވައިދު މޯލްޑިވްސް ޓްރާންސްޕޯޓް އޮތޯރިޓީން ހިންގާއިރު، މި ގަވައިދަށް އިސްލާހުގެނައުމުގެ ބާރާއި ތަންފީޒުކުރުމުގެ ބާރު ލިބިގެންވަނީވެސް ޓްރާންސްޕޯޓް އޮތޯރިޓީއަށެވެ.
