އެސްޓްރަޒެނެކާ ވެކްސިން 70 އިންސައްތަ ރައްކާތެރިކަމަށް ދައްކައިފި
24 ނޮވެމްބަރު 2020 | އަންގާރަ 10:10އިންޓަރިމް ނަތީޖާތައް ދައްކާގޮތުން ކޮރޯނާ ވައިރަސް އަށް ވެކްސިން 70.4 އިންސައްތަ ރައްކާތެރި
އެސްޓްރަޒެނެކާ އިން ބުނީ އެ ކުންފުނިން އުފައްދާ ކޮވިޑް ވެކްސިންގެ 200 މިލިއަން ޑޮޒް 2020 ވަނަ އަހަރު އުފެއްދޭނެ ކަމަށް
އެސްޓްރަޒެނެކާ އާއި އޮކްސްފޯޑް ޔުނިވަރސިޓީ ގުޅިގެން ކޮވިޑް-19 އަށް އުފައްދާ ވެކްސިން 70 އިންސައްތަ ކާމިޔާބު ކަމަށް ޓެސްޓްތަކުން ދައްކައިފިއެވެ.
އެސްޓްރަޒެނެކާ އިން ބުނީ އެ ކުންފުނިން އިނގިރޭސިވިލާތާއި ބްރެޒިލްގައި ކުރިއަށް ގެންދިޔަ ކްލިނިކަލް ޓްރަޔަލްގެ ފޭސް ތިނެއްގެ އިންޓަރިމް ނަތީޖާތައް ދައްކާ ގޮތުން ކޮރޯނާ ވައިރަސްއިން ދިފާއު ކުރުމުގައި ވެކްސިން 70.4 އިންސައްތަ ކާމިޔާބު ކަމަށް ދައްކައެވެ.
އެސްޓްރަޒެނެކާގެ ވެކްސިންގެ ނަތީޖާ ރަނގަޅުވި ނަމަވެސް އެހެން ކުންފުނިތަކުން އުފައްދާ ވެކްސިންތަކަށްވުރެ އެސްޓްރަޒެެނެކާގެ ވެކްސިންގެ އަސަރު ކުރާވަރު ދަށެވެ. އެގޮތުން ދާދި ފަހުން މޮޑަރނާ އަދި ފައިޒަރ އާއި ބައޯންޓެކް އިން އުފެއްދި ވެކްސިންތައް 95 އިންސައްތަ ރައްކާތެރި ކަމަށް އެ ކުންފުނިތަކުން ވަނީ ހާމަކޮށްފައެވެ.
އެސްޓްރަޒެނެކާގެ އޮޕަރޭޝަންސް އެކްސެކިއުޓިވް ޕަމް ޗެންގް ވަނީ އެ ކުންފުނިން އުފައްދާ ކޮވިޑް ވެކްސިންގެ 200 މިލިއަން ޑޮޒް 2020 ވަނަ އަހަރު އުފެއްދޭނެ ކަމަށާއި 2021 ވަނަ އަހަރުގެ ފުރަތަމަ ކުއަރޓާ ނިމެންވާއިރަށް ވެކްސިންގެ 700 މިލިއަން ޑޯޒް އުފެއްދޭނެ ކަމަށް ބުނެފައެވެ.
މީޑިއާ ރިޕޯޓްތައް ބުނާ ގޮތުން، އިނގިރޭސިވިލާތުގައި އެންމެ ފުރަތަމަ ބޭނުން ކުރަން ފަށާނީ މި ވެކްސިންއެވެ. އަދި ބްރެޒިލް، އިންޑިއާ އަދި ތުރުކީ ފަދަ ގައުމުތަކަށް މި ވެކްސިންގެ ޝިޕްމަންޓްތަކެއް މިހާރު ވެސް ފޮނުވާފައިވާ ކަމަށް އެސްޓްރާޒެނެކާ އިން ވަނީ ބުނެފައެވެ.
