ހާލަންޑުގެ ހަތަރު ލަނޑާއެކު ޑޯޓްމުންޑަށް ފަސޭހަ މޮޅެއް

ޖަރުމަން ލީގުގައި ހޮނިހިރު ދުވަހުގެރޭ ޒުވާން ފޯވާޑް އާލިން ބްރައުޓް ހާލަންޑް ކާމިޔާބުކުރި ހަތަރު ލަނޑާއެކު ހާތާ ބާލިން އަތުން ފަސޭހަކަމާއެކު ބޮރޫޝިއާ ޑޯޓްމުންޑް މޮޅުވެއްޖެއެވެ.

ރަށުން ބޭރުގައި ކުޅުނު މި މެޗުން ޑޯޓްމުންޑް މޮޅުވީ 5-2 ގެ ނަތީޖާއަކުންނެވެ.

ހޮނިހިރު ދުވަހުގެރޭ ކުޅުނު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ހާތާ ބާލިނުންނެވެ. މެޗުގެ 33 ވަނަ މިނެޓުގައި އެ ޓީމަށް ލީޑު ނަގައިދިނީ މަތިއަސް ކޫނިއާއެވެ. އެކަމަކު ދެވަނަ ހާފުގެ 15 މިނެޓު ތެރޭ ހެޓްރިކެއް ހަދައި ހާލަންޑް ވަނީ ޑޯޓްމުންޑް ކޮޅަށް މެޗުގެ ނަތީޖާ އަނބުރާލާފައެވެ. އޭނާ ލަނޑުތައް ޖެހީ 47، 49 އަދި 62 ވަނަ މިނެޓުގައެވެ.

އަދި މެޗުގެ 70 ވަނަ މިނެޓުގައި ރަފައެލް ގަރޭރޯ ޑޯޓްމުންޑުގެ ހަތަރުވަނަ ލަނޑު ޖެހިއިރު، އޭގެ ނުވަ މިނެޓު ފަހުން ލިބުނު ޕެނަލްޓީއަކުން ކޫނިއާ ވަނީ ހާތާ ބާލިންގެ ދެވަނަ ލަނޑު ޖަހާފައެވެ. އެކަމަކު އޭގެ ސިކުންތުކޮޅެއް ފަހުން ހާލަންޑް ވަނީ ޑޯޓްމުންޑުގެ ފަސްވަނަ ލަނޑު ޖަހާފައެވެ.

ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުން ޑޯޓްމުންޑް ފަސޭހަކަމާއެކު މޮޅުވިއިރު، އެންމެ ފަހުގެ ޗެމްޕިއަން ބަޔާން މިއުނިކް ވަނީ އަމިއްލަ ދަނޑުގައި ވާޑާ ބްރެމެންއާ 1-1 ގެ ނަތީޖާއަކުން އެއްވަރުވެފައެވެ.

މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ވާޑާ ބްރެމެނުންނެވެ. ފުރަތަމަ ހާފުގެ އިތުރު ވަގުތުގައި މި ލަނޑު އެ ޓީމަށް ކާމިޔާބުކޮށްދިނީ މަކްސިމިލިއަން އެގެސްޓެއިންނެވެ. އެކަމަކު މެޗުގެ 62 ވަނަ މިނެޓުގައި ކިންގްސްލީ ކޯމަން ވަނީ ބަޔާނަށް ނަތީޖާ އެއްވަރުކޮށްދީފައެވެ.

މި މެޗަކީ ބަޔާނުގެ ގޯލްކީޕަރު މެނުއެލް ނޯޔާ އެ ޓީމަށް ކުޅެދިން 400 ވަނަ މެޗެވެ. އަދި މި މެޗުގައި އޭނާ ވަނީ ބަޔާން ބަލިނުވެ ސަލާމަތްކޮށްދިނުމުގައި މުހިންމު ދައުރެއް އަދާކޮށްފައެވެ.

މި ނަތީޖާތަކާއެކު ލީގު ތާވަލުގެ އެއްވަނައިގައި ބަޔާން އޮތީ ކުޅުނު އަށް މެޗުން ލިބުނު 19 ޕޮއިންޓާއެކުއެވެ. ދެވަނައިގައި އޮތް ވާދަވެރި ޑޯޓްމުންޑާއި ތިންވަނައިގައި އޮތް ބަޔާ ލެވަކޫސެނަށް އަށް މެޗުން ވަނީ 18 ޕޮއިންޓް ލިބިފައެވެ.