ހައިކޯޓުގެ އިސް ފަނޑިޔާރު ކަމުގެ މަގާމަށް އެ ކޯޓުގެ ފަނޑިޔާރު ހާތިފް ހިލްމީ އައްޔަނުކުރައްވައިފިއެވެ.

ޖުޑީޝަލް ސާވިސް ކޮމިޝަން (ޖޭއެސްސީ) އިން ބުރާސްފަތި ދުވަހު އާންމުކޮށްފައިވާ ނޫސްބަޔާނެއްގައި ބުނެފައިވަނީ، ހައިކޯޓުގެ އިސްފަނޑިޔާރު ހާތިފް ހިލްމީ އައްޔަން ކުރަން އެ ކޮމިޝަނުން ނިންމައި، މާގާމުގެ ފަތްކޮޅު އެރުވުމުގެ ރަސްމިއްޔާތު ބުރާސްފަތި ދުވަހު ޖޭއެސްސީގައި ބާވާފައިވާ ކަމަށެވެ. ފަނޑިޔާރު ހާތިފް ހިލްމީއަށް ހައިކޯޓުގެ އިސްފަނޑިޔާރު ކަމުގެ މަގާމުގެ ފަތްކޮޅު އެރުވީ ޖޭއެސްސީގެ ރައީސް ހިސާން ހުސައިންއެވެ.

ހައިކޯޓުގެ އިސްފަނޑިޔާރު ކަމަށް އައްޔަނުކުރި ފަނޑިޔާރު ހާތިފް ޙިލްމީ އަކީ އިނގިރޭސިވިލާތުގެ އޮކްސްފޯޑް ބްރޫކްސް ޔުނިވަރސިޓީ އިން ބެޗްލަރ އޮފް ލޯ ހާޞިލް ކުރައްވާފައިވާ ބޭފުޅެކެވެ. އަދި މީގެ އިތުރުން ސިވިލް ކޯޓުގެ ފަނޑިޔާރެއްގެ ގޮތުގައި 10 އަހަރު އަދި ހައިކޯޓުގެ ފަނޑިޔާރު ކަމުގައި 1 އަހަރު ޚިދުމަތްކުރައްވާފައިވާ ބޭފުޅެކެވެ.

އެންމެފަހުން ހައިކޯޓުގެ އިސްފަނޑިޔާރު ކަމުގެ މަގާމުގައި ހުންނެވީ، ޝުޖާއު އުސްމާނެވެ. އޭނާ ފަނޑިޔާރު ކަމުގެ މަގާމުން ވަކިކުރަން ޖޭއެސްސީން ނިންމައި ރައްޔިތުންގެ މަޖިލީހަށް ހުށަހެޅުމުން، ޝުޖާއު ވަނީ ފަނޑިޔާރު ކަމުގެ މަގާމުން އިސްތިއުފާ ދެއްވާފައެވެ.

އޭގެ ފަހުން ޝުޖާއު ވަނީ ހެލްތް ޕޮރޮޓެކްޝަން އެޖެންސީ (އެޗްޕީއޭ) ގެ ގައިޑްލައިނާ ހިލާފަށް އިދިކޮޅު ޕީޕީއެމް-ޕީއެންސީ ކޯލިޝަނުން ބޭއްވި އެއްވުމަކާއި ގުޅިގެން ޕީއެންސީގެ ރައީސް އަބްދުއްރަހީމް ފުލުސް އޮފީހަށް ހާޒިރު ވުމަށް އެންގުމުން އަބްދުއްރަހީމްގެ ގާނޫނީ ވަކީލެއްގެ ގޮތުގައި ހަރަކާތްތެރިވެފައެވެ.

ޝުޖާއު އަކީ ފަނޑިޔާރުކަމުގެ މަގާމުގައި ހުންނަވައި ކުރީގެ ރައީސް އަބްދުﷲ ޔާމީނާއި އިދިކޮޅު ޕީޕީއެމުން ހިންގި ސިޔާސީ ހަރަކާތްތަކުގައި ބައިވެރިވެވަޑައިގެންނެވި ބޭފުޅެކެވެ. އަދި އެންމެފަހުން ބޭއްވުނު ރިޔާސީ އިންތިހާބުގައި ރައީސް ޔާމީނަށް ކެމްޕެއިން ކޮށްދިނުމަށް އިސްކޮށް ހަރަކާތްތެރިވެފައިވެއެވެ.