ސެޕްޓެމްބަރު މަހަށްވުރެ އޮކްޓޯބަރު މަހު ހުށަހެޅުނު ކުޑަކުދިންނާ ގުޅޭ މައްސަލަތައް ގިނަ: ޖެންޑަރ މިނިސްޓްރީ

ސެޕްޓެމްބަރު މަހު ހުށަހެޅުނު ކުޑަކުދިންނާއި ގުޅޭ މަައްސަލަތަކަށްވުރެ، އޮކްޓޯބަރު މަހު ހުށަހެޅުނު މިފަދަ މައްސަލަތަކުގެ އަދަދު އިތުރުވެފައިވާކަން ޖެންޑަރ މިނިސްޓްރީގެ ތަފާސް ހިސާބުތަކުން ދައްކައިފިއެވެ.

އޮކްޓޯބަރު މަހު ޖެންޑަރ މިނިސްޓްރީއަށް ހުށަހެޅިފައިވާ ތަފާތު އެކި މައްސަލަތަކަށް އެކުލަވާލާ އާންމުކޮށްފައިވާ ތަފާސް ހިސާބުތަކުން ފެންނަ ގޮތުގައި ކުޑަކުދިންނަށް ކުރާކި ބާވަތުގެ އަނިޔާއާއި ގުޅޭ 135 މައްސަލައެއް ވަނީ އެ މިނިސްޓްރީއަށް ހުށަހަޅާފައެވެ. ނަމަވެސް ސެޕްޓެމްބަރު މަހު ރިޕޯޓް ކޮށްފައި ވަނީ 106 މައްސަލައެވެ.

ޖެންޑަރ މިނިސްޓްރީން އާންމުކޮށްފައިވާ ތަފާސް ހިސާބުތަކަށް ބަލާއިރު، ކުޑަކުދިންނާ ގުޅުންހުރި މައްސަލަތަކުގެ ތެރެއިން އިހުމާލުވުމުގެ 43 މައްސަލަ ރިޕޯޓުކޮށްފައިވާ އިރު، ސެޕްޓެމްބަރު މަހު މިބާވަތުގެ 29 މައްސަލައެއް ވަނީ ރިޕޯޓްކޮށްފައެވެ.

ކުޑަކުދިންނަށް ޖިންސީ ގޯނާކުރުމުގެ 38 މައްސަލަ ހުށަހެޅިފައިވާއިރު، ޖިސްމާނީ ހާނިއްކައިގެ 24 މައްސަލަ، ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 15 މައްސަލަ، ނަފްސާނީ ހާނިއްކައިގެ 9 މައްސަލަ، ނަހަމަ ގޮތުގައި ބޭނުން ކުރުމުގެ 4 މައްސަލަ، އެހެން ކުދިންގެ ފަރާތުން އިންޓަރނެޓް މެދުވެރިކޮށް ގަނާ ލިބުމުގެ 1 މައްސަލަ ހުށަހަޅާފައިވެއެވެ.

މީގެ އިތުރުން އެހެންކުދިންގެ ފަރާތުން ގަނާލިބުމުގެ އަދި ފުރައްސާރައިގެ ޝިކާރައަކަށްވުމުގެ 1 މައްސަލަ ހިމެނޭކަމަށް ޖެންޑަރ މިނިސްޓްރީގެ ތަފާސްހިސާބުތަކުން ދައްކައެެވެ.

ކުޑަކުދިންގެ އަހުލާގާ ގުޅުން ހުރި 12 މައްސަލައެއް ހުށަހަޅައިފައިވާއިރު، މީގެ ތެރޭގައި ސްކޫލަށް ދާން ބޭނުންނުވުމުގެ 1 މައްސަލަ ހިމެނެއެވެ. އަދި ހައްގުތަކުން ކުޑަކުދިން މަހްރޫމު ކުރުމުގެ 2 މައްސަލަ ހުށަހެޅުނުއިރު، މީގެ ތެރޭގައި ހިމެނެނީ އުފަންވުމުން ރަޖިސްޓްރީ ނުކުރުމާ ބެހޭ 1 މައްސަލަ އަދި ސިއްހީ ފަރުވާއަށް ހުރަސް އެޅުމުގެ 1 މައްސަލަ ހުށަހެޅުނު ކަމަށް ވެސް ޖެންޑަރ މިނިސްޓްރީގެ ތަފާސް ހިސާބުތަކުން ދައްކައެވެ.

ކުދަކުދިންނަށް އެކި ބާވަތުގެ އަނިޔާކުރުމުގެ މައްސަލަތަކުގެ އިތުރުން އެކި ބާވަތުގެ ކުށްކުރާ ކުޑަކުދިންގެ 9 މައްސަލަ އޮކްޓޫބަރު މަހު ޖެންޑަރ މިނިސްޓްރީއަށް ހުށަހެޅިފައިވާއިރު، އޭގެ ތެރޭގައި ވައްކަންކުރުމާ ގުޅޭ 2 މައްސަލަވެސް ހިމެނެއެވެ.