ރަޝިޔާއިން ކޮވިޑް-19 އަށް އުފެއްދި ސްޕަޓްނިކް ވީ ވެކްސިން 92 އިންސައްތަ ރަނގަޅު ކަމަށް އެ ގައުމުގެ ސަރުކާރުން ބުނެފިއެވެ.

ރަޝިޔާއިން ބުނީ ސްޕަޓްނިކް ވެކްސިންގެ ޓްރައިލްތައް ވަރަށް ކާމިޔާބު ކަމަށާއި، އެންމެ ފަހުން ކުރެވުނު ޓްރަޔަލްތައް ދައްކާގޮތުން މި ވެކްސިނަކީ 92 އިންސައްތަ ރަނގަޅު ވެކްސިނެއް ކަމަށެވެ. އަދި މި ވެކްސިންއިން ހަށިގަނޑުގެ ދިފާއީ ނިޒާމު ކޮވިޑްގެ ވައިރަސްއާއި ދެކޮޅަށް މަސައްކަތް ކުރާކަން ފާހަގަވެފައިވާ ކަމަށް އެ ގައުމުގެ ސަރުކާރުން ބުނެއެވެ.

ރަޝިޔާގެ ސްޕަޓްނިކް ވެކްސިނަކީ ރަޖިސްޓަރކޮށް ބޭނުން ކުރަން ފެށި ފުރަތަމަ ވެކްސިނެވެ. މި ވެކްސިން ރަޖިސްޓަރކޮށް ބޭނުން ކުރަން އޮގަސްޓު މަހު ފަށާފައިވާއިރު ވެކްސިންގެ ފަހު ޓްރައިލް ސެޕްޓެމްބަރު މަހުގެ ފަހުކޮޅު ވަނީ ފަށާފައެވެ. އަދި މި ވެކްސިންގެ ފަހު ޓްރައިލްގައި 40،000 އަށް ވުރެ ގިނަ މީހުން ބައިވެރިވެފައިވާ ކަމަށް ރަޝިޔާ ސަރުކާރުން ބުނެއެވެ.

ރަޝިޔާއިން އިތުރަށް ބުނީ އެ ގައުމުގެ ރައްޔިތުންނަށް ވެކްސިން ދިނުމަކީ އެންމެ ބޮޑު އަމާޒު ކަމުގައި ކަމަށާއި، އެއަށް ފަހު ދުނިޔޭގެ ގައުމުތަކަށް ވެކްސިން ދިނުމުގެ ޕްރޮޖެކްޓެއް ފަށަން ނިންމާފައިވާ ކަމަށެވެ.

ރަޝިޔާއަކީ މުޅި ދުނިޔެއިން ފަސްވަނައަށް ކޮވިޑަށް އެންމެ ގިނަ މީހުން ޕޮޒިޓިވްވެފައިވާ ގައުމެވެ. އެ ގައުމުން މިހާތަނަށް 2.138،828 މީހުން ކޮވިޑަށް ޕޮޒިޓިވްވެފައިވާއިރު، މި ބަލީގައި އެގައުމުން 37،000 އަށް ވުރެ ގިނަ މީހުން ވަނީ މަރުވެފައެވެ.