ފުލުހުން ހިންގާ އޮޕަރޭޝަންގައި މީހަކު ހައްޔަރުކޮށްފި
އެނބޫ ގޯޅިން ހައްޔަރުކޮށްފައިވަނީ ފިރިހެނެއް
ހޯމަ ދުވަހުގެރޭގެ އޮޕަރޭޝަންގައި މީހަކު ފުލުހުންގެ ބެލުމުގެ ދަށަށް ގެންދަނީ
މއ. ކިނާރާ ހައުސްއަށް ފުލުހުން ވަދެ، އެ ގެ ހުންނަ ސަރަޙައްދު ބަންދުކޮށްގެން ހޯމަ ދުވަހުގެރޭ ހިންގި އޮޕަރޭޝަންގައި މީހަކު ހައްޔަރުކޮށްފިއެވެ.
މި އޮޕަރޭޝަންގައި ހައްޔަރުކޮށްފައިވަނީ ފިރިހެނެކެވެ.
މަޢުލޫމާތު ލިބިފައިވާ ގޮތުގައި އެމީހާ ހައްޔަރުކޮށްފައިވަނީ ފުލުހުން ބަލައި ފާސްކުރި މއ. ކިނާރާ ހައުސް ކުރިމަތީގައި އޮންނަ އެނބޫ ގޯޅީގައި ހުރި ބިދޭސީން ގެންނަ އޭޖެންސީއެއްގެ އޮފީހުންނެވެ. އަދި މައުލޫމާތު ލިބިފައިވާ ގޮތުގައި ފުލުހުން ފާސްކުރި މއ. ކިނާރާ ހައުސްގެ އެޕާޓްމަންޓް 5B އަކީ އެ އޮފީހުގެ ވެރިމީހާ ދިރިއުޅޭ އެޕާޓްމަންޓެވެ. ނަމަވެސް ހައްޔަރުކޮށްފައިވަނީ އެ އޮފީހުގެ ވެރިޔާކަން އަދި ކަށަވަރެއް ނުކުރެވެއެވެ.
އެ ސަރަހައްދުގައި ހުރި މީހަކު ރާއްޖެއެމްވީއަށް މައުލޫމާތު ދެމުން ބުނީ، ފުލުހުން އެމީހާ ގޮވައިގެން އެ އޮފީހަށް ވަދެ އެތަން ބަލައި ފާސްކޮށް، އެތަނުން ބައެއް ތަކެތިވެސް ގެންގޮސްފައިވާ ކަމަށެވެ.
ފުލުހުންގެ އޮފިސަރަކު ހޯމަ ދުވަހުގެރޭ ހާމަކޮށްފައިވާ ގޮތުގައި، ފުލުހުން މިހާރު ހިންގަމުންދާ އޮޕަރޭޝަންގައި، ފުލުހުންދަނީ، މާލޭގެ ބައެއް ތަންތަނަށް ވަދެ ބައެއް މީހުންވެސް ހައްޔަރުކުރަމުންނެވެ. އެ އޮފިސަރ ވިދާޅުވީ މި އޮޕަރޭޝަނާއި ގުޅޭ މައުލޫމާތު އަންގާރަ ދުވަހު އާންމުކުރުމަށް ހަމަޖެހިފައިވާ ކަމަށެވެ.
ފުލުހުން ޚާއްސަ އޮޕަރޭޝަން އެއް ފަށައި، މާލެތެރެ ބެލެހެއްޓުމަށް އިތުރު ފުލުހުން ނެރެފައިވާއިރު، މާލެތެރެ ބެލެހެއްޓުމަށް ނެރެފައިވާ އިތުރު ފުލުހުންގެ ތެރޭގައި ތަޖުރިބާ ނެތް، ފުލުހުންގެ ޚިދުމަތަށް އައު ފަރާތްތައް ގިނަކަން ފާހަގަކުރެވެއެވެ.
ފުލުހުން މިފަދަ އޮޕަރޭޝަންއެއްފަށައި، މީހުންނާއި ތަންތަން ބަލައި ފާސްކުރަން ފަށާފައި މިވަނީ މަޝްޙޫރު ބްލޮގަރ އަދި އެކްޓިވިސްޓް ޔާމީން ރަޝީދު، ހޮނިހިރު ދުވަހުގެރޭ އަނިޔާވެރި ގޮތަކަށް މަރާލާފައި ވަނިކޮށެވެ. އެ ޖަރީމާއާއި ގުޅިގެން މިހާތަނަށް އެއްވެސް މީހަކު ހައްޔަރުކުރިކަން ފުލުހުން ހާމަކޮށްފައެއް ނުވެއެވެ.
