މޫސުން ގޯސްވެ ދިމާވެދާނެ ގެއްލުމަކަށް އެމްއެންޑީއެފް އޮތީ ތައްޔާރަށް

މޫސުން ގޯސްވެ ރާއްޖޭގެ ރަށްތަކަށް ދިމާވެދާނެ ގެއްލުންތަކުން ސަލާމަތް ކުރުމަށް، އެމްއެންޑީއެފް އޮތީ އެންމެ ފުރިހަމައަށް ތައްޔާރުވެފައި ކަމަށް އެމްއެންޑީއެފް އިން ހާމަކޮށްފިއެވެ.

ޒޫމް މެދުވެރިކޮށް ރާއްޖޭގެ މީޑިއާތަކަށް މައުލޫމާތު ހިއްސާކުރައްވަމުން އެމްއެންޑީއެފް ސެންޓްރަލް އޭރިޔާގެ ކޮމާންޑަރ ކާނަލް އިބްރާހީމް ހިލްމީ ވިދާޅުވީ، ސެންޓްރަލް އޭރިޔާ ހިމެނޭ ސަރަހައްދުތައް ކަމަށްވާ، މ، ފ، ދ، ތ އަދި ލ. އަތޮޅުގައި ހިމެނޭ ރަށްތަކަށް މޫސުން ގޯސްވެ، ވާާރޭ ވެހުމުގެ ސަބަބުން ނުރައްކާތެރި ހާލަތަކަށް ގޮސްފައިނުވާ ކަމަށާއި، ނަމަވެސް އެ ރަށްތަކުގެ ކައުންސިލާއި، ކަމާއި ގުޅުންހުރި އިދާރާތައް ގުޅިގެން މިފަދަ މޫސުމަކަށް ތައްޔާރުވެ، ލިބިދާނެ ގެއްލުންތަކުން ސަލާމަތް ވުމަށް ކޮށްފައިވާ މަސައްކަތްތަކަށް ތައުރީފު ކުރާ ކަމަށެވެ.

ކާނަލް ހިލްމީ ވިދާޅުވީ، މި ދުވަސްވަރަކީ މޫސުން ގޯސް ދުވަސް ވަރަކަށް ވުމުން ކަނޑު ދަތުރުފަތުރު ކުރާ ފަރާތްތަކުން ވެސް މޫސުމަށް ބަލައިގެން ދަތުރު ކުރުމަކީ މުހިންމު ކަމެއް ކަމަށާއި، އަދި ދަތުރަށް ނުކުންނައިރު، މިފަދަ މޫސުމެއްގައި ދަތުރުކުރެވޭނެ އުޅަނދަކަށް އެ އުޅަނދު ވާންޖެހޭނެ ކަމަށެވެ.

ހަމައެއާއެކު ދަތުރު ކުރުމުގައި، ދަތުރު ކުރަން ހަމަޖެހިފައިވާ މަގާއި، އެ ސަރަހައްދުގެ މޫސުން ވެސް ކުރިއާލައި އޮޅުން ފިލުވާފައި އޮތުމަކީ އަމާން ދަތުރަކަށް ހެދުމަށްޓަކައި ވެވޭނެ އެންމެ ރަނގަޅު ގޮތް ކަމަށް ދެކިވަޑައިގަންނަވާ ކަމަށް ވެސް ކާނަލް ހިލްމީ ވިދާޅުވިއެވެ. ކާނަލް ހިލްމީ ވިދާޅުވީ، މިފަހަރު މޫސުމަށް އައި ބަދަލުތަކާއެކު ކުރި ވިއްސާރާގައި، އެހެން އަހަރުތަކާއި ހިލާފަށް ކަނޑުމަތީގައި ހިނގާދިޔަ ހާދިސާތައް މަދު ކަމަށެވެ.

މޫސުން ގޯސްވެގެން ދިމާވެދާނެ ގެއްލުންތަކުން އަރައިގަތުމަށް ފަޔަރ އެންޑް ރެސްކިއު ސާވިސް އިން ކުރަމުންދާ ކަންކަން ހާމަކޮށް، އެ ސާވިސްގެ ކޮމަޑާންޓް ކާނަލް މުހައްމަދު މުހުތާރު ވިދާޅުވީ، މިދުވަސްވަރު އެންމެ ބޮޑު އިސްކަމެއްދީގެން ކުރަމުންދަނީ މާލޭގައި ފެންބޮޑުވުމާއި ގުޅިގެން ވީއެންމެ އަވަހަށް ފެން ހިންދުމުގެ މަސައްކަތް ކަމަށެވެ.

ކާނަލް މުހުތާރު އިތުރަށް ވިދާޅުވީ، ބޯކޮށް ވާރޭވެހުމުގެ ސަބަބުން މީގެ ކުރިން ވެސް ގޭގެއަށް ފެންވަދެ، ހިފާ ގެންގުޅޭ ތަކެއްޗަށް ވަރަށް ބޮޑަށް ގެއްލުންތައް ލިބިފައިވާ ކަމަށާއި، އެކަމުގެ ސަބަބުން އެތައް ރައްޔިތަކަށް މާލީ ގޮތުން ގިނަ ގޮންޖެހުންތަކެއް ކުރިމަތިވެފައިވާ ކަމަށެވެ. އެހެންކަމުން އެފަދަ ހާދިސާތައް ދިމާނުވާނެ ގޮތްގޮތަށް މި ދުވަސްވަރު ކަންކަން ތަރުތީބުކޮށް ބެހެއްޓުމަށް ކާނަލް ވަނީ އާންމުންގެ ކިބައިން އެދިލައްވާފައެވެ.

މާލޭ ފަޔަރ ސްޓޭޝަންގެ ސްޓޭޝަން ކޮމާންޑަރ މޭޖަރ އަހުމަދު ފާއިޒް ރަޝާދު ވިދާޅުވީ، މިފަހުން އެންމެ ބޮޑަށް މޫސުން ގޯސްވެ ބޯކޮށް ވާރޭ ވެހުނު ރޭގައި އެޓީމުގެ ފަރާތުން ރާއްޖޭގެ ރައްޔިތުންނަށް ބޭނުންވާ ކާބޯތަކެތި ރައްކާ ކޮށްފައިވާ ގުދަންތަކުގައި ހަރަކާތްތެރިވެފައިވާ ކަމަށެވެ.

މޭޖަރ ފާއިޒް ވިދާޅުވީ، ފެންބޮޑުވުމުގެ ސަބަބުން އެސްޓީއޯގެ ފުށް ގުދަން ކައިރިން ފެން ހިންދުމުގެ މަސައްކަތް ކުރަމުން ގޮސް، އައިޖީއެމްއެޗާއި ދިމާލުގައި ދެވަނަ ޕަމްޕާއެކު މަސައްކަތް އިތުރުކުރި ކަމަށެވެ.

އެމްއެންޑީއެފް އިން ވަނީ، މިދުވަސް ވަރަކީ މޫސުން ގޯސް ދުވަސް ވަރަކަށް ވުމާއެކު މެޓް އޮފީހުންނާއި، އެމްއެންޑީއެފުން ފޯރުކޮށްދޭ މައުލޫމާތައް ބަލައިގެން ކަނޑު ދަތުރުފަތުރު ކުރުމާއި އަދި ފެންބޮޑު ވުމުގެ ސަބަބުން އަޅަން ޖެހޭ ފިޔަވަޅުތައް އެޅުމުގައި ފަރުދީ ޒިންމާ އަދާކުރުމަށް ގޮވާލާފައެވެ. އަދި ބޮޑު ކަމެއް ދިމާވެއްޖެ ނަމަ ވީއެންމެ އަވަހަށް ކަމާއި ގުޅުންހުރި އިދާރާ ތަކަށް އެމައުލޫމާތުތައް ހިއްސާކުރުމަށް ވެސް އެމްއެންޑީއެފުން ވަނީ އިލްތިމާސްކޮށްފައެވެ.