ގުޅިފަޅުގައި ޕޯޓެއް ނާޅާ ކުރިއެރުމެއް ލިބެން ނެތް ކަމަށް މޯލްޑިވްސް ސްޓޭޓް ޝިޕިންގގެ އެމްޑީ އަބްދުﷲ ސައީދު ވިދާޅުވެއްްޖެއެވެ.
ރާއްޖެޓީވީގެ "ފަލަ ސުރުހީ" ޕްރޮގްރާމުގައި ގުޅިފަޅަށް ޕޯޓް ބަދަލުކުރަން ތާއީދު ކުރައްވާ ސަބަބުތައް ހާމަކުރައްވަމުން ސައީދު ވިދާޅުވީ މިހާރު މާލޭގައި އޮތް ބަނދަރަކީ އާގު ބޯޓު ފަހަރަށް ހިދުމަތް ދޭން އެކަށީގެންވާ ވަރުގެ ބަނދަރެއް ނޫން ކަމަށެވެ. އަދި މިހާރު ބޭނުން ކުރާ މާލޭގެ ޕޯޓަށް ދިމާވެފައިވާ ޖާގައިގެ ދަތިކަމުގެ ވާހަކަ ފާހަގަކުރެއްވިއެވެ.
ޝިޕިންގ ސިނާއަތުގައި ހަރަކާތްތެރިވާ ބޮޑެތި ކުންފުނިތަކުން ރާއްޖެއަށް ދަތުރު ނުކުރުމުގެ އެންމެ ބޮޑު އެއް ސަބަބަކީ ވެސް މިއީ ކަމަށް ސައީދު ވިދާޅުވިއެވެ. އަދި ބޮޑެތި ބޯޓު ފަހަރުތައް ކަނޑުގައި ބާއްވައިގެން، ބަނޑަކަށް މުދާ ބަރުކޮށްގެން ގެނައުމަކީ އެ ކުންފުނިތަކަށް އެހާ "އެޓްރެކްޓިވް" ކަމެއް ނޫން ކަމަށް ވިދާޅުވިއެވެ.
މިކަމުގެ ތަފްސީލު ދެއްވަމުން ސައީދު ވިދާޅުވީ، ވިއްސާރަ ދުވަސްކޮޅެއް ނަމަ ކޮންޓެއިނަރތައް ހުސްކުރުމަށް ވަރަށް ބޮޑެތި ދަތިތަކާއި ކުރިމަތިލާން ޖެހޭ ކަމަށެވެ. އެގޮތުން 500 ނުވަތަ 700 ވަރަކަށް ކޮންޓެއިނަރ ގެންނައިރު މި ތަކެތި ބޭލުމަށް 4 ވަރަކަށް ދުވަސް ހޭދަވާ ކަމަށް ސައީދު ވިދާޅުވިއެވެ.
ބައިނަލްއަގްވާމީ ބޮޑެތި ޝިޕިންގ ލައިންތަކުގެ ދަތުރުތައް ބޭނުން ވަނީ ނަމަ، މުދާ ބޭލުމަށް ފަހު ދަތުރު ފެށޭ ވަގުތު (ޓަރންއެރައުންޑް ޓައިމް) ކުރުކޮށްގެން ނޫނީ އެ ފަރާތްތަކުގެ ޝައުގުވެރިކަމެއް ނެތް ކަން ފާހަގަކުރައްވިއެވެ. ނަމަވެސް ގުޅީފަޅުގައި 500 ނުވަތަ 600 މީޓަރުގެ ޕޯޓެއް އެޅިއްޖެ ނަމަ ޓަރންއެރައުންޑް ޓައިމް އެއް ދުވަހަށް ކުރު ކުރެވޭނެ ކަމަށް އޭނާ ވިދާޅުވިއެވެ.
މިހާރު މިސާލަކަށް އަޅުގަނޑުމީ ބައްލަވާ 500 ނުވަތަ 700 ކޮންޓެއިނަރގެ އޮޕަރޭޝަނެއްގަ މިހާރު ނަގާނެ އިނގޭތޯ ތިނެއް ނުވަތަ ހަތަރު ދުވަސް. ހަތަރު ވަރަކަށް ދުވަސް ކަމަށް ބައްލަވާ. އޭތި ބަދަލުވެގެންދާނެ އިނގޭތޯ އެއް ދުވަހަށް.މޯލްޑިވްސް ސްޓޭޓް ޝިޕިންގގެ އެމްޑީ އަބްދުﷲ ސައީދު
ގުޅީފަޅުގައި މިވަގުތު ބޮޑު ޕޯޓެއް އެޅިފައި އޮތް ނަމަ ވާނެ ފައިދާތަށް ފާހަގަ ކުރައްވާ ވިދާޅުވީ މިވަގުތު މި ސަރަހައްދުގައި އޮތް ޓްރާންޝިޕްމަންޓް ހަބަކީ ކޮލަމްބޯ ނަމަވެސް މި ވަގުތު ލަންކާގައި ކޮވިޑުގެ ހާލަތު ހުރި ގޮތުން ކޮލޮމްބޯ ޕޯޓުގެ ޓަރންއެރައުންޑް ޓައިމް އިތުރުވެފައިވާ ކަމަށް ވިދާޅުވިއެވެ. އަދި މި ހާލަތުގައި ޝިޕިންގ ލައިނަރތަކުން އެހެން ބަނދަރެއް ހޯދި އިރު، ރާއްޖޭގައި ބަނދަރެއް އޮތް ނަމަ އެ ދަތުރުތައް ރާއްޖެއަށް ލިބުނީސް ކަމަށް ވިދާޅުވިއެވެ.
މި ރީޖަންގަ އެންމެ ބޮޑު ހަބެއް ގޮތުގައި މި އޮޕަރޭޓް ކުރަނީ ކޮލަމްބޯ. އެހެން ނަމަވެސް ކޮލަމްބޯގަ މި ކޮވިޑްގެ މައްސަލަ އާއި ގުޅިގެން ވަރަށް ބައިވަރު ޑިލޭޒްތަކެއް އަތުވެއްޖެ. އަދި މިހާރުވެސް ކޮވިޑްގެ ހާލަތު އަޅުނޑަށް ހީވަނީ އުޅެނީ އިތުރަށް ގޯސްވެގެން ހެން. ކޮންމެ ގޮތެއްވިޔަސް ބަނދަރުގެ މަސައްކަތުގެ ސިޓުއޭޝަން ވަރަށް ގޯސް. ވަރަށް ޑިލޭ ވަމުން ދަނީ. އަޅުގަނޑަށް އިނގިފަ އެބައޮތް އެމްއެސްސީ ކަހަލަ އެއީ ދުނިޔޭގެ ދެވަނައަށް އެންމެ ބޮޑު ކޮންޓެއިނަރ ލައިން. އެއީ މެޑިޓޭރިއަން ޝިޕިން ކޯޕަރޭޝަން. އެމީހުންނަށް އިތުރު އަލްޓަރނޭޓިވް އެއް އޮތް ނަމަ ކޮލަމްބޯއަށް ނުދާވަރަށް ކޮލަމްބޯގެ ކަންތައްތައް ގޯސް. އެކަމު ނެތް ދެއްތޯ މި ރީޖަންގައި އިތުރު އަލްޓަރނޭޓިވްއެއް. މިސާލަކަށް އަޅުގަނޑުމެންގެ ގުޅީފަޅު ނުވަތަ އެހެން ޓްރާންސްޝިޕްމަންޓް ފެސިލިޓީއެއް އޮވެއްޖެ ނަމަ މިއީ މެއިން ލައިނާއެއް އަޅުގަނަޑުމެންނާއެކު ސޮއެ ކުރާނެ ދަނޑިވަޅެއް.އެމްޑީ އަބްދުﷲ ސައީދު
ގުޅިފަޅުގައި އިންޓަރނޭޝަނަލް ޕޯޓެއް އެޅުމަކީ މި ސަރުކާރުގެ ތަސައްވުރުގެ މުހިއްމު މަސައްކަތެކެވެ. އެގޮތުން ގުޅީފަޅު ޕޯޓް ތަރައްގީ ވުމުން ޕޯޓްގެ ޖާގަ ބޮޑުވެ، ޚިދުމަތް އަވަސްވެ، މަސައްކަތްތަކަށް ފަސޭހަވުމުގެ އިތުރުން، ޖާގައިގެ ދަތިކަން ކުރިމަތިވެފައިވާ މާލޭގެ ތަރައްގީއަށް ވެސް އިތުރު ފުރުސަތުތަކެއް ފަހިވެގެން ދާނެ ކަމަށް ސަރުކާރުން ވަނީ ބުނެފައެވެ.
