ޔޫއޭއީ އިން ބައެއް މުސްލިމު ގައުމުތަކަށް ވިސާ ދިނުން ހުއްޓާލައިފި
26 ނޮވެމްބަރު 2020 | ބުރާސްފަތި 04:08ވިސާ ދޫކުރަން ހުއްޓާލީ ސަލާމަތީ ކަންބޮޑުވުންތަކެއް ހުރުމުން
ޔޫއޭއީ އިމިގްރޭޝަން، އެގައުމުން ވަނީ މުސްލިމު ބައެއް ގައުމުތަކަށް ވިސާ ދިނުން ހުއްޓާލަފަ
އެކުވެރި އަރަބި އިމާރާތް (ޔޫއޭއީ) އިން، މުސްލިމު 12 ގައުމެއްގެ ރައްޔިތުންނަށް ވިސާ ދިނުން ހުއްޓާލައިފި އެވެ.
ވިސާ ދިނުން ހުއްޓާލައިފައިވާ މުސްލިމް ގައުމުތަކުގެ ތެރޭގައި ސޯމާލިއާ، ލުބްނާން، ޔަމަން، ސީރިއާ، އިރާގު، ލީބިޔާ، އަލްޖީރިއާ، ޕާކިސްތާން، ތުރުކީ، އަފްގާނިސްތާން، ތޫނިސް އަދި ތުރުކީ ހިމެނެއެވެ.
މީގެ އިތުރުން ކެންޔާއަށްވެސް ވިސާ ދިނުން ވަނީ ހުއްޓާލައިފައެވެ. މީގެ ތެރޭގައި ހިމެނެނީ ޔޫއޭއީ ގައި ވަަޒީފާ އަދާކުރާ ގައުމުތަކަށް ނިސްބަތްވާ މުސްލިމު ގައުމުތަކެވެ.
ޔޫއޭއީ އިން މި ގައުމުތަކަށް ވިސާ ދޫކުރަން ހުއްޓާލީ ކިހާ މުއްދަތަކަށް ކަން ހާމަކޮށްފައި ނުވި ނަމަވެސް، ސަބަބެއް ކަމުގައި ބުނެފައި ވަނީ އެގައުމުގެ ސަލާމަތީ ކަންކަން އިތުރަށް ހަރުދަނާ ކުރުމަށް ސަރުކާރުން ނިންމާފައިވާ ނިންމުމެއް ކަމަށެވެ.
ޔޫއޭއީ އިން މި ގަވާއިދަށް އަމަލުކުރަން ފަށާފައި މިވަނީ މިމަހުގެ 18 ވަނަ ދުވަހު އެވެ. އެއާއެކު އެގައުމުން ވަނީ ވަޒީފާ އަދާކުރުމަށާއި އެގައުމަށް ޒިޔާރަތްކުރުމަށް ދޫކުރާ ވިސާ ވެސް ދޫކުރުން ހުއްޓާލާފަ އެވެ. މިއާއެކު ޔޫއޭއީ ގައި މަސައްކަތް ކުރަމުންދާ އެހެން ގައުމުތަކުގެ މުސްލިމުންނަށް ވިސާ ހޯދުމަށާއި، އަލަށް އެގައުމަށް ދާން ބޭނުންވާ މީހުންނަށް ވަނީ އުނދަގޫތަކާއި ކުރިމަތިލާންޖެހިފަ އެވެ.
ޔޫއޭއީ އަކީ މުއްސަނދި ގައުމަކަށް ވާއިރު، އެގައުމުގައި ތަފާތު އެކި މަސައްކަތް ކުރުމުގައި ގިނަ އަދަދަކަށް ގައުމުން ބޭރު މީހުން ވަޒީފާ އަދާކުރަމުންދާކަން ފާހަގަކުރެވެ އެވެ.
