މިރޭ މެންދަމާ ހަމަޔަށް ބުދަ ދުވަހުގެ މަޖިލީހުގެ ޖަލްސާ ކުރިއަށް ގެންދިއުމަށް ރައްޔިތުންގެ މަޖިލީހުން ފާސްކޮށްފި އެވެ.
ޖަލްސާގެ ވަގުތު އިތުރުކުރުމަށް 30 މެމްބަރުން ވޯޓުދެއްވި އެވެ.
މިހާރު މަޖިލީހުގައި ކުރިއަށްދާ މަސައްކަތަކީ އަންނަ އަހަރަށް ލަފާ ކުރާ ދައުލަތުގެ ބަޖެޓަށް ބަހުސް ކުރުމެވެ.
އެގޮތުން ކޮންމެ މެމްބަރަކަށް ވެސް ބަޖެޓަށް ބަހުސްކުރުމަށް 15 މިނެޓްގެ އެއް ފުރުސަތެއް ލިބިގެންދާއިރު ބަހުސްގެ މަރުހަލާގައި މެމްބަރުން ފާހަގަކުރައްވާ ކަންތައްތަކަށް ޖަވާބު ދެއްވުމަށް ފިނޭންސް މިނިސްޓަރ އިބްރާހީމް އަމީރަށް 40 މިނެޓްގެ ވަގުތެއް ދިނުމަށް ވެސް ވަނީ ނިންމާފަ އެވެ.
ހުރިހާ މެމްބަރުން ބަހުސް ކުރެއްވުމުން، ބަހުސް ގައި ފާހަގަކުރެއްވި ކަންކަން ފޮނުވޭނީ މަޖިލީހުގެ ބަޖެޓު ދިރާސާ ކުރުމަށް އެކުލަވާލާފައިވާ ބަޖެޓު ކޮމިޓީއަށެވެ.
