ތަނެއް ތަރައްގީވެ ކުރިއަރައި ދާނީ ހަރުދަނާ ދަތުރުފަތުރުގެ ނިޒާމަކުން: ރައީސް ޞާލިހް

ތަނެއް ތަރައްޤީވެ ކުރިއަރައި ދިޔުމަށް ބޭނުންވާ އެންމެ މުހިންމު ކަމަކީ، ދަތުރުފަތުރު ކުރެވޭނެ، އަދި ފަސޭހައިން މުދާ އުފުލޭނެ ލުއިފަސޭހަ އިންތިޒާމެއް ހަމަޖެހިފައި އޮތުން ކަމަށް ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިހު ވިދާޅުވެއްޖެއެވެ.

ހޯރަފުށީ އެއަރޕޯޓު ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ޞާލިހު ވިދާޅުވީ، އެ މަނިކުފާނުގެ އަމާޒަކީ މީހުން ދިރިއުޅޭ ކޮންމެ ރަށަކުން ވެސް ފަސޭހަކަމާއެކު އަވަހަށް ދެވޭ ހިސާބުގައި އެއަރޕޯޓެއް އޮންނަ ގޮތަށް ވައިގެ ދަތުރުފަތުރުގެ ވިއުގައަކުން މުޅި ރާއްޖެ ގުޅައިލުން ކަމަށެވެ.

މި މޭރުމުން ވާހަކަ ދައްކަވަމުން ރައީސް ވިދާޅުވީ، އެ މަނިކުފާނުގެ ސިޔާސަތުތައް ބައްޓަން ކުރަމުން ދަނީ އެމްޑީޕީގެ މެނިފެސްޓޯގައިވާ ގޮތަށް ލާމަރުކަޒީ ނިޒާމަކުން މުޅި ރާއްޖެ ގުޅައިލުމަށް ކުރަންޖެހޭ މަސައްކަތްތަކާ އެއް ގޮތަށް ކަމަށާއި، އެގޮތުން ވައިގެ ދަތުރުފަތުރުގެ ވިއުގައަކުން މުޅި ރާއްޖެ ގުޅާލެވިގެން ދާއިރު، އެއަރޕޯޓްތަކާއި ކައިރީގައިވާ އެހެން ރަށްތައް، ރަނގަޅު ފެރީގެ ވިއުގައަކުން ގުޅައިލެވިގެން ދާނެ ކަމަށެވެ.

ހޯރަފުށީގެ ތަރައްގީއަށް ކުރުމަށް ހަމަޖެހިފައިވާ ބައެއް ކަންކަމަށް އަލިއަޅުއްވާލަމުން ރައީސް ވިދާޅުވީ، އެރަށުގެ ގޮނޑުދޮށް ހިމާޔަތްކުރުމާއި، މަގުތައް ހެދުމާއި، ކައުންސިލް އިދާރާގެ އިމާރާތާއި، ޖުވެނައިލް ޖަސްޓިސް ޔުނިޓްގެ އިމާރާތް އަންނަ އަހަރުގެ ބަޖެޓްގައި ހިމަނާފައި ވާނެ ކަމަށެވެ.

އޭގެ އިތުރުން، އަންނަ އަހަރު ހއ. އަތޮޅުގެ ބައެއް ރަށްރަށުގެ ބިން ހިއްކުމާއި، މަގުތައް ހެދުމާއި، ޞިއްޙީ މަރުކަޒުތަކުގެ ފެންވަރު މަތިކުރުމާއި، ސްކޫލް ތަރައްޤީ ކުރުމާއި، މިސްކިތް ޢިމާރާތް ކުރުމާއި، ޒުވާނުންގެ މަރުކަޒު ތަރައްޤީ ކުރުމާއި، ފެނާއި ނަރުދަމާ ނިޒާމު ޤާއިމު ކުރުމާއި، ބަނދަރު ހެދުމާއި، ކުޅިވަރު ވަސީލަތްތައް ޤާއިމު ކުރުމާއި، މަސް މާރުކޭޓާއި ދަނޑުވެރިންގެ މާރުކޭޓު ތަރައްޤީ ކުރުމަށް ވެސް ބަޖެޓްގައި ހިމަނާފައި ވާނެ ކަމަށް ރައީސް ވިދާޅުވިއެވެ. އަދި ރަށްރަށުގައި ފަށާފައި ހުރި ހައުސިންގ ޔުނިޓްތައް ނިންމުމަށް ވެސް އަންނަ އަހަރުގެ ބަޖެޓުގައި ހިމަނާފައި ވާނެ ކަމަށް ރައީސް ޞާލިހު ވިދާޅުވިއެވެ.