އަންނަ އަހަރަށް ލަފާ ކުރާ ބަޖެޓު ތައްޔާރުކުރީ ކޮވިޑާ ގުޅިގެން ލިބުނު ފިލާވަޅުތަކަށް ރިއާޔަތް ކޮށްގެން ކަމަށް ފިނޭންސް މިނިސްޓްރީން ބުނެފިއެވެ.
ބުދަ ދުވަހުގެރޭ ރާއްޖެޓީވީގެ "ބަޖެޓް 2021" ޕްރޮގްރާމްގައި ބައިވެރިވެވަޑައިގެން މިނިސްޓްރީ އޮފް ފިނޭންސްގެ ޗީފް ފައިނޭންޝަލް ބަޖެޓް އެގްޒެކެޓިވް އަހުމަދު ސަރުވަޝް އާދަމް ވަނީ އަންނަ އަހަރުގެ ބަޖެޓް ތައްޔާރު ކުރިއިރު މިނިސްޓްރީން އިސްކަން ދިން ކަންކަމަކީ ކޮބައިކަން ބަޔާން ކުރައްވާފައެވެ.
ސަރުވަޝް ވިދާޅުވީ، ބަޖެޓް ތައްޔާރުކުރި އިރު ކޮވިޑުގެ ޙާލަތުގެ ސަބަބުން ކުރިމަތިވި އިޖުތިމާއި އަދި އިޤްތިސާދީ ގެއްލުންތަކުން އަރައިގަނެވޭނެ ގޮތްތަކަށް ރިއާޔަތް ކުރައްވާފައިވާނެ ކަމަށެވެ. އަދި އިޤްތިސާދު އަލުން ފަށައިގެން އަންނައިރު ދޭންޖެހޭ ބަޖެޓް ސަޕޯޓު ދިނުމަށް ކުރަން ޖެހޭ ކަންކަންވެސް ހިމަނާފައިވާނެ ކަން ސަރުވަޝް ފާހަގަ ކުރެއްވިއެވެ.
އޭގެ އިތުރުން، އެއް ސިނާއަތަކަށް ބަރޯސާވުމުގެ ސަބަބުން ލިބޭ ގެއްލުންތައް ކުޑަކޮށް، އެހެން ސިނާއަތްތައް ފުޅާ ކުރުމަށް ކުރަން ޖެހޭ ކަންކަންވެސް ކުރިއަށް ގެންދަންޖެހޭކަން ބަޖެޓް ތައްޔާރު ކުރަމުންދިޔައިރު ފާހަގަވިކަން ބަޔާން ކުރައްވައި ސަރުވަޝް ވިދާޅުވީ، އެކަމަށްޓަކައި އެހެނިހެން ސިނާއަތްތަކުން އިތުރު ވަޒީފާތައް އުފެއްދުން ފަދަ ކަންކަމަށްވެސް ރިއާޔަތް ކޮށްފައިވާ ކަމަށެވެ.
މި ދިމާވާ ކަންކަމާ ގުޅިގެން އަޅުގަނޑުމެންނަށް ދަސްވާ ކަންކަންވެސް އެބަހުރި، އެގޮތުން އޭގެ ތެރެއިން އެއް ކަންތައް އެއީ އަޅުގަނޑުމެން އެއް ސިނާއަތަކަށް ބަރޯސާވެފައި އޮތުމުން ދިމާވާ ގެއްލުންތައް ކުޑަ ކުރަން މަސައްކަތް ކުރުން، އަދި އެހެން ސިނާއަތްތަކުގެ ވަޒީފާތައް އިތުރު ކުރުމާއި، އެހެން ސިނާއަތްތައް ކުރިއަށް ގެންދަން މަސައްކަތް ކުރުން، އެކަމަށް ޖާގަ ދޭން ޖެހޭނެކަން އަޅުގަނޑުމެންނަށް ޤަބޫލު ކުރެވުނު ބަޖެޓުން، އެހެންވީމާ އެކަމަށްވެސް މަސަައްކަތް ކުރެވުނުމިނިސްޓްރީ އޮފް ފިނޭންސްގެ ޗީފް ފައިނޭންޝަލް ބަޖެޓް އެގްޒެކެޓިވް އަހުމަދު ސަރުވަޝް އާދަމް
ސަރުވަޝް ވިދާޅުވީ، އައު ސަރުކާރު އައުމާއެކު ލާމަރުކަޒު ކުރުމާއި، ސަރަޙައްދީ ތަރައްޤީއަށް ޚާއްސަ އިސްކަމެއް ދެމުންގެންދާ ކަމަށެވެ. އަދި އެކަމުގެ ފައިދާ ކޮވިޑުގެ ތެރޭގައިވެސް ލިބިގެން ދިޔަކަން ފާހަގަ ކުރައްވައި ސަރުވަޝް ވިދާޅުވީ، 2021 ވަނަ އަހަރުވެސް ލާމަރުކަޒީ މަގުން ކަންކަން ގެންދެވޭނެ ގޮތްތަކަށް އިސްކަންދީފައި ވާނެ ކަމަށެވެ.
އިޤްތިސާދު އަލުން ފަށައިގަތުމަށް ބަޖެޓްގައި ހިމަނާފައިވާ ކަންކަމަށް ބަޖެޓް ކޮމިޓީގެ މުޤައްރިރު ކިނބިދޫ ދާއިރާގެ މެމްބަރ މުހައްމަދު ނާޝިޒުވެސް ވަނީ ތާއީދު ކުރައްވާފައެވެ. އެގޮތުން އަންނަ އަހަރަށް ލަފާކޮށް ހުށައަޅާފައިވާ ބަޖެޓުގައި ކަންބޮޑުވުންތަކެއް ހުރި ނަމަވެސް، މިހާރު ހުށައަޅާފައިވާ ބަޖެޓުގައި އިގްތިސާދު ސްޓިމިއުލޭޓް ކުރަން ހިމަނާފައިވާ ކަންކަމަށް ތާއީދުކުރައްވާ ކަމަށް ނާޝިޒް ވިދާޅުވިއެވެ.
ހާއްސަކޮށް އާމްދަނީ ވަކިވަރަކަށް ލިބޭނެކަން އަންދާޒާކޮށް ތައްޔާރުކުރާ ބަޖެޓުގައި ދަތިތަކެއް ހުންނާނެ ކަން ގަބޫލުކުރައްވާ ކަމަށް ނާޝިޒް ވިދާޅުވިއެވެ. އަދި މިއީ ރާއްޖޭގެ ތާރީހުގައި ވެސް މިހާ ދަތި އުނދަގޫ ހާލަތެއްގައި ހުށައެޅިގެން ދިޔަ ހަމައެކަނި ބަޖެޓްކަން ފާހަގަކުރައްވާ ނާޝިޒް ވިދާޅުވީ، މީގެ ކުރިން ދައުލަތުގެ އާމްދަނީ މިހާ ދަށަށް ގޮސްގެން އާމްދަނީއަށް ފައިނޭންސް ކުރާކަށް ނުޖެހޭ ކަމަށެވެ.
ނާޝިޒް އިތުރަށް ވިދާޅުވީ، މި ހާލަތުގައި ސަރުކާރުގެ ހުރިހާ ސިޔާސަތެއް ތަންފީޒުކުރެވޭނެ ބަޖެޓެއް ހުށައެޅުމަކީ ނުވާނެ ކަމެއް ކަމަށެވެ. އަދި ކޮވިޑުގެ ހާލަތާއި ގުޅިގެން އިގްތިސާދަށް ދިމާވެފައިވާ ގޮންޖެހުންތަކުން އަރައިގަނެވޭނީ އެ ހާލަތު ބަދަލުވެގެން ކަމަށް ވިދާޅުވިއެވެ. އެގޮތުން ކޮވިޑަށް ވެކްސިނެއް ނުވަތަ ފަރުވާއެއް ލިބުމުން، މި ހާލަތު މުޅިން އެއްކޮށް ބަދަލުވެގެންދާނެ ކަމަށް ވިދާޅުވިއެވެ.
