މަޖިލިސް ރައީސް އާއި ނައިބު ރައީސްގެ ކޮޓަރިކޮޅު ބަގް ކުރަން އުޅުނު މައްސަލައެއް
23 ނޮވެމްބަރު 2020 | ހޯމަ 04:32އެއީ ފުލުހަކާއި މަޖިލީހުގެ ސެކިއުރިޓީ ސްޓާފަކާއި ދެމެދު ދެކެވުނު ވާހަކައެއް
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ރައްޔިތުންގެ މަޖިލީހުގެ ރައީސް އަދި ނައިބު ރައީސްގެ ކޮޓަރިކޮޅުގައި އަޑުއަހާ ޒާތުގެ އާލާތެއް ހަރުކޮށް، ބަގް ކުރަން އުޅުނު މައްސަލައެއް ފެންމަތިވެއްޖެ އެވެ.
މިކަމާ ގުޅޭގޮތުން ހޯމަ ދުވަހުގެ ޖަލްސާގައި ވާހަކަދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ މަޖިލީހުގެ ކޮމިޓީ ކޮޓަރިއަކާއި މަޖިލިސް ރައީސް އަދި ނައިބު ރައީސްގެ ކޮޓަރިކޮޅު ބަގް ކުރަން އުޅުނު ކަމުގެ މައްސަލައެއް ސަރޖެންޓް އެޓް އަރމްސް ރިޕޯޓުކުރައްވާފައިވާ ކަމަށެވެ.
އެއީ ފުލުހަކާއި މަޖިލީހުގެ ސެކިއުރިޓީ ސްޓާފަކާއި ދެމެދު ދެކެވުނު ވާހަކައެއްކަން ފާހަގަކުރައްވާ ރައީސް ނަޝީދު ވިދާޅުވީ އެ މައްސަލަ ސަރޖެންޓް އެޓް އަރމްސް އަދި ސެކެޓްރީ ޖެނެރަލްގެ ސަމާލުކަމަށް ގެނައީ މަޖިލީހުގެ ސެކިއުރިޓީގައި މަސައްކަތް ކުރާ މުވައްޒަފު ކަމަށެވެ.
މި މައްސަލަ އެއްވެސް ގޮތަކަށް ފުލުހަށް ހުަށައަޅަން ގަސްތުނުކުރައްވާކަން ރައީސް ނަޝީދު ހާމަކުރެއްވިއެވެ. މަޖިލީހުގެ ރައީސް ވަނީ އެހެންކަމުން މި މައްސަލަ ބެއްލެވުމަށް މަޖިލީހުގެ ސަލާމަތީ ހިދުމްތަކާއި ގުޅޭ ކޮމިޓީއަށް ފޮނުވާފައެވެ.
